Du fu tu biifi gi den Korentesama 8:1-24
8 Den baala fu mi, u wani taigi u tu fa Gadu soi bun-ati gi den kemeente a Masadoniya.
2 Den be e pina fu di gaan tesi be e miti den. Ma winsi fa den be pooti, toku den be e piisii ala yuu. Den be lobi gi sama sani tu.
3 Bika den be gi san den be man. Fu taki en kiin, da den gi moo enke san den be poi seefi.
4 A denseefi be e begi u naamo fu den sa fende a gaandi fu gi wan ana fu yeepi den santawan di be de a nowtu. A ná sama be sende den.
5 Den du moo enke saw be denki seefi. A fosi sani di den du na a wooko di den wooko gi Masaa anga den hii ati. Den yeepi u leti enke fa Gadu wani.
6 Neen meke u gi Titesi taanga-sikin fu kon teke ala den sani di u gi fu holibaka gi den santawan, bika neen be bigin a wooko ya a wi anda.
7 U soi kaba taki u biibi taanga, u sabi taki, u koni, te u teke wan sani fu du we meke moiti fu du en bun, u lobi taawan leti enke faw lobi u. Leti enke fa we du ala den sani ya bun, a so u mu e gi taawan sani anga u hii ati.
8 A ná taigi mi wani taigi u saw mu du, ma a soi mi wani soi u fa den taawan e wooko taanga, mi wani si tu efu u lobi taawan anga u hii ati.
9 Bika u sabi fa Masaa Yesesi Kelestesi soi u bun-ati. Winsi fa a be gudu, toku a toon pootiman fu wi ede, fu u be sa kon gudu.
10 Mio taigi u fa mi e denki fu a toli ya. Te we du a wooko ya wo fende wini, bika a wan yali pasa di u bigin anga a wooko ya, u soi taki u be wani du en tuutuu.
11 Ma mi wani u kaba a wooko di u be bigin. Meke ala sama gi san den poi anga den hii ati enke fa den be e du na a bigin.
12 Efu wan sama e gi sani anga en hii ati, da Gadu e teke den sani ya, bika Gadu wani ala sama gi san den poi, den á mu gi san den á poi.
13 A ná wani mi wani meke a libi fu taawan makiliki, da mi e meke a taanga gi u.
14 Ma nownow wi abi tyaipi, neen meke u mu paati san wi abi anga den. Da denseefi o paati den tyaipi sani di den abi anga u tu. A so ala sama o fende san den abi fanowdu.
15 Bika Gadu buku taki: ‘A sama di abi, á be abi ipi tumisi. A sama di naabi ipi, á be e pina.’
16 We gi Gadu daa taki a poti aseefi booko-ede di wi abi gi u aini Titesi ati.
17 Bika a de kabakaba fu du a sani di u gi en taanga-sikin fu du. A ná di u sende en meke ai kon, ma a fu di enseefi be wani du a sani di wi akisi en, neen meke a teke pasi kon a wi anda.
18 U sende wan baala kon anga en tu. Den e gafa a baala ya na ala den kemeente fu a fasi fa ai paati a bun nyunsu.
19 A den kemeente poti en fu kon anga u fu a sa yeepi u paati den sani di u gi anga u hii ati. A paati di wo paati den sani ya o meke sama gafa Masaa. Aw soi tu taki u de kabakaba fu yeepi taawan.
20 A so sama naw kuutu u fu a fasi fa we paati den sani di u gi anga u hii ati.
21 Bika we ‘du ala sani anga wan kiin ati a Yehofa* anga libisama fesi’.
22 Boiti dati, we sende wan taa baala kon anga den tu. A omen leisi a soi kaba taki u sa fitoow en, ai wooko taanga. Ma nownow ai moo wooko taanga bika a sabi taki wo du san bun.
23 Efu wan sama akisi u sama a Titesi, u sa taigi en taki a mi anga en e wooko makandaa fu yeepi u. Efu den akisi u sani fu den taa baala, u sa taigi den taki den na apostel fu den kemeente. Den e gi Kelestesi gaandi.
24 Neen meke u mu soi den taki u lobi den, da den taa kemeente o si saide u be e gafa u.
A maiki
^ Luku a wowtu ‘Yehofa’ na a pisi ‘San den wowtu ya wani taki.’
