Wan biifi gi den Efeisesama 5:1-33
5 Wi a pikin di Gadu lobi, neen meke u mu e waka neen baka.
2 U mu tan lobi makandaa leti enke fa Kelestesi lobi u. A kon dede gi u. A gi en libi enke wan sumee switi ofaandi gi Gadu.
3 Wa mu e gi toli fu hululibi efuso fu iniiwan taa sowtu tyobo libi. Wa mu e gi toli di e soi taki wi abi takuu giili. Den sani ya á fiti sama di santa.
4 Wa mu e du sen sani, wa mu e taki soso taki, wa mu e gi tyobo lafu toli, bika den sani ya á bun, ma a Gadu u mu e gi daa.
5 Bika u sabi bunbun taki sama di e libi wan hululibi, sama di e libi wan tyobo libi anga sama di abi takuu giili, naw go aini a Kownukondee fu Kelestesi anga Gadu. Takuu giili na aseefi enke a dini di sama e dini falisi Gadu.
6 Ná meke nawan sama fende u koli anga soso taki, bika u sabi taki a den sani ya meke Gadu o sitaafu den sama di nai du san a taki.
7 Wa mu paa anga den sowtu sama ya.
8 Fosi, u be de aini dunguu, ma nownow u de aini a kiin, bika wi a fu Masaa. U mu e tyai useefi ala yuu enke sama di de aini a kiin.
9 Wan sama di de aini a kiin e du ala sowtu bun sani, ai libi a wan letifasi, ai du san bun ala yuu.
10 U mu e meke moiti ala yuu fu sabi san bun gi Masaa.
11 U mu tapu anga den soso sani di sama e du aini dunguu. U mu e soi kiin taki den sani ya á bun.
12 Bika den kibii sani di den e du, a gaan sen sani di wa poi taki fu den seefi.
13 Ala sani di e kon a kiin, a sani di a leti e tyai kon a kiin. Ala sani di e kon a kiin e toon leti.
14 Neen meke Gadu taigi den sama di e siibi taki: ‘Den sama di e siibi, u weki. Wi opo komoto a dede kondee, da Kelestesi o gi wi a leti fi en.’
15 Neen meke u mu luku bun fa we libi. Wa mu tyai useefi enke don sama, ma u mu e libi enke sama di koni.
16 U mu koboloiki u ten bun, bika we libi aini wan ten di ogii.
17 Neen meke wa mu e du sani sondee u denki, ma u mu e meke moiti fu fusutan san Yehofa* wani u du.
18 Wa mu e diingi sopi te daw duungu, bika a sani ya sa meke u du sani di á bun. Ma u mu tan meke moiti fu abi a yeye fu Gadu ala yuu.
19 U mu e koboloiki Psalm* te we taki anga useefi, u mu e gafa Gadu, meke u singi singi di e soi taki we gafa Gadu. Singi gi Yehofa* aini wi ati tu.
20 Boiti dati, na ala yuu u mu e gi u Dda di de a hemel daa fu ala sani aini a nen fu Masaa Yesesi Kelestesi.
21 U mu e saka useefi a taawan ondoo fu di wi abi lesipeki gi Kelestesi.
22 Den uman mu e saka denseefi a den man ondoo, leti enke fa den e saka denseefi a Masaa* ondoo.
23 Bika na a man na a ede fu a uman, leti enke fa Kelestesi na a ede fu a kemeente. A kemeente na a sikin fu Kelestesi di a fii.
24 Leti enke fa a kemeente e saka enseefi a Kelestesi ondoo, a so wan uman mu e saka enseefi neen man ondoo aini ala sani.
25 Wan man mu tan lobi en uman leti enke fa Kelestesi lobi a kemeente. Kelestesi be lobi a kemeente te neen a dede gi en.
26 A du a sani ya fu a be sa meke a kemeente kon santa. A kiin mi en anga a wowtu fu Gadu, leti enke fa sama e wasi wan sani anga wataa.
27 A sani ya be o meke a kemeente kon moin gi en, aa be o abi nawan maiki efuso kaabu. Ma a be o toon wan sani di santa efuso wan sani di naabi nawan fowtu.
28 A letiso wan man mu lobi en uman enke fa a lobi enseefi. Wan man di lobi en uman lobi enseefi.
29 Nawan sama e buuse en eigi sikin. Ma ai kibii en da ai solugu en leti enke fa Kelestesi e du anga a kemeente.
30 A fu di wi a wan pisi fu a sikin fi en, meke ai du a sani ya.
31 ‘Neen meke wan man o gwe fika en mma anga en dda. Aw tan anga en uman, da den tu man o toon wan sikin.’
32 A pelensipali santa kibiitoli di mi e taki ya, abi fu du anga Kelestesi anga a kemeente.
33 Ma winsi fa, ibiiwan fu u mu lobi en uman enke fa a lobi enseefi. Na a taase, wan uman mu e lesipeki en man anga en hii ati.
A maiki
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Psalm’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Efuso ‘Yesesi’.