Du fu tu biifi gi den Korentesama 5:1-21
5 U sabi taki winsi a sikin fu wi a goontapu ya di de enke wan osu* be o booko, toku Gadu o gi u wan taa osu aini hemel di o tan fu teego. A osu ya á meke anga ana.
2 We geme aini a osu di u de nownow, neen meke we angii fu fende a osu di de a hemel di o tapu wi enke wan koosi,
3 daw naw de soso sikin moo te u wei en.
4 Fu taki en kiin, we geme aini a osu ya, bika ai tyotyo u. A ná wani u wani komoto aini a osu ya, ma na a nyun wan u wani, fu u sa fika a sikin di e dede fu fende teego libi.
5 Gadu seeka wi a fesi gi a libi ya. A gi wi a yeye fi en enke wan paamisi taki aw du san a taki.
6 We biibi taki a sani ya o pasa tuu. U sabi taki solanga u de aini a sikin di de enke wi osu, u de faawe fu Masaa ete.
7 U nai waka anga san we si, ma we waka anga biibi.
8 We biibi taki a sani ya o pasa tuu, a be o moo bun gi u fu go tan a Masaa pe fu u de aini a sikin ya.
9 Neen meke winsi we tan anga en efuso u de faawe fi en, toku we meke moiti fu a fende u bun.
10 Bika ala wo abi fu taampu a Kelestesi fesi* fu a kuutu u, da aw pai ibiiwan sama gi den bun efuso ogii di den du di den be de aini a libisama sikin.
11 Gadu sabi sama a wi, ma fu di u sabi taki u mu lesipeki Masaa meke we tan meke moiti fu yeepi taa sama fu biibi den sani di we leli. Mi howpu a kosensi fu u yeepi u fu sabi sama a wi.
12 A ná gafa u wani gafa useefi, ma u wani u sabi san we du, fu u sa piki den sama di e gafa fu den sani di taawan poi si pe fu den gafa fu den sani di de aini den ati.
13 Efu u be lasi u fusutan da a fu Gadu ede, ma efu u de anga u kiinkiin fusutan da a fu wi ede.
14 A lobi di Kelestesi lobi u e gi u taanga-sikin fu aliki en, bika u kon fusutan taki wan man dede gi ala sama, bika ala sama be dede.
15 A dede gi ala sama. Neen meke den sama di de a libi á mu e libi gi denseefi moo, ma den mu libi gi a sama di dede gi den. A sama ya kon a libi baka.
16 Fanafu tide u nai wooko moo anga san we si te we luku taawan. Efu u be e si Kelestesi enke fa libisama e si en, daw nai si en so moo.
17 Neen meke iniiwan sama di de wan anga Kelestesi, toon wan nyun sama di Gadu meke. Den gaandi sani á de moo, nyun sani kon a den peesi.
18 Ma ala den sani ya komoto a Gadu. A meke wi anga en kon bun baka anga yeepi fu Kelestesi. A gi wi a wooko fu yeepi taawan fu kon bun baka anga en.
19 We taigi sama taki den sa kon bun anga Gadu fu di a meke Kelestesi kon dede gi u. A nai pakisei den sondu fu u moo. A gi wi a wooko fu taigi den sama san den mu du fu meke en bun anga en.
20 Wi a sama di e holi peesi gi Kelestesi. Neen meke enke sama di e holi peesi gi Kelestesi, we begi u gaantangi: ‘U meke en bun anga Gadu baa.’ A Gadu seefi sende u fu u begi wi a sani ya.
21 Gadu gi Kelestesi di á be abi sondu enke wan ofaandi fu pai fu den sondu fu u. A so Gadu be sa si wi enke sama di e libi a wan letifasi anga yeepi fu Kelestesi.
A maiki
^ Aini Giikitongo den be taki: ‘tenti.’
^ Efuso ‘taampu na a kuutuman sutuu fu Kelestesi fesi’.