Wan biifi gi den Filipisama 4:1-23
4 Den baala fu mi di mi lobi, mi angii fu si u. A we meke mi piisii, u de enke wan kownu-ati gi mi. Mi wani taigi u taki u mu taampu gingin enke bakaman fu Masaa.
2 Mi wani taigi Eyodiya anga Sentike taki den mu e denki go na a wanse te den e wooko gi Masaa.
3 Enke wan sama di e wooko makandaa anga mi, mi wani begi i tu fu yeepi den uman ya. A mi anga den uman ya, Klemens, anga den taawan be e wooko taanga fu paati a bun nyunsu. Ala den sama ya nen sikiifi aini a buku fu libi tu.
4 U mu e piisii ala yuu fu Masaa ede. Mio taki en ete wan leisi: U mu e piisii!
5 Meke ala sama si taki wa de namonamo fu du saw wani. Masaa de anga u*.
6 Wa mu e booko wi ede anga nawan sani, ma u mu e begi Gadu ala yuu daw taigi en ala sani. U mu e begi en fayafaya daw gi en daa.
7 Efu u du a sani ya wo fende a freide fu Gadu di libisama á poi fusutan. A freide ya o kibii wi ati anga u denki fu di wi a bakaman fu Kelestesi Yesesi.
8 Den baala fu mi, a lasiti sani di mi wani taigi u na a sani ya: Tan poti pakisei na ala sani di tuu, ala sani di pelensipali, ala sani di bun, ala sani di kiin, ala sani di e meke sama soi lobi, ala sani di sama e taki bun fi en, ala sani di fiti anga ala sani di sama e gafa.
9 Du ala den sani di mi leli u, anga den sani di we biibi. U mu du den sani di u be yee mi taki, anga den sani di u be si mi e du, da a Gadu fu freide o de anga u.
10 Mi e piisii tuutuu. Mi e gi Masaa daa di u soi baka taki we booko wi ede anga mi. Mi be sabi kaba taki we booko wi ede anga mi, a di na wa be fende a okasi ete fu soi a sani ya.
11 A ná di mi fuka meke mi e taki a sani ya, bika mi leli taki winsi sai miti mi, mi mu tifeedi ala yuu.
12 Mi sabi san a wani taki fu abi pikinso, anga san a wani taki fu abi tyaipi. Aini ala den sani di miti mi, mi leli san a wani taki fu abi sani fu nyan, anga san a wani taki fu de anga angii. Mi sabi san a wani taki fu abi tyaipi sani, anga san a wani taki fu naabi nawan sani.
13 Mi poi du ala sani, bika na a sama di e gi mi kaakiti e yeepi mi.
14 Tokuso ai bigi gi mi taki u yeepi mi di sani be e miti mi.
15 Den baala fu Filipi, useefi sabi taki di u yee a bun nyunsu fu a fosi leisi, aw na a wan kodo kemeente di holibaka gi mi di mi komoto a Masadoniya.
16 Bika di mi be de a Tesalonika, a tu leisi u sende den sani di mi be abi fanowdu kon gi mi.
17 A ná wani mi wani u sende sani gi mi so, ma a wani mi wani Gadu belesi u fu den bun sani di we du.
18 Mi abi ala san mi abi fanowdu, mi abi moo enke dati seefi. Baka di Epafroditus gi mi den sani di u sende gi mi, mi nai mankei nawan sani moo. Den sani di u sende gi mi de enke wan sumee switi ofaandi di e meke Gadu piisii.
19 Neen meke a Gadu fu mi di abi ala sani o meke Kelestesi Yesesi gi wi ala san wi abi fanowdu.
20 Meke u Dda di de a hemel fende gaandi fu teego. Amen.
21 Gi ala den santawan di de wan anga Kelestesi Yesesi odi gi mi. Den baala di de ya anga mi e sende odi gi u tu.
22 Ala den santawan sende odi gi u, moomoo den wan di e tan aini a osu fu Gaankownu.
23 Meke a bun-ati fu Masaa Yesesi Kelestesi de anga u fu di wi abi bun manii.
A maiki
^ Aini Giikitongo den be taki: ‘Masaa de koosube.’