Wan biifi gi den Efeisesama 2:1-22
2 Den fowtu anga den sondu fu u be meke u de enke dedesama, ma Gadu meke u kon a libi baka.
2 Fosi, u be de enke den sama fu a goontapu ya, u be e du sani enke fa a tiiman fu a goontapu ya wani. Neen e tii a yeye* fu a goontapu ya. Den sama di nai aliki Gadu abi a yeye ya. Leti enke fa winta de na ala se, a so a yeye ya de na ala se.
3 Fosi, u be e tyai useefi enke den sama ya. U be e du sani enke faw sikin anga u fusutan wani. Fanafu di u meke neen we du sani di e meke Gadu ati boon, leti enke fa ala taa sama e meke en ati boon.
4 Ma ná pikin tyali-ati Gadu abi anga u. Ná pikin lobi a lobi u tu,
5 neen meke a meke u kon a libi, neen a meke u toon wan anga Kelestesi winsi fa sondu be meke u de enke dedesama. Na a bun-ati fu Gadu meke u fii.
6 Boiti dati, Gadu meke u kon a libi baka, neen a gi u wan peesi a hemel, fu di wi anga Kelestesi Yesesi toon wan.
7 Gadu du a sani ya fu a sa soi u bun-ati pasa maiki aini a nyun goontapu, te aw du bun gi den sama di toon wan anga Kelestesi Yesesi.
8 Na a bun-ati di a soi wi meke u fii fu di we biibi. A naw seefi meke a sani ya pasa, ma a wan kado di Gadu gi u.
9 A ná den sani di u du meke u fii, neen meke nawan sama á mu meke bigi fu a sani ya.
10 A Gadu meke u. A meke u fu u toon wan anga Kelestesi Yesesi fu u sa du bun. Gadu be taki a fesi kaba san a den bun sani di u be o du.
11 Wa mu feegete taki wi a taa kondee sama. Den sama di libisama besnei* e kai u sama di á besnei.
12 A pisiten de wa be sabi Kelestesi. Wi a be taa kondee sama aini Islayeli di á be de aini a kuudei fu a paamisi di Gadu be meke. U be de aini a goontapu sondee howpu, wa be sabi Gadu tu.
13 Ma nownow wi a bakaman fu Kelestesi. Fosi, u be de faawe fu Gadu, ma a buulu fu Kelestesi meke u poi go koosube neen.
14 Kelestesi meke wi abi freide, neen na a sama di meke den tu kulu toon wan. Boiti dati, a booko a sikotu di be paati den.
15 Di a kon dede gi u, a puu a hii Weiti fu Mosesi. A den Weiti ya be meke den tu kulu toon feyanti. A sani di a du ya meke den tu kulu toon wan anga en, den e libi na a wan tu.
16 Boiti dati, di a dede na a pina ponsu, a meke den tu kulu kon bun anga Gadu. A so a meke den tu kulu toon wan.
17 A kon paati a bun nyunsu fu freide gi den sama di á be sabi Gadu anga den sama di be sabi en kaba.
18 Na a dede di a dede gi u, meke ala u di de aini den tu kulu poi taki anga u Dda di de a hemel iniiwan yuu di u wani. Bika na aseefi yeye ala u fende.
19 Nownow wi a ná taa kondee sama moo, ma wi anga den sama di santa a fu a wan kondee. Ala u de aini a osufamii fu Gadu.
20 U meke na a fondamenti fu den apostel anga den polofeiti. Kelestesi na a moo pelensipali siton fu a fondamenti ya.
21 A hii osu anga ala den pisi fi en na a wan. A fu di a osu ya anga Kelestesi toon wan, meke a toon wan santa tempel gi Yehofa*.
22 A fu di wi anga Kelestesi toon wan, meke useefi kon de enke wan peesi pe a yeye fu Gadu sa tan.
A maiki
^ Efuso ‘a denki’.
^ Dati a te den be e koti a fesise buba fu a senpeesi fu wan mannengee puu.
^ Luku a wowtu ‘Yehofa’ na a pisi ‘San den wowtu ya wani taki.’
