Wan biifi gi den Filipisama 3:1-21
3 Neen meke den baala fu mi, u mu e piisii ala yuu fu di wi a bakaman fu Masaa. Mi nai weli fu sikiifi denseefi sani gi u ala yuu. A fu a bun fu wi ede meke mi e taigi u den sani ya.
2 U mu luku bun anga den sama di e tyai denseefi enke dagu. Luku bun anga den sama di e du ogii anga taawan, anga den sama di wani taawan besnei* namonamo.
3 A wi a den sama di besnei* tuutuu. A yeye fu Gadu e yeepi u fu du santa wooko. We gafa fu den sani di Kelestesi Yesesi du. U nai fitoow den sani fu libisama.
4 A omen sani de di be sa meke mi fitoow den sani fu libisama.
Ma efu wan sama denki taki a sa fitoow den sani ya, da mi sa gafa moo a sama de,
5 bika mi besnei* na a du fu aitin dei. Mi a wan Islayelisama fu a lo fu Benyamin. Mi a wan Hebrewsama, mma anga nda seefi a Hebrewsama. Tei luku a fasi fa mi be e holi a Weiti, da mi a be wan Faliseiman.
6 Nawan sani á be poi tapu mi fu du ogii anga a kemeente. Mi be e libi enke wan sama di naabi nawan fowtu, fu di mi be e du sani pilisisi enke fa a Weiti e taki.
7 Den sani di mi be e si enke e tyai wini gi mi, a den sani de mi e si enke soso sani nownow enke bakaman fu Kelestesi.
8 Mi e si ala den sani ya enke soso sani te mi maiki den anga den sani di mi kon sabi fu Kelestesi Yesesi, a Masaa fu mi. A fi en ede meke mi fika ala den sani ya. Mi e si den sani ya enke soso sani fu di mi wani Kelestesi fende mi bun,
9 anga fu di mi wani de wan anga en. A ná fu di mi e du sani enke fa a Weiti e taki meke mi e si miseefi enke wan sama di e libi a wan letifasi. Ma a fu di mi e biibi Kelestesi meke mi e libi a wan letifasi. Fu taki en kiin, Gadu e si den sama di e biibi Kelestesi enke sama di e libi a wan letifasi.
10 Mi wani sabi Kelestesi anga a kaakiti di meke a kon a libi baka. Mi wani nyan pina leti enke en, mi de kabakaba fu dede enke en tu,
11 fu mi sa fende a okasi fu de wan fu den fosi sama di o kon a libi baka.
12 Mia fende a sani ya ete, mia toon wan sama di naabi sondu ete tu. Ma mi e du ala san mi poi fu doo pe mi mu doo, bika mi sabi taki na a sani ya Kelestesi Yesesi wani, neen meke a teke mi.
13 Den baala fu mi, mi nai si enke mi fende a pai kaba. Ma wan sani mi sabi, a taki mi feegete den sani di mi fika a baka, mi e tan meke moiti fu fende den sani di de a mi fesi.
14 Mi e meke moiti fu mi sa fende a pai fu Gadu. Dati na a libi a hemel di a meke Kelestesi Yesesi kai mi fu fende.
15 Neen meke ala u di biibi taanga mu abi aseefi denki ya. Ma efu u nai denki na a fasi ya, da Gadu o yeepi u fu u sa abi a denki ya.
16 Winsi we gwa fesi kaba, u mu tan meke moiti fu gwa fesi na aseefi fasi.
17 Den baala fu mi, ala u mu meke moiti fu waka a mi baka, daw poti pakisei a den sama di e libi enke faw be soi u.
18 A omen sama de nownow di nai si a dede di Kelestesi dede na a pina ponsu fu wan sani. Mi be lobi taki fu den kaba, ma now a kee mi e kee te mi e taki fu den sama ya.
19 Den sama ya o dede, a den bee a den gadu. Den e meke bigi fu den sen sani di den e du. A soso den sani fu a goontapu ya den e pakisei.
20 Ma a peesi pe wo tan a hemel. We wakiti a sama di o fii wi, dati a Masaa Yesesi Kelestesi di de a hemel.
21 Aw koboloiki a gaan kaakiti fi en di a fende fu tii ala sani, da aw kengi a sikin fu u di swaki kon enke a gendee wan fi en.
A maiki
^ Dati a te den be e koti a fesise buba fu a senpeesi fu wan mannengee puu.
^ Dati a te den be e koti a fesise buba fu a senpeesi fu wan mannengee puu.
^ Dati a te den be e koti a fesise buba fu a senpeesi fu wan mannengee puu.
