Du fu tu biifi gi den Korentesama 7:1-16
7 Den baala anga sisa fu mi di mi lobi, fu di Gadu paamisi u den sani ya, meke u mu kiin useefi puu ala sani di sa tyobo u sikin anga u fusutan. Meke a lesipeki di wi abi gi Gadu yeepi u fu u kon moo santa.
2 Gaantangi opo wi ati gi u baa, bika wa libi ogii anga nawan sama, wa du ogii anga nawan sama, noiti u koli wan sama fu suku wini gi useefi.
3 Fa mi e taki ya, a ná kuutu mi e kuutu u. Bika enke fa mi be taki kaba, daw lobi u winsi sai pasa.
4 Mi e taki kiin anga u. U fiti gafa, mi fende taanga-sikin*. Ná pikin piisii mi e piisii winsi fa omen sani e miti u.
5 Fu taki en kiin, di u doo a Masadoniya wa be abi losutu, bika a omen tesi be e miti u. Sama be e libi ogii anga u. Boiti dati, u be e booko wi ede anga den kemeente.
6 Ma a Gadu di e toosutu den sama di swaki meke Titesi kon gi u taanga-sikin dise.
7 A ná di a kon aw dise namo meke u fende taanga-sikin, ma a di u sabi taki useefi gi en taanga-sikin. Den sani di a taki toosutu u. A taigi u fa we angii fu si mi, fa we tyali, anga fa we booko wi ede anga mi. Di mi yee den sani ya mi moo fii bun.
8 Winsi fa a biifi fu mi meke u tyali, toku a nai hati mi taki mi sende en gi u. Biginbigin tyali be kisi mi taki mi sende a biifi ya gi u, ma nownow tyali nai kisi mi moo bika mi si taki a fu wan satu pisiten namo u tyali.
9 Nownow mi e poolo. Ná fu di u be tyali, ma mi e poolo bika a tyali di u tyali meke u daai u libi. U be tyali a wan fasi di Gadu fende bun, neen meke den sani di u taigi u á tyai ogii gi u.
10 Bika te wan sama e tyali a wan fasi di Gadu fende bun, da a sani ya e meke a kengi fu a sa fende a libi. Ma te wan sama e tyali enke fa a goontapu ya wani, da aw tyai dede gi en.
11 A omen moiti u meke fu du san bun fu di we tyali enke fa Gadu wani. U bigin libi a wan letifasi, a ogii di u be du e hati u, we lesipeki Gadu, u daai u libi, u bigin dini Gadu anga u hii ati, u seeka a sani di be pasa. Ala den sani ya e soi taki u tyai useefi bun aini a toli ya.
12 Di mi sikiifi a biifi ya gi u, mia sikiifi en gi a sama di du a ogii, efuso a sama di a libi ogii anga en. Ma mi sikiifi en fu u be sa soi a Gadu fesi taki u de kabakaba fu aliki.
13 Na a sani ya meke u fende toosutu.
Ma boiti a toosutu di u fende, ná pikin poolo u poolo fu a taanga-sikin di u gi Titesi, bika a sani ya meke a piisii.
14 Wa gi mi sen di mi gafa u gi en. Leti enke fa ala den sani di u be taigi wi a tuu, a letiso a gafa di u be gafa u gi Titesi a ná be lei.
15 Te a denki a fasi fa we teke taki anga a fasi faw lesipeki en di u bali wadaa gi en, a kon moo lobi u.
16 Mi e piisii bika ala den sani di we du, e meke mi fende taanga-sikin.
A maiki
^ Efuso ‘toosutu’.
