Wan biifi gi den Galasiyasama 4:1-31
4 Efu a pikin di o fende den gudu yonkuu ete, da winsi fa ala den gudu a fi en, toku a naabi makiti moo a saafu di e luku a osu
2 solanga a yuu di en dda poti á doo. Bika a sama e solugu en, a sama e luku a osu fi en tu.
3 A letiso a de anga u tu. Di u be yonkuu u be e denki enke den sama fu a goontapu ya, u be e tyai useefi enke den tu.
4 Ma di a yuu di Gadu be poti doo, a sende en Manpikin kon di wan umansama meke. A Pikin ya be e holi a Weiti
5 fu a be sa bai den sama di be e holi a Weiti, fu Gadu be sa teke wi enke en manpikin.
6 Fu di wi a Gadu manpikin, meke a poti a yeye fi en Manpikin aini wi ati. A yeye ya e meke we taki ‘Abba*’.
7 Dati wani taki yu a ná wan saafu moo, ma yu a Gadu manpikin. Efi yu a Gadu manpikin da aw gii den gudu di den pikin fi en mu fende.
8 Di wa be sabi Gadu, wi a be saafu fu falisi gadu.
9 Ma now u sabi Gadu, fu taki en kiin, Gadu sabi u. Da saide u wani daai gwa den soso sani fu a goontapu ya baka? Saide u wani toon saafu fu den sani ya baka?
10 We si enke son dei, mun, yali, efuso son pisiten fu a yali moo pelensipali, neen meke we fii fesa a den dei ya.
11 Mi e booko mi ede, bika mi e si enke a sosokaali mi lasi mi ten anga u.
12 Den baala fu mi, fosi mi be de enke u, ma mi kengi. Neen meke mi e begi u fu useefi sa kengi leti enke mi. Di mi be kon a wi anda wa libi ogii anga mi.
13 U sabi taki a di mi be siki meke mi be fende a okasi fu paati a bun nyunsu gi u fu a fosi leisi.
14 Winsi fa a siki fu mi be de enke wan ibi gi u tokuso wa libi ogii anga mi, tyobo á kisi u gi mi, ma u bali wadaa gi mi enke mi a Yesesi Kelestesi efuso wan engel fu Gadu.
15 Fosi u be e piisii. Saide u nai piisii moo? Mi sabi taki efu u be poi, u be o tokoo wi ain puu gi mi.
16 A di mi e taigi wi a tuu meke mi toon u feyanti?
17 Den e du ala san den poi fu hali u go na a se fu den, ma den naabi bun fu wi a pakisei. A di den wani u waka a den baka meke den wani poli mi anga u.
18 Efu wan sama e wooko taanga fu hali u kon neen se, da a ná wan ogii ai du efu na a bun fu wi ai feti, ma a ná te mi de anga u wawan a mu e du a sani ya.
19 Den pikin fu mi di mi lobi, a fu wi ede mi fii a pen baka di wan mma e fii te a de fu meke wan pikin. A pen ya naw gwe te enke u kon abi den manii fu Kelestesi.
20 Mi winsi taki mi be sa de anda anga u nownow, mi howpu taki mi be sa taki taa fasi anga u tu, bika mia sabi fa fu du anga u moo.
21 U taki u wani holi a Weiti, neen wa sabi san a Weiti e taki?
22 A sikiifi aini a wowtu fu Gadu taki Abalaham be abi tu manpikin. A meke wan fu den anga wan umansaafu, neen a meke a taawan anga wan uman di fii.
23 A pikin di a meke anga a umansaafu be meke enke fa ala taa pikin e meke. Ma a pikin di a meke anga a uman di fii meke leti enke fa Gadu be paamisi en.
24 Den sani ya de enke wan ageisitoli. U sa si den tu uman ya enke tu kuudei. Hagar de enke a kuudei di meke na a Sinai mongo. Den pikin fi en a saafu.
25 Hagar de enke Sinai, wan mongo di de na Arabiya. A de enke a Yelusalem fu a ten ya tu, bika Yelusalem anga den pikin fi en de a katibo.
26 Ma a Yelusalem fu hemel á de a katibo, neen aw mma.
27 A sikiifi aini a wowtu fu Gadu taki: ‘Den uman di á poi meke pikin mu poolo. Den uman di á sabi a pen fu meke pikin mu bali piisii, bika a uman di a man towe meke tyaipi pikin moo a uman di abi a man.’
28 We baala, useefi a pikin fu a kuudei leti enke Isaki.
29 Leti enke fa a pikin di á be meke a wan foondoo fasi be bigin fooseli a pikin di be meke anga a kaakiti fu a yeye, a letiso sani e pasa aini a ten ya.
30 Ma san Gadu buku taki? A taki: ‘Sende a saafu anga en boi gwe, bika a boi fu a umansaafu naw fende den gudu di a boi fu a uman di fii o fende.’
31 Den baala fu mi, wi a ná pikin fu wan umansaafu, ma wi a pikin fu a uman di fii.
A maiki
^ Abba a wan Hebrew efuso Arameisi wowtu di wani taki ‘Nda’.