Du fu tu biifi gi den Korentesama 2:1-17
2 Mia wani tyali kisi u di mio kon a wi anda baka.
2 Bika efu mi meke ala u tyali, da sama o poolo anga mi?
3 Mi sikiifi den sani ya gi u, bika te mio kon anda mia wani tyali fu wi ede ma mi wani piisii, bika mi sabi taki den sani di e meke mi e piisii e meke useefi piisii tu.
4 Anga gaan buduufu na ati, pen, anga wataa na ain mi sikiifi a biifi ya fu soi u taki mi lobi u tuutuu, ma a ná fu meke u tyali.
5 Wa mu fii wan fasi di mi taki so, ma efu wan sama nai tyai enseefi bun, da a ná mi wawan o tyali, ma na ala u fiya.
6 A sitaafu di gaanse fu u gi a man sai kaba.
7 Now u mu gi en paadon anga u hii ati, daw toosutu en, efuso aw kusumi te da a lasi-ati.
8 Neen meke mi e begi u gaantangi fu u soi en taki u lobi en.
9 Mi be wani luku efu na ala yuu we aliki neen meke mi sikiifi a biifi de gi u.
10 Efu u gi wan sama paadon te a du wan sani anga u, da mio gi en paadon tu. Kelestesi seefi sabi taki a fu di mi wani holibaka gi u meke mio gi a sama paadon.
11 Te we gi taawan paadon da Saatan naw wini u, bika u sabi fa ai koli sama.
12 Di mi doo Trowas fu paati a bun nyunsu fu Kelestesi, wan doo opo gi mi fu du a wooko fu Masaa.
13 Ma mi be e booko mi ede bika mia be sabi pe mi baala Titesi de. Neen meke mi bali odi ape, neen mi pasa gwa Masadoniya.
14 We gi Gadu daa, bika ala yuu ai waka aw fesi makandaa anga Kelestesi. Ai tyai wi enke suudati di wini wan feti. Ai meke u paati a wowtu fi en na ala se enke wan sani di e sumee switi.
15 Den sama di e paati a bosikopu fu Kelestesi de enke sumee switi sani gi Gadu. A switi sumee ya e doo den sama di o fende a libi anga den sama di o dede.
16 Gi den sama di o dede, aw de wan sumee di o tyai dede, ma gi den sama di o fende a libi, aw de wan sumee di o tyai libi. Ma sama fiti fu du a wooko ya?
17 A wi fiti fu du a wooko ya bika u nai meke moni anga a wowtu fu Gadu enke fa omen sama e du. A ná sama e dwengi u fu paati a bosikopu ya. Wi a bakaman fu Kelestesi di Gadu teke fu wooko gi en. Gadu e luku fa we du a wooko ya.