Wan biifi gi den Efeisesama 3:1-21
3 Mi Pawlesi de a sitaafu-osu fu Kelestesi Yesesi ede, anga fu di mi e yeepi wi enke taa kondee sama.
2 U yee taki Gadu gi mi a wooko fu yeepi u fu fende a bun-ati fi en.
3 Leti enke fa mi be sikiifi piki wi a fesi kaba, da Gadu tyai a santa kibiitoli fi en kon a kiin gi mi.
4 Neen meke te we leisi a biifi ya wo fusutan taki mi sabi a santa kibiitoli di e taki fu Kelestesi.
5 Den sama fu fosi á be sabi a kibiitoli ya enke fa a yeye tyai en kon a kiin nownow gi den santa apostel anga den polofeiti.
6 A santa kibiitoli ya na a fende di den taa kondee sama di toon wan anga Kelestesi o fende den gudu di aw fende, da den o toon wan pisi fu aseefi sikin. Fu di den e biibi a bun nyunsu meke a denseefi sani di Gadu paamisi u den o fende.
7 Na a bun-ati fu Gadu meke mi toon wan futuboi fu a santa kibiitoli ya. A Gadu gi mi a kado ya fu soi mi a kaakiti fi en.
8 Anga ala fa mi na a moo lagi wan fu ala den santawan, tokuso Gadu soi mi bun-ati fu mi sa paati a bun nyunsu di e taki fu den belesi di wo fende fu Kelestesi ede. Den belesi ya bigi te wa poi maiki den anga nawan sani.
9 Mi fende a wooko fu yeepi sama fu si fa a Gadu di meke ala sani tyai a santa kibiitoli fi en kon a kiin. A omen ten Gadu be kibii a santa kibiitoli ya.
10 A sani ya pasa fu Gadu be sa koboloiki a kemeente fu meke den tiiman, anga den tiimakiti a hemel si fa ai soi a koni fi en a omen sowtu fasi.
11 A du ala den sani ya enke fa a be abi a pakisei senten. Den sani ya abi fu du anga Kelestesi Yesesi a Masaa fu u.
12 Neen e yeepi u fu wa feele te we taki anga Gadu. A di we biibi Kelestesi meke u poi taki anga Gadu iniiwan yuu di u wani.
13 Neen meke mi e begi u fu wa lasi-ati te tesi e miti mi fu wi ede. Bika den tesi di e miti mio meke u fende gaandi.
14 A fu a sani ya ede mi e sutu kini a doti gi a Dda.
15 Neen na a Sama di meke ala famii a hemel anga goontapu*.
16 Mi e begi Gadu, a Sama di abi ala gaandi fu a sa taanga u anga a kaakiti fu a yeye fi en.
17 Mi e begi Gadu fu Kelestesi sa de aini wi ati. Mi e begi en tu fu a yeepi u fu u sa lobi taawan. A mu yeepi u tu fu u sa de enke wan bon di taampu gingin fu di den lutu fi en beli dipi.
18 A so wi anga ala den santawan o fusutan finifini san na a baala, a langa, a hei anga a dipi fu den sani fu Gadu.
19 Boiti dati, wo sabi san na a lobi fu Kelestesi di bigi moo sabi. Na a sani ya o meke u fende ala den manii di Gadu e gi sama.
20 A Gadu na a sama di e meke a kaakiti fi en wooko aini u. Neen meke a man du moo enke san we begi en efuso san we denki.
21 Neen fiti fu fende gaandi fu teego anga yeepi fu a kemeente anga Kelestesi Yesesi. Amen.
A maiki
^ Aini Giikitongo den be taki: ‘neen gi ala famii a nen fu den.’