Wan biifi gi den Galasiyasama 1:1-24
1 Mi Pawlesi a wan apostel. A ná libisama poti mi enke apostel, ma a Yesesi Kelestesi anga u Dda di de a hemel di weki Yesesi puu a dede, poti mi enke apostel.
2 Mi anga den baala di de ya e sende a biifi ya gi den kemeente fu Galasiya.
3 Meke u Dda di de a hemel anga Masaa Yesesi Kelestesi soi u bun-ati. A freide fu den mu de anga u tu.
4 Kelestesi dede gi u fu fii wi fu sondu. A du a sani ya fu a be sa fii wi puu aini a ogii goontapu ya leti enke faw Dda di de a hemel wani.
5 U mu gi Gadu gaandi fu teego. Amen.
6 Ai foondoo mi taki u fika Gadu di kai wi anga a bun-ati fu Kelestesi, neen u daai teke wan taa sowtu bosikopu enke bun nyunsu.
7 A ná taki taa bun nyunsu de. Ma fu di son sama wani buuya u, meke den e daai a bun nyunsu fu Kelestesi poti enke fa den wani.
8 Ma winsi a wan fu u ya seefi efuso wan engel fu hemel be o tyai wan taa bosikopu gi u enke bun nyunsu, da fuuku mu kon na a sama de tapu.
9 U be taigi u a sani ya kaba, ma mio taigi u en baka. Efu wan sama tyai wan taa bosikopu gi u enke bun nyunsu boiti a wan di u be biibi kaba, da fuuku mu kon na a sama de tapu.
10 Mi nai suku fu libisama gafa mi, a Gadu mu gafa mi. Efu mi be e du sani fu libisama gafa mi, da mia be o de wan saafu fu Kelestesi.
11 Den baala fu mi, mi wani u sabi taki a bun nyunsu di mi paati anga u, a ná libisama a komoto.
12 A ná libisama gi mi a bosikopu ya. A ná wan sama leli mi en tu. Ma a Yesesi Kelestesi tyai en kon a kiin gi mi.
13 Leti enke faw sabi da di mi be de aini a Dyu biibi, mi be e du omen ogii anga a kemeente fu Gadu. Mi be wani puu a kemeente a pasi.
14 Mi be e gwa fesi aini a Dyu biibi moo den taa Dyu supee fu mi, bika mi be e holi den gwenti fu den gaansama fu mi moo den.
15 Ma a Gadu di meke mi de a libi, soi mi bun-ati di a kai mi.
16 A gi mi a wooko fu paati a bun nyunsu gi den taa kondee sama, fu den sa kon sabi en Manpikin. Di a du a sani de mia go wantenwanten a libisama go suku yeepi.
17 Mia gwa Yelusalem a den taawan di be toon apostel fosi mi. Ma mi go na Arabiya, bakadati mi daai gwa Damaskus baka.
18 Baka dii yali mi go luku Seifas* a Yelusalem, neen mi tan anga en 15 dei.
19 Di mi go anda a wan kodo apostel di mi si, a Yakowbesi, a baala fu Masaa.
20 Gadu seefi sabi taki den sani di mi e sikiifi gi u, a ná lei.
21 Bakadati mi go na a pisi wataa fu Siriya anga Silisiya.
22 Ma den kemeente fu Kelestesi a Yudeya á be sabi mi.
23 A wan enkii sani di den be e yee na: ‘Nownow a man di be e du ogii anga u, e paati a bun nyunsu fu a biibi di a be wani puu a pasi.’
24 A so den bigin gafa Gadu fu mi ede.
A maiki
^ Seifas a wan taa nen fu Peitilisi.
