Wan biifi gi den Galasiyasama 3:1-29
-
Den sama di e du san a Weiti e taki anga den sama di e biibi (1-14)
-
Den sama di e libi a wan letifasi o fende libi fu di den e biibi (11)
-
-
A ná te wan sama e wooko anga a Weiti fosi, da aw fende a sani di Gadu be paamisi Abalaham (15-18)
-
Kelestesi na a bakapikin fu Abalaham (16)
-
-
Saide Gadu be gi wi a Weiti? (19-25)
-
Den toon Gadu manpikin fu di den e biibi (26-29)
-
Den bakaman fu Kelestesi a Abalaham bakapikin (29)
-
3 Den sama fu Galasiya, saide u nai koboloiki u fusutan? Sama fende u koli so? U yee finifini fa sama be sipikii Yesesi Kelestesi a wan ponsu.
2 A wan enkii sani di mi wani akisi u, a disi: A di u du san a weiti e taki efuso a di u biibi den sani di u yee meke u fende a santa yeye?
3 Saide meke u nai koboloiki u fusutan? Biginbigin u be e du den sani di a yeye wani, ma bakaten u bigin du san a sondu sikin fu u wani.
4 A sosokaali u nyan omen pina? Mia denki a be fu soso.
5 Saide a sama di meke u fende a santa yeye efuso di e du wonduu aw mindii e du den sani ya? U si enke a fu di we du san a Weiti e taki efuso a fu di we biibi den sani di u yee?
6 Denki a toli fu Abalaham, ‘a be e biibi Yehofa*, neen meke a be e si en enke wan sama di e libi a wan letifasi’.
7 U sabi taki a den sama di e biibi, a den manpikin fu Abalaham*.
8 Gadu buku be taki a fesi taki Gadu be o si den taa kondee sama enke sama di e libi a wan letifasi fu di den e biibi en. A be taigi Abalaham a bun nyunsu ya senten. A be taigi en taki: ‘A yo meke ala den foluku fende belesi.’
9 Neen meke a den sama di e biibi Gadu leti enke Abalaham e fende belesi.
10 Fuuku o kon na ala den sama tapu di e du san a weiti taki, bika Gadu buku taki: ‘Heelu fu den sama di nai du san sikiifi aini a Buku fu a Weiti ala yuu.’
11 Boiti dati, a de kiin fu si taki a ná te wan sama e du san a Weiti e taki da Gadu e si en enke wan sama di e libi a wan letifasi, bika Gadu buku taki: ‘A sama di e libi a wan letifasi o tan a libi fu di ai biibi.’
12 Wan sama naabi fu e biibi fu man holi a Weiti, ma a sikiifi taki ‘a sama di e du san sikiifi aini a Weiti o tan a libi’.
13 Kelestesi bai u, fu puu a fuuku fu a Weiti aw tapu. A so a teke a fuuku fu u neen tapu. Bika a sikiifi aini Gadu buku taki: ‘Fuuku de na a sama tapu di den sipikii a wan ponsu.’
14 A sani ya pasa fu Yesesi be sa yeepi den foluku fu fende a belesi fu Abalaham. A sani ya pasa tu fu u sa fende a yeye di Gadu paamisi u fu di we biibi.
15 Den baala fu mi, mio gi u wan ageisitoli di sama sabi. Te wan kuudei meke, winsi a wan kuudei di sama meke, taa sama á poi taki a kuudei ya nai teli. Den á poi poti nawan sani aini a kuudei ya tu.
16 Gadu be meke wan kuudei anga Abalaham anga en bakapikin. Gadu buku nai taki ‘den bakapikin fii’ enke a omen sama ai taki, ma ai taki ‘i bakapikin’ dati a wan kodo sama namo, a sama de a Kelestesi.
17 Boiti dati mio taki a sani ya: Baka 430 yali neen Gadu gi a foluku fi en a Weiti. Ma a sani ya á wani taki a kuudei di a be meke á be e teli moo. Gadu be o du a sani di a be paamisi.
18 Bika efu a te we wooko anga a Weiti fosi wo fende a gudu di Gadu taki aw gi u, da a ná a sani di Gadu be paamisi meke wo fende en. Ma u sabi taki a fu di Gadu be paamisi Abalaham a sani ya, meke a be gi en a gudu ya anga en hii ati.
19 Da saide a Weiti be mu de? Gadu gi wi a Weiti fu meke u sabi san a sondu, te enke a bakapikin di be o fende san Gadu paamisi doo. Gadu meke engel gi Mosesi a Weiti, neen Mosesi gi a foluku a Weiti.
20 Taa sama á de fanowdu te wan sama namo paamisi wan sani. A so a de anga a sani di Gadu paamisi Abalaham, neen wawan paamisi Abalaham a sani ya.
21 Da a sani ya wani taki a Weiti nai kai anga den sani di Gadu paamisi? Nono. Bika efu libisama be fende wan weiti di be poi meke sama fende libi, da Gadu be o si den enke sama di e libi a wan letifasi fu di den e du san a weiti de e taki.
22 Ma Gadu buku soi taki ala sama toon saafu fu sondu. A so den sama di e biibi sa fende den bun sani di Gadu paamisi taki aw gi den sama di e biibi Yesesi Kelestesi.
23 Ma fosi u bigin biibi Kelestesi, a Weiti be poti wi a sitaafu, a be de enke wakitiman gi u. U be e wakiti a sani di Gadu be o tyai kon a kiin gi u.
24 A Weiti be de enke wan sama* di e tyai u gwa Kelestesi, fu u sa toon sama di e libi a wan letifasi fu di we biibi.
25 Ma now di we biibi Yesesi, aa de fu a Weiti tii u moo.
26 Fu taki en kiin, ala wi a Gadu manpikin fu di we biibi Yesesi Kelestesi.
27 Bika di ala u dopu, u toon wan anga Kelestesi neen u teke den manii fi en.
28 Winsi wan sama a wan Dyu, Giikisama, saafu, wan sama di fii, wan mannengee, efuso wan umansama, toku ala wi a wan fu di wi a bakaman fu Kelestesi Yesesi.
29 Boiti dati, efu wi a bakaman fu Kelestesi, da wi a Abalaham bakapikin. A wo fende a sani di Gadu be paamisi Abalaham.
A maiki
^ Luku a wowtu ‘Yehofa’ na a pisi ‘San den wowtu ya wani taki.’
^ Efuso ‘Abalaham pikin’.
^ A Giiki wowtu di be koboloiki ya e soi gwa wan sama di e kibii pikinnengee fu ogii á miti den.