Wan biifi gi den Galasiyasama 2:1-21
2 Baka 14 yali mi anga Barnabas gwa Yelusalem baka. Mi be tyai Titesi tu.
2 A di Masaa soi mi taki mi mu gwa Yelusalem meke mi go anda. Di mi doo anda mi gwa den baala di e teke fesi, neen mi taigi den a bun nyunsu di mi e paati gi den taa kondee sama. Mi du a sani ya, bika mia be wani a wooko di mi e du gi Masaa de fu soso.
3 Winsi fa Titesi di be kon anga mi a be wan Giikisama, toku nawan sama dwengi en fu besnei*.
4 A den sama di e du enke den a baala be kon anga a taki. Den sama ya kon suwii-suwii aini a kemeente. Bika den sabi taki di u toon wan anga Kelestesi a sani ya meke u fii, neen meke den be wani u toon saafu fu a Weiti baka.
5 Ma wa du san den man ya be wani, noiti u saka useefi a den ondoo. A sani ya yeepi u fu wa fika den tuu leli di u kon sabi di u yee a bun nyunsu.
6 Winsi fa a gei enke den man ya pelensipali, toku den á taigi mi nawan sani di mia be sabi ete. Mi naabi toobi fa den man ya de, bika Gadu nai si sama enke fa libisama e si den.
7 Ma den man ya kon si taki mi be fende a wooko fu paati a bun nyunsu gi den sama di á besnei*, leti enke fa Peitilisi be fende a wooko fu paati a bun nyunsu gi den sama di besnei.
8 Bika a Gadu gi Peitilisi a wooko fu de enke wan apostel gi den sama di besnei*. A Gadu gi mi a wooko tu fu de wan apostel gi den taa kondee sama.
9 Di den fusutan fa Gadu soi bun-ati gi mi neen Yakowbesi, Seifas anga Yohanisi taigi mi anga Barnabas taki u sa peleiki gi den taa kondee sama, da den o peleiki gi den sama di besnei*. Den man ya be de enke den ahala fu a kemeente.
10 A wan kodo sani di den taigi u fu du, a fu membee den pootiman. Neen meke mi meke ala moiti fu du a sani ya.
11 Ma di Seifas kon na Antiokiya, mi soi en kiin taki aa tyai enseefi bun.
12 Bika fosi, a be e nyan diingi anga den taa kondee sama, ma di den man di Yakowbesi be sende doo, Seifas á be wani paa anga den taa kondee sama moo, bika a be e feele den sama di besnei*.
13 Den taa Dyu bigin waka neen baka. Barnabas seefi be bigin waka neen baka.
14 Ma di mi si taki den nai tyai denseefi enke fa den tuu leli fu a bun nyunsu e taki, neen mi taigi Seifas na ala sama fesi taki: ‘Winsi fa ya wan Dyu, toku ye tyai iseefi enke taa kondee sama, i nai wooko anga den gwenti fu den Dyu. Da saide i wani dwengi den taa kondee sama fu wooko anga den gwenti fu den Dyu?’
15 Wi a Dyu, wa de enke den taa kondee sama di e du sondu.
16 U sabi taki wan sama nai toon wan leti-ati sama fu di ai du san a Weiti e taki, ma a te ai biibi Yesesi Kelestesi. We biibi Yesesi Kelestesi fu Gadu sa si wi enke sama di e libi a wan letifasi, ma a ná fu di we du san a Weiti e taki. Bika a ná te wan sama e du san a Weiti e taki da Gadu e si en enke wan sama di e libi a wan letifasi.
17 Efu wi a sondu sama di e meke moiti fu Gadu si wi enke sama di e libi a wan letifasi, da a sani ya wani taki Kelestesi e gi u taanga-sikin fu sondu? Nono.
18 Efu a den sani di mi be booko aini a ten di pasa mi e daai e meke baka, da mi e soi taki mi nai du san a Weiti e taki.
19 Fu di mi du san a Weiti e taki, meke mi fii fu a Weiti* fu mi be sa libi gi Gadu.
20 Den sipikii mi a wan ponsu makandaa anga Kelestesi. Mi nai libi gi miseefi moo, ma a Kelestesi mi e libi gi, bika mi anga en toon wan. A libi di mi e libi nownow, a fu di mi e biibi a Manpikin fu Gadu di lobi mi. A dede gi mi tu.
21 Mi nai wai a bun-ati fu Gadu poti a wanse. Efu a te wan sama e du san a weiti e taki fosi Gadu e si en enke wan sama di e libi a wan letifasi, da a fu soso Kelestesi dede.
A maiki
^ Dati a te den be e koti a fesise buba fu a senpeesi fu wan mannengee puu.
^ Dati a te den be e koti a fesise buba fu a senpeesi fu wan mannengee puu.
^ Dati a te den be e koti a fesise buba fu a senpeesi fu wan mannengee puu.
^ Dati a te den be e koti a fesise buba fu a senpeesi fu wan mannengee puu.
^ Dati a te den be e koti a fesise buba fu a senpeesi fu wan mannengee puu.
^ Aini Giikitongo den be taki: ‘Fu di mi du san a Weiti e taki meke mi dede te a abi fu du anga a Weiti.’