Wan biifi gi den Efeisesama 6:1-24
6 Den pikin, u mu aliki u mma anga u dda enke fa Gadu wani, bika a dati bun gi en.
2 ‘Lesipeki i mma anga i dda.’ Disi na a fosi weiti di Gadu gi wi anga a paamisi ya. A be taki:
3 ‘Te ye du a sani ya da sani o go bun anga i, yo libi langa a goontapu tu.’
4 Den dda, wa mu e fooseli den pikin fu u, ma u mu kiya den anga den weiti anga den leli fu Yehofa*.
5 Den saafu, u mu e saka useefi aw masaa ondoo. U mu e lesipeki den anga u hii ati, leti enke fa we lesipeki Kelestesi.
6 A ná te taa sama e si u wawan u mu du a sani ya efuso fu di u wani den gafa u. Ma u mu e du en fu di wi a saafu fu Kelestesi di e du san Gadu taki anga u hii ati.
7 Te we wooko gi u masaa, u mu e wooko enke a Yehofa* seefi we wooko gi, wa mu du en enke a libisama we du en gi.
8 Bika u sabi taki Yehofa* o pai ala sama fu den bun di den du, winsi a wan saafu efuso wan sama di fii.
9 Den masaa, useefi mu e libi bun anga den saafu fu u, wa mu e du efuso taki sani fu meke den feele, bika u sabi taki na aseefi Masaa wi anga den abi a hemel. Aa lobi a wan sama moo a taawan.
10 A sani di mi wani taigi wi ete a disi, meke moiti ala yuu fu fende a kaakiti fu Masaa, bika ná pikin kaakiti a abi.
11 U mu wei ala den sani di Gadu gi u fu feti, da wo poi taampu gingin te Saatan e du sani fu meke u dyakata.
12 Bika a ná anga libisama we feti, ma we feti anga den fesiman, den edeman, anga den tiiman fu a dunguu goontapu ya, dati a den takuu yeye di de a hemel.
13 Neen meke u mu teke ala den sani di Gadu gi u fu feti, fu u sa de seekaseeka te a feyanti o kon feti anga u*. A so wo man taampu gingin, bika u du ala den sani di u be mu du.
14 U mu taampu gingin. A tuu mu de enke wan lelibuba di banti aw mindii. U mu wei letidu enke wan sani fu kibii u boofu-ati.
15 U mu de kabakaba fu paati a bun nyunsu fu freide. A sani ya mu de enke wan susu aw futu.
16 Boiti den sani ya, u biibi mu de enke wan gaan schild*. Neen o yeepi u fu kii a faya fu den ga di a ogiiwan e sutu kon aw tapu.
17 Boiti dati, u mu e pakisei fa Gadu o fii wi. A sani ya mu de enke wan suudati-ati a wi ede. U mu teke a fetihow di a yeye gi u tu. Dati na a wowtu fu Gadu.
18 U mu e begi na ala sowtu fasi, u mu meke a yeye tii wi daw begi fayafaya a ibii okasi. Fu man du a sani ya u mu de na ain ala yuu, u mu e begi fayafaya gi den santawan tu.
19 U mu e begi gi mi fu mia feele te mi opo mi mofu fu paati a santa kibiitoli fu a bun nyunsu. U mu begi gi mi tu fu mi sa sabi san mi mu taki.
20 Mi a wan bosikopuman fu Gadu di e paati a bun nyunsu ya, neen meke den bui mi anga keti. U mu begi gi mi fu mia feele te mi e paati a bun nyunsu enke fa mi mu paati en.
21 U lobi baala Tikikus, a wan baala di e wooko taanga gi Masaa. Aw taigi u ala sani fu u sa sabi fa ai go anga mi.
22 Mi e sende en kon aw fu u sa sabi fa ai go anga u dise. Mi e sende en kon fu a toosutu wi anda tu.
23 Meke den baala fende a freide, a lobi, anga a biibi di u Dda di de a hemel, anga Masaa Yesesi Kelestesi e gi sama.
24 Meke Gadu soi bun-ati gi ala den sama di lobi Masaa Yesesi Kelestesi anga den hii ati.
A maiki
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Aini Giikitongo den be taki: ‘te a feyanti o kon feti anga u na a ogii dei.’
^ Wan sani di den suudati be e koboloiki fu kibii denseefi aini feti.