Du fu tu biifi gi den Korentesama 10:1-18
10 A mi Pawlesi e taki anga u ya. Gaantangi mi wani u wooko anga den sani di mi e taigi u. Leti enke fa Kelestesi be abi sakafasi anga bun manii te a be e taki anga u, a so mi e taki anga u. Son wan fu we taki te mi e sende biifi gi u da mi nai feele fu poti wi a pasi, ma te mi de aw mindii da mi swaki.
2 Mi howpu taki den sama di e si enke we du san a sondu sikin wani kengi, da mi naafu puu kaasi gi den te mi kon anda.
3 Winsi fa we tan aini a goontapu ya, tokuso u nai feti enke den sama fu a goontapu ya.
4 Bika den fetisani fu wi a ná fu a goontapu ya, ma a Gadu seefi gi u den. Den taanga te den poi booko iniiwan sani di taampu gingin.
5 We booko den falisi denki fu sama, anga iniiwan sani di sa tapu sama fu sabi Gadu. A leti enke u kisi ala den denki ya tyai go sooto, fu man yeepi sama fu aliki Kelestesi.
6 Efu we aliki Kelestesi ala yuu, u naw daaidaai fu sitaafu iniiwan sama di nai aliki en.
7 A den sani di sama ain e si namo we luku. Efu wan sama e taki: ‘Mi a fu Kelestesi.’ Da a sama ya á mu feegete taki useefi a fu Kelestesi.
8 Masaa gi wi a gaandi fu gi u taanga-sikin, ma ná fu booko u saka. Winsi mi be o gafa fu a gaandi ya, tokuso sen á be o kisi mi.
9 Mia wani u si enke a feele mi wani u feele di mi sikiifi den biifi ya gi u.
10 Bika son sama e taki: ‘Ai sikiifi gaan kofaliki biifi, ma te wi anga en de fesi a fesi daw nai fusutan en, taki seefi aa sabi taki.’
11 Den sama di e taki a sani ya mu sabi taki den sani di u sikiifi aini den biifi, a den sani de wo du te u doo ape.
12 Wa wani maiki useefi anga den sama di e gafa, wa wani de enke den tu. Bika a san den e si enke bun sani anga dati den e wooko te den e kuutu denseefi. A sani ya e soi taki den don.
13 U naw gafa fu wooko di wa du, ma wo gafa fu a wooko di Gadu gi u. A peleiki di we peleiki gi u a wan pisi fu a wooko ya.
14 Di u kon peleiki gi u, a ná san useefi wani u du, ma a san Gadu sende u. A wi a den fosi sama di paati a bun nyunsu fu Kelestesi gi u.
15 Nono, u nai meke bigi fu wooko di wa du efuso den sani di taa sama du. Ma we howpu taki a biibi fu wi anda kon moo taanga, da a wooko di u man ya du na a pisi fu u sa gwa fesi. Da a so wo poi du moo,
16 fu u sa paati a bun nyunsu a den kondee di de faawe fu wi anda. Daw naw gafa fu den sani di taa sama du na a pisi wataa fu den.
17 Gadu buku taki: ‘A sama di e gafa, meke a gafa Yehofa*.’
18 Bika a ná te wan sama e gafa enseefi da Yehofa* e fende en bun, ma a Gadu seefi e luku sama a fende bun.
A maiki
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’