Du fu tu biifi gi den Tesalonikasama 2:1-17
2 Den baala fu mi, te we taki fu a ten di Masaa Yesesi Kelestesi o kon, anga a kon di wo kon a wan makandaa anga en, daw wani taigi u taki,
2 wa mu meke sama buuya u. Kande den o taigi u taki a dei fu Yehofa* doo, kande den taigi u taki a Gadu seefi gi den a bosikopu ya, kande den sende biifi gi u, da den taigi u taki aw sende den biifi ya gi u.
3 Wa mu meke nawan sama fende u koli, bika fosi a dei de doo sama o daai baka gi a tuu biibi. Aw kon a kiin tu sama na a sama di e du ogii. Neen na a sama di o dede.
4 En a wan feyanti, ai poti enseefi hei moo ala sani di sama e si enke gadu. Ai sidon aini a tempel fu Gadu fu ala sama sa si en enke wan gadu.
5 Di mi be de a wi anda mi be lobi taigi u den sani ya.
6 We nownow u sabi sama e tapu a sama di e du ogii. Di a yuu fi en o doo aw kon a kiin sama neen.
7 A tuu taki a sama ya bigin du ogii kaba. Den sani di ai du á kon a kiin ete. Den o kon a kiin te a sama di e tapu pasi gi en á de moo.
8 Aw kon a kiin sama na a sama di e du ogii. Masaa Yesesi o puu en a pasi anga a kaakiti fi en mofu. Te Masaa Yesesi o kon, da a sama ya naw de moo.
9 A sama di e du ogii, o du omen gaan sani anga omen wonduu fu koli sama fu di Saatan e holibaka gi en.
10 Na ala sowtu fasi aw bidiigi den sama di o dede. Den sama ya o fende a sitaafu ya, bika den á lobi den tuu leli di be sa meke den fende a libi.
11 Neen meke Gadu fika den fu biibi falisi leli, a fika den fu den sani ya koli den.
12 Aw kuutu ala den, bika pe fu den biibi a tuu, den e piisii anga den ogii di den e du.
13 Den baala fu mi di Yehofa* lobi, wi abi fu gi Gadu daa ala yuu fu wi ede, bika fanafu a bigin neen Gadu teke u fu fii wi. A di u biibi a tuu meke a koboloiki a yeye fi en fu meke u kon santa.
14 Anga a bun nyunsu di we paati Gadu kai u, fu u sa fende gaandi leti enke u Masaa Yesesi Kelestesi.
15 Den baala fu mi, neen meke u mu taampu gingin. U mu tan wooko anga den sani di u leli wi aini den biifi di u sende gi u, anga den sani di u be leli u di wi anga u be de makandaa.
16 U Dda di de a hemel lobi u. Fu di a abi bun-ati meke a toosutu di ai gi wi e tan fu teego, a gi u wan moin howpu tu. Meke u Dda di de a hemel anga a Masaa fu u Yesesi Kelestesi toosutu u.
17 Meke den yeepi u fu taampu gingin fu u sai taki efuso du sani di bun.
A maiki
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
