Du fu tu biifi gi den Korentesama 4:1-18
4 U nai gi abaa, bika na a tyali-ati fu Gadu meke a gi wi a wooko ya.
2 U fika den sen sani di sama e du kibiikibii. U nai bidiigi taawan, u nai daai a wowtu fu Gadu. Ma te we soi sama a tuu, da a kosensi fu den o piki den taki we tyai useefi bun a Gadu fesi.
3 Efu wan duku tapu a bun nyunsu di we paati, da a den sama di o dede a tapu gi.
4 A gadu fu a goontapu ya beendi a fusutan fu den sama di nai biibi Gadu, neen meke den nai si a faya fu a moin bun nyunsu di we paati. A bun nyunsu ya e taki fu Kelestesi di Gadu meke enke fa enseefi de.
5 Te we peleiki, u nai taki fu useefi, ma we leli sama taki Yesesi Kelestesi a Masaa. We leli den tu taki a fu Yesesi ede u toon den saafu.
6 Bika Gadu seefi taki: ‘Meke a faya leti aini a dunguu.’ Gadu meke a faya fi en leti aini wi ati. A faya ya e meke u sabi a gaan koni fu Gadu. A meke Kelestesi* leti a faya ya gi u.
7 U de enke tokotoko patu, ma toku u fende a gudu ya. A sani ya e soi kiin taki a kaakiti di bigi pasa maiki, a ná fu useefi, ma a fu Gadu.
8 Ala sowtu tesi e miti u, ma dati á wani taki wa poi du nawan sani moo. Son yuu u nai sabi san fu du, ma dati á wani taki nawan yeepi á de.
9 Sama e du ogii anga u, ma Gadu á gwe fika u. Den fon u towe a doti, ma wa dede.
10 Ala pe u go, sani e miti u di sa tyai dede kii wi leti enke Yesesi. A sani ya e soi kiin taki sani e miti u leti enke en.
11 Aini a libi fu u na ala yuu sani e miti u di sa tyai dede kii u fu di wi a Yesesi bakaman. Den sani ya e soi kiin taki sani e miti u leti enke fa sani be e miti Yesesi.
12 Ala yuu sani e miti u di sa tyai dede gi u, ma a sani ya o meke u fende a libi.
13 Gadu buku taki: ‘A di mi e biibi meke mi taki.’ Useefi soi taki we biibi, neen meke we taki.
14 U sabi taki a sama di meke Yesesi kon a libi baka, o meke u kon a libi baka leti enke Yesesi, da aw tyai u kon a Yesesi fesi.
15 A fu wi ede den sani ya e pasa fu moo sama sa fende a bun-ati fu Gadu, bika dei fu dei moo sama e gi Gadu daa. A so den e gafa en.
16 U nai gi abaa. Winsi a sikin fu we swaki, toku dei fu dei we fende nyun kaakiti.
17 Den tesi di e miti u ná ibi, a fu wan satu pisiten namo, ma den o meke u fende omen gaan belesi di o tan fu teego.
18 U nai poti pakisei a den sani di we si, ma we poti pakisei a den sani di wa poi si. Bika den sani di we si a fu wan pisiten namo, ma den sani di wa poi si, a fu teego.
A maiki
^ Aini Giikitongo den be taki: ‘Na a fesi fu Kelestesi e leti a faya ya.’