Du fu tu biifi gi den Korentesama 3:1-18
3 U mu taigi u baka sama a wi? U wani mi sende biifi gi u di e soi fa sama e gafa mi anga den taa baala dise? A sani de á de fanowdu.
2 A wi di de a Korente anda a den biifi fu u. U de enke biifi di sikiifi aini wi ati. Ala sama poi leisi den biifi ya.
3 Bika a de kiin fu si taki wi a wan biifi fu Kelestesi di wi enke futuboi fu Gadu sikiifi. A ná anga sikiifi tiki u sikiifi en, ma anga a yeye fu a libilibi Gadu. A ná paata siton tapu a sikiifi, ma aini sama ati.
4 Fu di Kelestesi e holibaka gi u meke we biibi taki a Gadu seefi teke u fu du a wooko ya.
5 A ná bun u bun so meke u poi du a wooko ya, ma a Gadu seefi meke u toon sama di fiti fu du a wooko ya.
6 Neen na a sama di meke u fiti fu de futuboi fu wan nyun kuudei. Wi a ná futuboi fu wan Weiti di sikiifi, ma wi a futuboi fu a yeye. Bika a Weiti di sikiifi e tyai dede gi sama, ma a yeye e meke sama fende libi.
7 A Weiti di e tyai dede gi sama be sikiifi a wan paata siton tapu. A gendee fu a Weiti ya be meke Mosesi fesi e beenki te neen den Islayelisama á be poi luku en aini en fesi, ma a gendee ya á be o tan langa.
8 Efu a Weiti gendee so, da den sani di a yeye o du naw moo bigi noh?
9 Bika efu a sani di e tyai dede gi sama gendee so, da a sani di o yeepi sama fu libi a wan letifasi o moo gendee.
10 Fu taki en kiin, aw gei enke a sani di be e beenki fosi nai beenki moo, fu di wan moo gendee wan teke en peesi.
11 Bika efu a Weiti di be sikiifi be gendee, da a sani di teke en peesi moo gendee.
12 Fu di wi abi a howpu ya, meke u nai feele fu taki.
13 U nai du a sani di Mosesi be du. Mosesi be e tapu en fesi anga wan duku, fu den Islayelisama á be mu si san be o pasa anga a Weiti di be o kon a wan kaba.
14 Ma den á be poi fusutan sani kiin moo bika te anga a dei fu tide a gei enke wan duku tapu a fusutan fu den, neen meke den nai fusutan a gaandi kuudei. A Kelestesi namo sa puu a duku ya.
15 Te anga dei fu tide a gei enke wan duku tapu den ati ete, neen meke den nai fusutan den buku fu Mosesi.
16 Ma te wan sama teke a se fu Yehofa*, da a duku ya e komoto.
17 Yehofa* a wan Yeye. Den sama di abi a yeye fu Yehofa fii.
18 Ala u di puu a duku aw fesi de enke wan sipikii di e soi a gendee fu Yehofa*. We kengi kon gei en, dei fu dei we beenki enke en. A sani ya e pasa leti enke fa Yehofa, a Yeye wani.
A maiki
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’