Du fu tu biifi gi den Korentesama 1:1-24
1 Mi Pawlesi, di Gadu poti enke wan apostel fu Kelestesi Yesesi anga u baala Timotiyesi, e sikiifi a biifi ya gi a kemeente fu Gadu aini Korente anga ala den santawan fu Gadu di de na Akaya.
2 Meke u Dda di de a hemel anga Masaa Yesesi Kelestesi gi u freide, den mu soi u bun-ati tu.
3 Gafa a Gadu anga a Dda fu u Masaa Yesesi Kelestesi. Gafa a Dda di abi tyali-ati, a Gadu di e toosutu u
4 winsi sowtu tesi e miti u. Na a toosutu di Gadu e toosutu u, meke useefi poi toosutu taawan winsi sowtu tesi e miti den.
5 A omen tesi e miti u fu di wi a bakaman fu Kelestesi, ma a fu Kelestesi ede meke we fende toosutu ala yuu tu.
6 Te sani e miti u dise, da we fende toosutu anda, Gadu o fii wi tu. Te Gadu e toosutu u dise, da useefi e fende toosutu anda. Na a sani ya o yeepi u fu holidoo te den seefi sowtu tesi di e miti u dise, o miti wi anda.
7 U sabi taki leti enke fa tesi e miti u dise, a letiso ai miti wi anda. Ma we biibi taki wo holidoo, bika Gadu o toosutu wi anda tu leti enke fa ai toosutu u dise.
8 Den baala fu mi, u wani u sabi sowtu tesi miti u di u be de a Asiya. Aa be makiliki gi u seefiseefi, son yuu sani be e moo u te daw be e si enke wo dede.
9 U be e fii enke den leisi dede sitaafu gi u. Ma a sani ya leli u taki wa mu fitoow useefi, ma na a Gadu di e meke dedesama kon a libi baka u mu fitoow.
10 A puu wi a dede mofu. We biibi taki aw fii u baka, ala yuu aw fii wi.
11 Wan fasi faw sa yeepi u a te we begi gi u ala yuu, bika te omen sama e begi fu sani go bun anga u, neen a pasa enke fa den begi, da omen sama e gi Gadu daa.
12 Wi abi wan kiin kosensi, bika di u be de a den sama fu a goontapu ya mindii, u tyai useefi a wan santafasi, moomoo di u be de makandaa anga u. U du sani anga wan kiin ati enke fa Gadu wani. Boiti dati, u nai fitoow a koni fu libisama, ma na a bun-ati fu Gadu we fitoow. A fu den sani ya we gafa.
13 Ala den sani di we sikiifi gi u ya, a sani di u sabi kaba, we fusutan den sani ya tu. Mi howpu taki u fusutan ala den sani ya finifini.
14 Leti enke faw sabi taki u sa gafa gi u, a so useefi sabi taki u sa gafa gi u di a dei fu Masaa Yesesi o doo.
15 Fu di mi sabi a sani ya meke mi be wani kon a wi anda baka fu u be sa piisii ete wan leisi.
16 Bika mi be abi a pakisei fu kon a wi anda di mi be o de a pasi e gwa Masadoniya. Di mio komoto a Masadoniya, mio kon a wi anda baka. Bakadati mi wani u poti mi afu pasi te mio de fu gwa Yudeya.
17 Mi teke ten denki bun fosi mi taki mio du a sani ya. Te mi taki mio du wan sani, da a ná miseefi namo mi e denki. U si enke mio taki ‘iya’, da mi kengi mofu taki ‘nono’?
18 Leti enke faw sa biibi Gadu, a so u sa biibi taki den sani di we taigi wi a tuu. U naw taki ‘iya’, daw daai taki ‘nono’.
19 Mi anga Silfanus anga Timotiyesi be leli u sani fu Yesesi, a Manpikin fu Gadu. Enseefi nai taki iya, da a daai taki nono. Ma te a taki ‘iya’, ai tan ‘iya’.
20 Bika winsi san Gadu paamisi u, ala den o kon tuu anga yeepi fu Yesesi. Neen meke we taki ‘amen’ aini a nen fu Yesesi fu Gadu sa fende gaandi.
21 A Gadu salufu u. Neen paamisi u taki wi anga u a fu Kelestesi.
22 A poti a santa yeye fi en aini wi ati enke wan sitampu. A meke u sabi den belesi di wo fende aini a ten di e kon.
23 Mia kon a Korente ete bika mia wani u moo tyali. Gadu seefi sabi taki a fu a sani ya ede meke mia kon.
24 Wi a ná basi fu a biibi fu u, ma a wooko we wooko makandaa anga u fu meke u piisii. U biibi taanga, neen meke u taampu gingin.
