Du fu tu biifi gi den Tesalonikasama 3:1-18
3 Neen meke den baala fu mi, u mu e begi gi u fu u sa paati a wowtu fu Yehofa* gawgaw na ala se, anga fu taa sama sa gafa a wowtu fi en leti enke fa useefi e gafa en.
2 U mu e begi gi u tu fu Gadu fii wi puu aini a ana fu den takuu-ati sama anga den ogii sama, bika a ná ala sama e biibi Gadu.
3 Ma Masaa e du san a paamisi ala yuu, neen meke aw gi u taanga-sikin, aw kibii u tu fu Saatan* á fende u kisi.
4 Boiti dati, enke bakaman fu Masaa we biibi taki we du den sani di we taigi u, u sabi tu taki wo du den sani ya ala yuu.
5 Meke Masaa yeepi u fu u sa lobi Gadu. Meke a yeepi u tu fu holidoo fu u sa waka a Kelestesi baka ala yuu.
6 Den baala fu mi, we taigi u aini a nen fu Masaa Yesesi Kelestesi taki efu wan baala e tyai enseefi a wan fa ná fiti fasi, efuso a nai du den sani di u leli u, da wa mu paa anga en moo.
7 U sabi saw mu du fu waka aw baka, bika wa tyai useefi a wan fa ná fiti fasi di u be de a wi anda.
8 Wa nyan sama nyanyan wan dei sondee fu pai. Ma u be e wooko taanga dei anga neti, bika wa be wani de enke wan ibi aw tapu gi u fu solugu.
9 Wi abi a leti fu akisi den sani ya, tokuso u ná akisi u den, bika u be wani u waka aw baka.
10 Di u be de anga wi anda u be e taigi wi ala yuu taki: ‘A sama di á wani wooko, á mu nyan.’
11 U yee taki son sama nai tyai denseefi bun. Den á wani wooko, ma den e mumui aini taa sama libi.
12 U wani taigi den sowtu sama ya aini a nen fu Masaa Yesesi Kelestesi taki den mu e wooko taanga, da den nyan a nyanyan di denseefi wooko fi en. Den á mu e mumui aini taa sama libi.
13 Den baala fu mi, wa mu e weli fu du bun.
14 Efu wan sama á wani wooko anga den sani di u taigi wi aini a biifi ya, daw mu maiki en. Ná paa anga en moo, da sen o kisi en.
15 Tokuso wa mu si en enke wan feyanti, ma u mu tan poti en a pasi enke u baala.
16 We begi fu a Masaa fu freide sa yeepi u fu abi freide aini ala san we du. Meke Masaa de anga wi ala yuu.
17 Mi Pawlesi e sende odi gi u. Anga mi eigi ana mi sikiifi a biifi ya. A so mi e sikiifi kaba.
18 Meke a bun-ati fu u Masaa Yesesi Kelestesi de anga ala u.
A maiki
^ Luku a wowtu ‘Yehofa’ na a pisi ‘San den wowtu ya wani taki.’
^ Aini Giikitongo den be taki: ‘a ogiiwan.’