Wan biifi gi den Filipisama 1:1-30
1 Mi Pawlesi anga Timotiyesi, di de saafu fu Kelestesi Yesesi e sende a biifi ya gi ala den santawan aini Filipi di de wan anga Kelestesi Yesesi. We sende a biifi ya tu gi den owluman anga den dinali aini a kemeente.
2 Meke a bun-ati anga a freide fu u Dda di de a hemel anga Masaa Yesesi Kelestesi de anga u.
3 Mi e gi mi Gadu daa ala yuu te mi e pakisei u.
4 Ala yuu te mi e begi fayafaya gi u, mi e du a sani ya anga ala piisii.
5 Na a fasi fa we holibaka gi a bun nyunsu meke mi e du a sani ya. Fanafu a fosi dei di u yee en, neen we holibaka gi en, we paati den sani di u yee anga taawan.
6 Mi sabi taki a sama di bigin a bun wooko ya aw mindii, o go doo anga en te enke a kaba en na a dei fu Kelestesi Yesesi.
7 A bun taki mi e pakisei so fu u, bika u de aini mi ati. A mi anga u Gadu e soi bun-ati gi. U holibaka gi mi a sitaafu-osu, di mi be e feti fu u fende a leti fu paati a bun nyunsu anga di mi be e meke moiti fu lanti á tapu a wooko ya.
8 Bika Gadu sabi fa mi e angii fu si u. Mi lobi u leti enke fa Kelestesi lobi u.
9 Mi e begi ala yuu fu a lobi fu u sa kon moo taanga. Mi e begi fu u sa kon sabi den tuu toli fu Gadu finifini, fu u sa fusutan kiin san Gadu wani.
10 Mi e begi Gadu gi u fu a yeepi u fu u sa kon sabi san a den moo pelensipali sani. Da sama naw fende nawan fowtu aw, u naw meke taawan dyakata te enke a dei fu Kelestesi doo.
11 Mi e begi gi u tu fu u sa fende wini fu ala den bun wooko di Yesesi Kelestesi e yeepi u fu du. Den sani ya e meke Gadu fende gafa anga gaandi.
12 Den baala fu mi, mi wani u sabi taki den sani di miti mi yeepi mi fu paati a bun nyunsu moo enke fa mi be e paati en kaba.
13 Ala den wakitiman fu Gaankownu anga omen taa sama sabi taki mi de a sitaafu-osu enke wan bakaman fu Kelestesi.
14 Nownow gaanse fu den baala di e wooko gi Masaa biibi kon moo taanga fu di mi de a sitaafu-osu. Den kon moo abi deki-ati fu paati a wowtu fu Gadu, den nai feele fu paati a wowtu.
15 Son sama a dyalusu anga sitee libi e meke den e paati a bun nyunsu di e taki fu Kelestesi. Ma taawan e du a sani ya anga wan kiin ati.
16 Den sama di e taki fu Kelestesi anga wan kiin ati e du a sani ya fu di den lobi Gadu anga taa sama. Bika den sabi taki Gadu gi mi a wooko fu paati a bun nyunsu.
17 Ma den taa sama e du a sani ya fu di den e suku wini gi denseefi, den nai du en anga wan kiin ati. Den e du a sani ya tu fu di den wani moo sani miti mi a sitaafu-osu.
18 San na a bakapisi? Winsi den e du a sani ya anga wan kiin ati, efuso e suku wini gi denseefi, tokuso sama e yee a bosikopu fu Kelestesi. A sani ya e meke mi piisii. Mio piisii ala yuu,
19 bika mi sabi taki a den fayafaya begi fu u, anga a santa yeye di Yesesi Kelestesi gi wo meke mi fii.
20 Mi e howpu anga mi hii ati taki nawan sani o meke sen kisi mi. Fu di mi nai feele fu taki, meke Kelestesi o fende gaandi fu mi ede leti enke fa a be e fende gaandi kaba. A sani ya o pasa winsi mi dede efuso mi de a libi.
21 Bika efu mi de a libi, da a Kelestesi mi e libi gi. Ma efu mi dede, mio moo fende wini fu dati.
22 Efu mi mu libi go doo aini a sikin ya, da a sani ya wani taki mi sa go doo anga a bun wooko fu mi. Ma mi naw taki on di mi wani.
23 Mia sabi on di fu den mi mu teke. Mi wani komoto aini a sikin ya fu mi sa de makandaa anga Kelestesi, bika dati moo bun.
24 Ma aw moo bun gi u efu mi tan aini a libisama sikin ya.
25 Fu di mi sabi a sani ya meke mio tan anga u fu u sa gwa fesi, anga fu u sa piisii fu a biibi fu u ede.
26 Te mio de makandaa anga u baka, wo moo piisii fu di wi a bakaman fu Kelestesi Yesesi.
27 Ma u mu e tyai useefi a wan fasi di fiti a bun nyunsu fu Kelestesi. Da winsi mi de anga wi anda efuso mia de anda, tokuso mi sa yee den bun sani di we du. Mio yee taki u taampu gingin, we libi na a wan, we denki go na a wanse, we wooko makandaa fu yeepi moo sama fu biibi a bun nyunsu.
28 Nawan sani di den feyanti fu we du mu meke u feele tu. A sani ya o de enke wan maiki gi den taki den o dede, ma gi u dati a sani ya wani taki wo fii. A Gadu seefi meke u sabi a sani ya.
29 Bika wa fende a gaandi fu biibi Kelestesi namo, ma u fende a gaandi tu fu nyan pina fi en ede.
30 A den seefi sani di be e miti mi, e miti u tu. Leti enke faw sabi da a den seefi sani ya e miti mi ete te anga a dei fu tide.
