A fosi biifi gi den Tesalonikasama 3:1-13
3 U be wani yee sani fu u, neen meke u fika na Ateine,
2 neen u sende u baala Timotiyesi kon a wi anda. En a wan futuboi fu Gadu di e paati a bun nyunsu fu Kelestesi. U sende en kon fu gi u taanga-sikin, anga fu toosutu u fu a biibi fu u kon moo taanga.
3 Da a biibi fu u naw swaki te den tesi ya miti u, bika useefi sabi taki wa poi lon gi tesi.
4 Di u be de a wi anda, u be e taigi u ala yuu taki tesi o miti u. Enke fa useefi e si, da a sani de pasa tuu.
5 Neen meke di mi be wani sabi fa ai go anga u, mi sende Timotiyesi kon aw fu yee efu we holidoo, bika mi be wani sabi efu Didibii á fende u kisi. Bika efu a kisi u, da a fu soso u wooko taanga.
6 Ma di Timotiyesi komoto a wi anda a taigi u fa we fitoow Gadu, faw lobi taawan, anga fa we poolo te we pakisei u. A taigi u tu taki useefi e angii fu si u dise leti enke fa we angii fu si wi anda.
7 Den baala fu mi winsi faw de a nowtu, winsi fa omen tesi e miti u dise, tokuso u fende toosutu di u yee fa ai go anga wi anda.
8 Bika we piisii te u yee taki we holidoo anda.
9 We gi Gadu daa fu wi ede, bika ná pikin piisii we meke u piisii.
10 Dei anga neti we begi Gadu fayafaya fu wi anga u sa miti, fu u sa taanga a biibi fu u a pe a swaki.
11 We begi fu u Dda di de a hemel, anga Masaa Yesesi opo pasi gi u fu u sa kon a wi anda.
12 We begi tu fu Masaa yeepi u fu moo lobi useefi. Eeye, a mu yeepi u fu moo lobi taa sama leti enke faw lobi u.
13 A so wo man taampu gingin, u naw abi nawan fowtu. Wo de enke sama di santa aw Dda di de a hemel fesi, di u Masaa Yesesi o kon anga ala den santawan fi en.
