Du fu tu biifi gi den Korentesama 9:1-15
9 Aa de fu mi sikiifi taigi u taki u mu yeepi den santawan.
2 Bika mi sabi taki u de kabakaba fu yeepi taawan, neen meke mi e gafa u gi den sama fu Masadoniya. Mi taigi den taki a wan hii yali langa den sama fu Akaya e wakiti fu yeepi taawan. A fu di u de kabakaba fu yeepi taawan meke gaanse fu den sama fu Masadoniya wani du a sani ya tu.
3 Mi e sende den baala kon aw, neen meke u mu de seekaseeka leti enke fa mi taigi den, da den o si taki a ná fu soso mi gafa u.
4 Bika efu den sama fu Masadoniya kon anga mi anda neen den si taki wa de seekaseeka fu yeepi enke faw be taki, da sen o kisi wi anda bika ná pikin gafa u gafa u gi den, ma sen o kisi u dise tu.
5 Neen meke mi be fende en fanowdu fu sende den baala kon a fesi fu teke den sani di u be taki wo gi. Da te u kon anda den sani ya o de seekaseeka. A so ala sama o si taki a ná dwengi u dwengi u, ma a di useefi be wani meke u gi den sani ya anga u hii ati.
6 Ma u mu holi a pakisei taki a sama di e paandi pikinso, a pikinso nyanyan namo aw fende, ma a sama di e paandi tyaipi o fende tyaipi nyanyan.
7 Meke ibiiwan sama gi san en ati fii. Aa mu e gi da ai kuutu enke a dwengi sama e dwengi en, bika Gadu lobi sama di e gi sani anga piisii.
8 Gadu o soi bun-ati gi u, neen meke u naw mankei nawan sani. Wo abi ala san wi abi fanowdu fu du ala sowtu bun wooko.
9 (A sikiifi aini Gadu buku taki: ‘Ai gi sama sani na ala se, ai gi den pootiman sani. Ala yuu ai du sani a wan letifasi.’
10 A Gadu di e gi sama sii fu paandi anga beele fu nyan, o meke u fende den sii di u mu paandi, aw meke den kon moo ipi tu. Boiti dati, aw meke u fende tyaipi wini te we du sani a wan letifasi.)
11 Gadu belesi u na ala sowtu fasi fu u sa du bun gi taawan na ala fasi. A sani ya o meke sama gi Gadu daa.
12 Boiti taki a wooko di we du e yeepi den santawan fu fende den sani di den abi fanowdu, ai meke tyaipi sama gi Gadu daa tu.
13 A wooko di we du e meke sama gafa Gadu, bika den e si taki we du den sani di we leli sama te we paati a bun nyunsu fu Kelestesi. Den e gafa Gadu tu fu di we paati san wi abi anga den santawan, anga fu di u lobi gi taawan sani.
14 A begi di den e begi fayafaya gi u e soi taki den lobi u, bika te den luku u den e si a bun-ati di Gadu e soi sama.
15 Meke u gi Gadu daa fu a gaan kado di a gi u.
