Du fu tu biifi gi den Korentesama 11:1-33
11 Winsi ai gei enke a lawlaw sani mi e taki, toku mi howpu wi abi pasensi anga mi. Efu mi mu taki en kiin, da we pasensi anga mi kaba.
2 Mi e dyalusu gi u leti enke fa Gadu e dyalusu gi u. A miseefi be paamisi taki mio meke u toow anga Kelestesi, neen meke mi wani tyai u go neen enke uman di á siibi anga man ete.
3 Ma mi e feele taki sama o fende u koli leti enke fa a sineki be koli Efa. A sani ya o meke wa waka a Kelestesi baka anga u hii ati moo, u naw kiin gi Kelestesi enke fa a fiti moo.
4 Efu wan sama kon taigi u taki wan taa Kelestesi de, wo biibi en. Efu wan sama kon a wi anga wan taa yeye boiti a yeye fu Gadu, wo biibi en. Efu wan sama kon paati wan taa bun nyunsu gi u boiti a wan di we biibi kaba, wo biibi en.
5 Mia si enke den gaan kofaliki apostel fu u bun moo mi.
6 Na a taki e taanga gi mi, ma mi sabi sani. Na ala sowtu fasi u soi wi a sani ya.
7 Anga piisii mi paati a bun nyunsu fu Gadu gi u, mi ná akisi u nawan moni gi a sani ya. A wan sondu mi du di mi saka miseefi fu u be sa fende gaandi?
8 A taa kemeente mi teke den sani di mi be abi fanowdu fu mi be sa yeepi u. A leti enke mi fufuu den fu mi be sa yeepi u.
9 Di mi be de a wi anda, mia suku sani a wi di mi be fuka, bika den baala fu Masadoniya be e gi mi ala san mi be abi fanowdu. Mi ná akisi u nawan sani, mio tan meke moiti tu fu mia du a sani ya noiti.
10 Solanga mi a wan bakaman fu Kelestesi sani naw poi tapu mi fu gafa fu a sani ya aini hii Akaya.
11 Saide mia teke nawan sani aw? U si enke a lobi mia lobi u? Nono, Gadu seefi sabi taki mi lobi u.
12 Mio tan du sani enke fa mi gwenti fu den sama di wani soi taki wi anga den na a wan, naw poi gafa fu den sani di den e du.
13 Bika den sowtu man ya a falisi polofeiti. Den e du enke den na apostel fu Kelestesi, a so den e bidiigi sama.
14 A sani ya nai foondoo wi, bika na ala yuu Saatan e du enke en a wan bun engel*.
15 Neen meke a nai foondoo u taki den bakaman fi en e du enke den e du bun. Ma den o fende a pai fu den sani di den e du.
16 Mio taki a sani ya ete wan leisi: Nawan sama mu si enke mi ede nai wooko bun. Winsi we denki so seefi, toku u mu teke mi so, fu mi sa gafa pikinso tu.
17 Den sani di mi e taki nownow, a ná san Kelestesi be o taki, ma mi e gafa enke wan sama di nai koboloiki en fusutan.
18 Omen sama e gafa fu den sani fu a goontapu ya, da miseefi o gafa tu.
19 Di na u taki u koni, da fa a du kon taki u naabi toobi fu pasensi anga den sama di nai koboloiki den fusutan?
20 We pasensi anga iniiwan sama di meke u toon den saafu, sama di e koli u teke den sani fu u, sama di e teke den sani fu wi anga taanga, sama di e du enke den hei moo u, anga sama di e kalapu u.
21 Sen e kisi mi fu taki a sani ya, ma mi e taki en fu di we si enke u man ya swaki tumisi.
Ma efu sen nai kisi son sama fu gafa, da miseefi naw feele fu gafa tu, winsi a sani ya o meke son sama si mi enke wan sama di nai koboloiki en fusutan.
22 Den a Hebrewsama? Miseefi tu. Den a Islayelisama? Miseefi tu. Den a Abalaham bakapikin? Miseefi tu.
23 Den e wooko gi Kelestesi? Mio taki enke wan sama di ede nai wooko bun. A mi na a moo bun wookoman fu Kelestesi. Mi wooko moo den, den sooto mi omen leisi moo den, den fon mi omen leisi, a omen leisi mi misi fu dede.
24 A feifi leisi den Dyu wipi mi 39 leisi.
25 Dii leisi den fon mi anga tiki, wan leisi den naki mi anga siton fu kii, dii leisi mi sungu anga sipi, mi tan wan hii dei anga wan hii neti aini a ze.
26 Na ala yuu mi be e de a pasi e gwa peesi, sani be sa miti mi a den liba peesi, fufuuman be sa du ogii anga mi, sama fu mi eigi kondee anga taa kondee sama be e suku fu du ogii anga mi. A omen sani be e miti mi aini a foto, sani be sa miti mi a den faawe peesi, ogii be sa miti mi aini a ze, sama di be e du enke den aw baala be e suku fu du ogii anga mi.
27 Mi be e wooko taanga, a omen neti mia be e siibi, son yuu mi be e de anga angii, wataa be e kii mi, a omen leisi mia be e abi sani fu nyan. Koo be e kii mi, mia be e abi koosi fu wei.
28 Boiti den sani ya, dei á be e pasa di mia be e booko mi ede anga den kemeente.
29 Mi e booko mi ede anga den sama di abi yeepi fanowdu. Mi ati e boon te wan sama du sani fu meke wan taawan dyakata.
30 Efu mi mu gafa, da mio gafa fu den sani di e soi taki mi swaki.
31 Gadu, a Dda fu Masaa Yesesi, a Sama di fiti gafa ala yuu sabi taki na a tuu mi e taki.
32 Di mi be de a Damaskus, a gaanman di be e wooko gi Kownu Areitas be poti wakitiman na a doomofu fu a foto fu di a be wani kisi mi.
33 Ma den baala poti mi aini wan bakisi, neen den saka mi gwa ondoo a wan fensee fu a sikotu. A so aa fende mi kisi.
A maiki
^ Efuso ‘wan engel fu leti’.
