Du fu tu biifi gi den Korentesama 6:1-18
6 We wooko makandaa anga Gadu. We begi u tu fu wa teke a bun-ati fu Gadu daw poti en a wanse.
2 Bika Gadu taki: ‘Di a yuu fu mi doo fu soi bun-ati gii, neen mi aliki i. Di a yuu di mi be poti fu fii yu doo, neen mi yeepi i.’ A yuu doo kaba. A dei di Gadu o fii wi doo.
3 Noiti u mu du sani di o meke taawan dyakata, da sama naw taki ogii fu a wooko di we du gi Gadu.
4 Ma na ala fasi u soi taki u fiti fu wooko gi Gadu. We du a sani ya te we holidoo winsi sowtu tesi e miti u, te u de a nowtu, te a libi e taanga gi u, efuso te wi abi polobelema.
5 Te den e fon u, te den e poti wi a sitaafu-osu, te gaan kulu sama e kon fu feti anga u, te we wooko taanga, te u nai siibi a neti, te u de anga angii.
6 We libi wan kiin libi, a fasi fa we libi e soi taki u sabi Gadu, wi abi pasensi, wi abi bun manii, we meke a yeye fu Gadu tii u, a ná du we du enke u lobi taawan ma u lobi den tuutuu.
7 We taki a tuu, we fitoow a kaakiti fu Gadu, a gei enke u holi wan fetisani aini u leti-ana anga u kukutu-ana di e yeepi u fu du sani a wan letifasi.
8 Son yuu den gi u gaandi, son yuu den soso u, son yuu den kuutu u, son yuu den gafa u. Sama e si wi enke bidiigiman, ma na a tuu we taki.
9 Sama á sabi u, ma Gadu sabi u, son leisi u be e si enke wo dede ma toku u de a libi, den sitaafu u ma den á kii u.
10 Sama e si enke we tyali, ma we piisii ala yuu, den e si enke we pina, ma u meke omen sama kon gudu, den e si enke u naabi nawan sani, ma wi abi ala sani.
11 Den sama fu Korente, faw taki anga u ya a kiin taki u taki anga u, wi opo wi ati gi u.
12 We soi taki u lobi u, ma u dati nai soi taki u lobi u.
13 Neen meke mi e taki anga wi enke wi a mi pikin. Gaantangi, wi opo wi ati gi u baa.
14 Wa mu toon wan anga sama di á de a biibi, bika san letidu abi fu du anga ogii? San leti abi fu du anga dunguu?
15 San Kelestesi abi fu du anga Beliyal*? San wan sama di e biibi abi fu du anga wan sama di nai biibi?
16 San a tempel fu Gadu abi fu du anga falisi gadu? Aw na a tempel fu a libilibi Gadu, bika Gadu taki: ‘Mio de anga den, mio de a den mindii. Mio de den Gadu, da den o de mi foluku.’
17 Yehofa* taki: ‘“Komoto a den mindii, wa mu paa anga den. Ná holi a sani di á kiin moo”’, ‘“da mio teke u enke mi foluku”’.
18 Yehofa* a Moo Taanga Gadu taki: ‘“Mio de enke wan Dda gi u, da wo toon mi manpikin anga mi umanpikin.”’
A maiki
^ Disi a wan taa nen fu Didibii. Beliyal wani taki ‘Soso sani.’
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’