A fosi biifi gi den Tesalonikasama 4:1-18
4 Den baala fu mi, u be taigi wi a fesi kaba faw mu libi efu u wani Gadu piisii. U si taki we meke moiti fu libi so tu. Neen meke we begi wi aini a nen fu Masaa Yesesi fu tan du a sani ya, u mu du en moo enke fa we du en kaba.
2 Bika u sabi saw be leli wi aini a nen fu Masaa Yesesi.
3 Gadu wani u santa, wa mu e libi wan hululibi.
4 Ibiiwan sama mu sabi fa fu dwengi en eigi sikin fu a sa santa, da Gadu o piisii anga en.
5 Wa mu meke den sekisi fii fu u basi wi enke fa ai basi den sama fu a goontapu di á sabi Gadu.
6 Wa mu du nawan sani di sa tyai ogii gi u baala efuso di sa meke den lasi san den abi, bika Yehofa* e sitaafu sama gi ala den sowtu sani ya, leti enke faw be taigi u kaba. U be wasikoi u gi den sani ya tu.
7 Bika Gadu á kai u fu libi wan tyobo libi, ma a kai u fu de sama di santa.
8 Neen meke efu wan sama nai wooko anga den leli ya, da a ná den leli fu libisama ai wisiwasi, ma a den leli fu a Gadu di e gi wi en santa yeye.
9 Aa de fu u sikiifi biifi gi u taki u mu lobi useefi enke baala, bika Gadu seefi leli u taki u mu lobi useefi.
10 We soi kaba taki u lobi ala den baala fu wi aini hii Masadoniya, ma u wani gi u taanga-sikin fu moo lobi den.
11 Meke moiti fu libi wan tan pii libi, wa mu e mumui aini taa sama libi. U mu e wooko taanga, leti enke faw be taigi u kaba.
12 Da den sama di á de aini a Kelesten kemeente o lesipeki u, u naw mankei nawan sani tu.
13 Den baala fu mi, u wani u sabi sai pasa anga den sama di dede, bika a sani ya o yeepi u fu u nai tyali enke sama di naabi howpu.
14 Efu we biibi taki Yesesi dede neen a weki baka, daw mu biibi tu taki ala den sama di dede enke bakaman fu Yesesi o weki baka, fu den sa de makandaa anga en.
15 Den sani di wo taigi u nownow, a san Yehofa* taki. Wi di o de a libi ete te Masaa kon, naw gwa hemel fosi den wan di dede.
16 Bika Masaa seefi o saka komoto a hemel anga a tutu fu Gadu. En na a fesiman fu den engel. Aw bali taanga, da den bakaman fi en di dede fosi o weki baka.
17 Bakadati wi di de a libi ete o opo go aini den woluku fu go miti den. Wo miti Masaa a tapu anda. A so wo de makandaa anga en fu teego.
18 U mu e toosutu makandaa anga den wowtu ya ala yuu.
A maiki
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’