Wan biifi gi den Efeisesama 1:1-23
1 Mi Pawlesi di Gadu poti enke wan apostel fu Yesesi Kelestesi, e sende a biifi ya gi den bakaman fu Yesesi Kelestesi* a Efeise di e du san ai taki ala yuu.
2 Meke u Dda di de a hemel anga Masaa Yesesi Kelestesi soi u bun-ati. A freide fu den mu de anga u tu.
3 Gafa a Gadu anga a Dda fu Yesesi Kelestesi. A santa yeye o meke u fende ala sowtu belesi a hemel, fu di u de wan anga Kelestesi.
4 Gadu kai u fu de wan anga Kelestesi senten fosi goontapu sete. A di u lobi en meke a kai u fu de sama di santa anga sama di naabi nawan fowtu.
5 Gadu be sete sani a fesi fu meke Yesesi yeepi u fu toon en manpikin, bika na a sani ya Gadu wani, neen e meke a piisii.
6 A so ala sama o gafa Gadu fu di a meke en Manpikin di a lobi soi gaan bun-ati gi u.
7 Na a gaan bun-ati fu Gadu meke a pai a paiman gi u anga a buulu fi en Manpikin fu u be sa fii. A so a opo pasi gi u fu u sa fende paadon fu den sondu fu u.
8 Gadu soi bun-ati gi u pasa maiki. A gi u koni anga sabi fu fusutan ala sowtu sani,
9 di a meke u kon sabi a santa kibiitoli di abi fu du anga a wani fi en. A santa kibiitoli ya e kai anga a wani fi en, anga a sani di a abi a pakisei fu du.
10 Neen meke a seeka sani fu tyai ala sani kon a Kelestesi ondoo na a kaba fu den ten di a poti. Den sani ya, a den sani di de a hemel anga den sani di de a goontapu. Eeye, ala sani o kon a Kelestesi ondoo.
11 Wi anga Kelestesi a wan, a wi anga en o fende a sani di Gadu paamisi u. Gadu be teke u senten kaba fu du san a abi a pakisei, neen na a sama di e du ala sani leti enke fa a wani.
12 Neen meke a wi, den fosiwan di biibi Kelestesi, o meke Gadu fende gafa anga gaandi.
13 Useefi biibi Kelestesi tu di u yee a tuu, dati na a bun nyunsu di e taki Gadu o fii wi. Di u biibi en, Gadu poti a santa yeye di a be paamisi u enke wan sitampu aw tapu. A Yesesi a meke du a sani ya.
14 A santa yeye de enke wan maiki di e soi taki wo fende wan gudu. A so a paiman di Gadu pai o fii a foluku fi en, da den o gafa en.
15 Mi yee fa we biibi Masaa Yesesi anga fa we soi ala den santawan taki u lobi den. Neen meke
16 mi e tan gi Gadu daa naamo fu wi ede. Ala yuu mi e begi gi u
17 fu a Gadu fu u Masaa Yesesi Kelestesi, a Dda di abi ala gaandi sa gi u koni. Mi e begi tu fu a meke u fusutan den sani di ai tyai kon a kiin fu u sa kon sabi en bun.
18 Gadu opo wi ati fu u sabi a howpu di a gi u anga den foondoo sani di a paamisi den santawan,
19 anga fa ai koboloiki a gaan kaakiti fi en aini wi di e biibi. A gaan kaakiti ya de kiin fu si te u luku den sani di ai du.
20 Na a kaakiti ya a koboloiki fu meke Kelestesi kon a libi baka. Neen a meke a sidon neen leti-ana a hemel.
21 A poti en hei moo ala den tiimakiti, den makiti, den kaakiti, den edeman fu kondee, anga sama di abi hei posisi, den du fu a ten ya, anga den du fu a ten di e kon.
22 Boiti dati, a poti ala sani neen ondoo, neen a poti en enke edeman fu ala sani aini a kemeente.
23 A kemeente ya na a sikin fu Kelestesi di abi den manii fi en. A Kelestesi e meke ala sani de enke fa den mu de.
A maiki
^ Efuso ‘den santawan’.