Du fu tu biifi gi den Korentesama 12:1-21
12 Mi abi fu gafa winsi fa a sani ya naw tyai nawan wini gi mi. Mio taki fu den fisyun di Masaa soi mi, anga den bosikopu di a gi mi.
2 Mi sabi wan bakaman fu Kelestesi di Masaa tyai gwa du fu dii hemel 14 yali pasa. Efu anga en libisama sikin a be de, dati mia sabi, a Gadu wawan sabi.
3 Eeye mi sabi wan man di Masaa be tyai go aini paladeisi. Ma efu anga en libisama sikin a be go anda, dati mia sabi, ma Gadu sabi.
4 Di a go anda, a yee wowtu di nawan sama mu taki. Nawan libisama abi a leti fu taki den wowtu ya.
5 Mio gafa a man de, ma mi naw gafa miseefi, boiti den swakifasi fu mi.
6 Bika winsi mi be o gafa seefi, mia be o du en a wan fasi di á bun, na a tuu mi be o taki. Ma mi naw gafa, bika mia wani sama gi mi gaandi fu taa sani boiti den sani di denseefi si efuso yee fu mi.
7 Den á mu du a sani ya fu di Masaa tyai omen sani kon a kiin gi mi.
Fu mia mu fii miseefi meke wan maka de aini mi sikin. A maka ya de enke wan engel fu Saatan di e naki mi naamo. A sani ya pasa fu mia mu fii miseefi.
8 A dii leisi mi begi Masaa fu a puu a maka ya gi mi.
9 Ma a taigi mi taki: ‘A bun-ati fu mi sai i kaba, bika tei swaki, da aw de kiin fu si taki a mi e gii kaakiti.’ Neen meke anga ala piisii mio gafa fu den swakifasi fu mi. A so a kaakiti fu Kelestesi o tapu mi enke wan tenti.
10 Neen meke mi e piisii te mi swaki, te sama e kosi mi, te mi de a nowtu, te sama e du ogii anga mi, efuso te a libi e taanga gi mi fu Kelestesi ede. Bika te mi swaki da Gadu e gi mi kaakiti.
11 Mi e taki enke wan sama di nai koboloiki en fusutan. Aw poti mi so, efu u be gafa mi mia be o go e taki so. Bika winsi u nai si mi fu wan sani, tokuso den gaan kofaliki apostel fu wa bun moo mi.
12 Den sani di mi du soi u taki mi a wan apostel tuutuu, bika mi holidoo winsi san be e pasa, mi du omen wonduu anga omen gaan sani.
13 A wan kodo sani di meke wi anga den taa kemeente kengi, a di mia de enke wan ibi gi u. A wan ogii mi du? Efu a wan ogii mi du, daw gi mi paadon baa.
14 Disi na a du fu dii leisi di mi wani kon luku u. Di mio kon mi naw akisi u nawan sani. Bika a ná den sani di wi abi mi wani, ma a wi mi wani si. A ná den pikin mu poti sani a wanse gi den mma anga dda, ma a den mma anga dda mu poti sani a wanse gi den pikin.
15 Fu mi wawan se mio gi ala san mi abi fu wi ede, winsi a mi libi seefi. Efu mi lobi u so, da a ná so useefi mu lobi mi noh?
16 Winsi fa mia de enke wan ibi gi u, toku we taki mi ‘bidiigi’ u te neen mi ‘fende u koli’.
17 Di mi sende sama kon aw, mia suku fu puu moni a wi ana.
18 Mi begi Titesi fu kon a wi anda, neen mi sende wan baala kon anga en. Titesi suku fu fende gudu aw? Noiti. A ná aseefi denki wi anga en abi noh? A ná aseefi fasi u tyai useefi noh?
19 Kande di we leisi a biifi ya u denki taki a feti we feti fu kiin u nen. Ma a ná dati, bika enke bakaman fu Kelestesi, we taki a tuu a Gadu fesi. Den baala anga sisa fu mi di mi lobi, ala den sani di we du a fu gi u taanga-sikin.
20 Bika mi e feele taki te mi doo anda, u naw de enke fa mi wani. Miseefi naw de enke faw wani. Mi e si enke toobi, dyalusu, anga atiboon o de aw mindii. Kande son sama o taki sani fu poli taawan nen, den o konkuu, den o abi heimembee, den o go e du sani buuyabuuya.
21 Kande te mi kon baka, a Gadu fu mio meke sen kisi mi aw fesi. Kande mio tyali fu den somen sama di sondu, bika den du tyobo sani, den libi wan hululibi, den du sen sani tu sondee fu soi taki den sani di den du e hati den.
