Du fu tu biifi gi den Korentesama 13:1-14
13 Disi na a du fu dii leisi di mi taki mio kon a wi anda. ‘Efu wan sama wani sabi efu wan toli a tuu, da tu efuso dii kotoigi de fanowdu.’
2 Winsi fa mia de anda nownow, toku a leti enke mi kon anda baka. Mi e bigin wasikoi den sama di sondu, anga ala den taawan taki efu mi kon anda, mio puu kaasi gi ala den.
3 A sani ya o soi u taki a Kelestesi sende mi. Wo si taki Kelestesi á swaki, ma ai soi a kaakiti fi en.
4 A di Yesesi be de enke wan libisama di swaki meke den be sipikii en a wan ponsu, toku nownow a de a libi anga a kaakiti fu Gadu. Useefi swaki leti enke en, ma a kaakiti fu Gadu o meke u de a libi leti enke en tu.
5 U mu e ondoosuku naamo luku efu u de a biibi. U mu e soi naamo sowtu sama a wi. Wi anga Yesesi Kelestesi a wan. Ma efu Gadu á fende u bun moo, da wi anga Kelestesi naw de wan moo.
6 Mi wani u sabi taki Gadu fende mi anga den sama dise bun.
7 We begi Gadu gi u fu wa du nawan sani di á bun. U nai du a sani ya fu di u wani sama si enke Gadu fende u bun, ma a di u wani u du san bun meke we du a sani ya, winsi taa sama e si enke Gadu á fende u bun.
8 Wa poi du nawan sani fu tapu den tuu sani di Gadu taki. A sani di u sa du a fu holibaka gi a tuu.
9 We piisii te u taanga, winsi u dati swaki. We begi fu u sa kengi a denki fu u.
10 Mi e sikiifi den sani ya gi u fosi mi kon a wi anda, da di mio kon anda mi naafu puu kaasi gi u. Bika Masaa gi mi a wooko fu gi u taanga-sikin, ma a ná fu sitaafu u.
11 Den baala fu mi, a lasiti sani di mi wani taigi u, a taki u mu e piisii ala yuu, u mu e kengi a fasi fa we denki, u mu e meke sama toosutu u, u mu e denki go na a wanse, u mu e libi bun anga useefi, da a Gadu fu lobi anga freide o de anga u.
12 Gi makandaa odi anga wan santa bosi.
13 Ala den santawan sende odi gi u.
14 Meke a bun-ati fu Masaa Yesesi Kelestesi, a lobi fu Gadu, anga a santa yeye di ala u fende de anga u.