Wan biifi gi den Galasiyasama 6:1-18
6 Den baala fu mi, efu wan sama meke wan fowtu sondee fu a sabi, da a wi di biibi moo taanga mu meke moiti fu yeepi a sama ya. U mu du a sani ya anga ala sakafasi. Ma u mu luku bun fu tesi á miti u tu.
2 Yeepi taawan te den fuka, a so we soi taki we wooko anga a weiti fu Kelestesi.
3 Efu wan sama e fii enseefi, sondee fu a de wan sani, da a koli ai koli enseefi.
4 Meke iniiwan sama ondoosuku den sani di ai du, da a sani ya o meke a piisii anga den sani di a poi du. Aa mu maiki enseefi anga taawan.
5 Ala sama o tyai en eigi faantiwowtu.
6 Boiti dati, efu wan sama e leli wan taawan a wowtu fu Gadu, da a sama di ai leli, mu paati ala den bun di a abi anga en.
7 Ná koli iseefi. Gadu nai meke sama holi en a sipowtu, bika a san wan sama paandi a dati aw koti.
8 Efu wan sama e paandi anga sondu a pakisei, a sani ya o tyai dede gi en bika ai du san a sondu sikin wani. Ma a sama di e paandi anga a yeye a pakisei, o fende teego libi bika ai du san a yeye wani.
9 Wa mu weli fu du bun, bika di a yuu o doo wo si den wini efu wa gi abaa.
10 Neen meke solanga wi abi a okasi u mu du bun gi ala sama, moomoo den sama di wi anga den de na aseefi biibi.
11 Anga mi eigi ana mi sikiifi a biifi ya gi u, u luku fa den wowtu bigi.
12 A den sama di wani taawan gafa den wani dwengi u fu besnei*, bika den á wani sama pina den fu di den e waka a Kelestesi baka, a sama di dede na a pina ponsu.
13 Den sama di e besnei* seefi nai holi a Weiti, ma den wani u besnei fu den sa gafa taki a den meke u besnei.
14 Mi dati á wani gafa fu nawan taa sani boiti fu a dede di Masaa Yesesi Kelestesi dede na a pina ponsu. Mi e si a goontapu enke wan sani di dede. Goontapu seefi e si mi enke wan dedesani.
15 A naabi toobi efu wan sama besnei*. A sani di e teli na a nyun sama di Gadu meke a toon.
16 Meke Gadu soi tyali-ati gi ala den sama di e wooko anga a sani ya, den sama ya na a Islayeli fu Gadu, meke a gi den a freide fi en tu.
17 Nawan sama á mu fooseli mi moo, bika mi abi boon maiki a mi sikin di e soi taki mi a wan saafu fu Yesesi.
18 Den baala fu mi, meke a bun-ati fu Masaa Yesesi Kelestesi de anga u fu di wi abi bun manii. Amen.
A maiki
^ Dati a te den be e koti a fesise buba fu a senpeesi fu wan mannengee puu.
^ Dati a te den be e koti a fesise buba fu a senpeesi fu wan mannengee puu.
^ Dati a te den be e koti a fesise buba fu a senpeesi fu wan mannengee puu.
