Wan biifi gi den Efeisesama 4:1-32
4 Mi Pawlesi di de a sitaafu-osu fu Masaa ede, e begi u fu libi a wan fasi di fiti sama di Gadu kai.
2 Ala yuu u mu abi sakafasi anga safu-ati. U mu e pasensi anga taawan, u mu abi boo anga den, u mu e soi taki u lobi den.
3 A yeye tyai u kon na a wan. U mu e du ala saw poi fu tan libi na a wan enke fa a santa yeye e yeepi u fu du.
4 A wan sikin de, a wan yeye de tu, leti enke fa Gadu kai u fu abi wan howpu.
5 A wan Masaa de, a wan biibi de, a wan dopu de,
6 a wan Gadu de, neen na a Dda fu ala sama, a hei moo ala u, ai wooko anga ala u, a kaakiti fi en e wooko a omen fasi.
7 Gadu soi bun-ati gi ibiiwan fu u. We si a sani ya kiin na a fasi fa Kelestesi paati son kado gi u.
8 Gadu buku taki: ‘Di a opo gwa tapu, a tyai sama gwe enke katiboman. A poti sama aini a kemeente di abi a koni fu du son sani.’
9 Ma san den wowtu ‘a opo gwa tapu’ wani taki? Dati wani taki a be saka kon a goontapu.
10 Na aseefi sama di be saka kon a goontapu, opo gwa tapu baka. Di a gwe, a hei moo ala den hemel* fu a be sa meke ala sani kon tuu.
11 A poti son wan fu den enke apostel, son wan enke polofeiti, son wan enke peleikiman fu a bun nyunsu, taawan enke sikapuman anga leliman.
12 A du a sani ya fu poti den santawan a pasi fu den sa yeepi taawan, anga fu gi a kemeente efuso a sikin fu Kelestesi taanga-sikin.
13 Den o du a sani ya te enke ala u toon wan aini a biibi, u mu sabi a Manpikin fu Gadu bun tu. A so wo toon gaansama di abi denseefi manii fu Kelestesi.
14 Wa mu de enke pikinnengee moo, bika a sama di e biibi den lei toli fu den sama di e koli taawan de enke wan boto aini ze di winta e tyai gwa pe a wani.
15 Ma u mu e taki a tuu ala yuu. Lobi mu yeepi u fu gwa fesi na ala sowtu fasi fu u sa de enke Kelestesi, a edeman fu u.
16 A Kelestesi meke a hii sikin kon a wan. Ala den pisi fu a sikin e wooko makandaa fu a sikin sa fende san a abi fanowdu. Lobi o meke a sikin moo taanga te ibiiwan pisi e du san a mu du.
17 Neen meke mi e begi wi aini a nen fu Masaa taki, wa mu e tyai useefi moo enke den taa kondee sama, bika a den soso sani di den e pakisei den e du.
18 Den de aini dunguu*, den naw fende a libi di Gadu paamisi tu, bika den á wani sabi Gadu, den ati taanga.
19 Den á sabi moo san bun anga san á bun. Giili e kisi den fu du ala sowtu tyobo sani sondee sen.
20 Ma u sabi taki Kelestesi á de so.
21 Efu den sani di u yee efuso leli e kai anga san Yesesi be e leli sama, daw be o sabi a sani ya.
22 Neen meke u mu fika den manii di u be abi fosi, wa mu e du den sani di u be e du fosi moo. Bika a fasi faw be de fosi á be bun, u be e meke den fii fu u koli u.
23 U mu e meke moiti ala yuu fu kengi a denki fu u.
24 Leti enke faw be o kengi wei wan nyun koosi, a so u mu kengi teke den manii di Gadu wani wi abi. A so wo toon sama di Gadu e si enke leti-ati sama, di e du san a taki ala yuu.
25 Nownow u nai lei moo. Neen meke te we taki anga useefi u mu e taki a tuu, bika ala wi a fu a wan sikin.
26 Wi ati sa boon, ma wa mu sondu. Wa mu meke a san saka da wi ati de boonboon ete.
27 Wa mu gi Didibii pasi fu meke u du sani di á bun.
28 A sama di e fufuu, á mu fufuu moo, ma a mu wooko taanga. Meke a du bun wooko anga en ana, fu a sa yeepi den sama di de a nowtu.
29 Poli taki á mu e komoto aini u mofu, ma a soso bun sani u mu e taki. Da den sama di e aliki u, o yee sani di e gi den taanga-sikin.
30 Ná meke a yeye fu Gadu tyali. Na a yeye ya de aw tapu enke wan sitampu te enke a dei doo di a paiman o fii wi.
31 Wa mu e buuse taawan, wa mu abi takuu atiboon, wa mu e ligei, wa mu e kosi efuso du iniiwan sani di e hati taawan.
32 U mu e libi bun anga useefi, u mu e fii gi taawan, u mu e gi useefi paadon anga u hii ati enke fa Gadu e gi u paadon fu di Kelestesi dede gi u.
A maiki
^ Dati wani taki a hei moo ala den taa sani di Gadu meke a hemel.
^ Aini Giikitongo den be taki: ‘den fusutan de aini dunguu.’
