Wan biifi gi den Filipisama 2:1-30
2 U mu e meke moiti fu gi taawan taanga-sikin enke Kelesten, u mu e toosutu den fu di u lobi den, u mu e soi taki we fii gi den, u mu e soi taki wi abi tyali-ati gi den tu.
2 Efu we du den sani ya wo meke mi piisii tuutuu. U mu e libi na a wan, u mu lobi useefi, u mu e denki go na a wanse ala yuu tu.
3 Wa mu e sitee anga useefi. Wa mu e fii useefi, ma u mu abi sakafasi. U mu e si taawan pelensipali moo u.
4 Wa mu e suku wini gi useefi namo, ma u mu e booko wi ede anga taawan.
5 Tan abi aseefi denki di Kelestesi Yesesi abi.
6 Winsi fa a be de enke Gadu, tokuso noiti a kon neen pakisei fu puubei fu kon de enke Gadu.
7 Ma a fika ala san a be abi, neen a kon de enke wan saafu. A toon wan libisama.
8 Boiti dati, di a toon wan libisama a be abi sakafasi. A aliki Gadu te enke a dede na a pina ponsu.
9 Neen meke Gadu hei en moo enke fa a be de kaba, neen a gi en wan nen di hei moo ala taa nen.
10 A so den wan di de a hemel, den sama a goontapu ya anga den wan di de a ondoo doti* sa gi a nen fu Yesesi gaandi.
11 A so ala den o taki na ala sama fesi taki Yesesi Kelestesi a Masaa. A sani ya o meke Gadu fende gaandi.
12 Den baala anga sisa fu mi di mi lobi, ala yuu we aliki Gadu. A ná te mi de anga u wawan we aliki, ma we aliki tu te mia de anda. Fu taki en kiin we moo aliki te mia de anda. Neen meke mi wani taigi u taki u mu tan du ala saw poi fu u sa fende a libi anga ala feele anga dansi sikin.
13 Bika a Gadu e gi u kaakiti, neen e gi wi a fii anga a kaakiti fu du sani enke fa a wani. A di a wani meke ai du a sani ya.
14 Winsi san we du wa mu e kuutukuutu efuso e hali e go e hali kon.
15 Da wo de pikin fu Gadu di naabi nawan fowtu, wo de sama di e du sani anga wan kiin ati. Efu wi a sama di naabi nawan fowtu, wo de enke wan faya di e kiin peesi winsi faw de aini wan goontapu anga soso sondu sama.
16 U mu tan holi a wowtu fu Gadu di e gi libi gingin, da mio piisii te a dei fu Kelestesi doo, fu di mi sabi taki a moiti di mi meke, anga a wooko di mi wooko taanga á be de fu soso.
17 Winsi den be o kandi mi towe enke wan diingi ofaandi na a altari* fu di mi abi wan ana aini a santa wooko, tokuso mi e piisii tuutuu anga u. Bika na a biibi fu u meke u du den sani ya.
18 A letiso useefi mu e piisii anga mi tu.
19 Ma efu Masaa Yesesi wani, mio sende Timotiyesi kon aw dyonson, fu mi sa fende taanga-sikin te mi yee fa ai go anga u.
20 Mi naabi nawan taa sama di de enke en di o yeepi wi anga den sani di wi abi fanowdu tuutuu.
21 Bika ala den taawan e suku wini gi denseefi, den nai suku fu kon sabi san Yesesi Kelestesi wani.
22 Ma Timotiyesi soi taki aa de so. Leti enke fa wan dda anga en pikin e wooko makandaa, a letiso a wooko makandaa anga mi fu paati a bun nyunsu.
23 Neen meke mi wani sende en kon a wi anda, baka di mio yee saw pasa anga mi.
24 Mi sabi taki Masaa Yesesi o gi mi a okasi fu kon aw dyonson.
25 Ma nownow mi abi fu sende mi baala Epafroditus kon aw. A be e wooko makandaa anga mi, enseefi a wan suudati fu Kelestesi tu. U be sende en kon a mi fu yeepi mi anga den sani di mi abi fanowdu.
26 Ná pikin angii ai angii fu si u. Ai booko en ede bika a sabi taki u yee anda taki a be siki.
27 A be siki te pikin moo a dede. Ma Gadu soi tyali-ati gi en. A soi tyali-ati gi mi tu fu mia be mu kusumi fu taa sani boiti den somen booko-ede di mi be abi kaba.
28 Mi e sende en kon aw wantenwanten fu u sa piisii baka te u si en, da mi naafu booko mi ede so moo.
29 U mu bali wadaa gi en enke faw gwenti bali wadaa gi den bakaman fu Masaa. Ala yuu u mu e soi taki u lobi den sowtu baala ya.
30 Bika di ai du a wooko fu Kelestesi pikinmoo a dede. Den sani di a be e du fu yeepi mi be sa tyai dede gi en, bika wa be de ya fu yeepi mi.
A maiki
^ Dati a den sama di o kon a libi baka.
^ Luku a wowtu ‘altari’ na a pisi ‘San den wowtu ya wani taki.’