Wan biifi gi den Kolosesama 1:1-29
1 Mi Pawlesi di Gadu teke fu toon wan apostel fu Kelestesi Yesesi, anga u baala Timotiyesi e sende a biifi ya
2 gi den santawan fu Kolose di de wan anga Kelestesi. Den aw baala di e waka a Kelestesi baka ala yuu:
Meke a bun-ati anga a freide fu u Dda di de a hemel de anga u.
3 Ala yuu te we begi gi u, we gi Gadu, a Dda fu u Masaa Yesesi Kelestesi daa,
4 bika u yee fa we soi taki we biibi Yesesi Kelestesi. U yee tu fa we soi taki u lobi den santawan.
5 Na a howpu di wi abi meke wo fende den sani di Gadu seeka gi wi a hemel. U yee fu a howpu ya di sama paati den tuu leli fu a bun nyunsu gi u.
6 A bosikopu fu a bun nyunsu e gwa fesi, ai paati na ala se fu goontapu. A letiso a bun nyunsu ya e gwa fesi na a se fu wi anda fanafu a dei di u yee en, anga di u kon sabi a bun-ati di Gadu e soi sama.
7 Aw baala Epafras leli u den sani ya. En a wan bakaman fu Kelestesi di e aliki en ala yuu. Ai du a wooko di u be o du efu u be de a wi anda.
8 A taigi u tu fa a santa yeye yeepi u fu soi taki u lobi taawan.
9 Neen meke fanafu di u yee den sani ya, wa tapu fu begi gi u. We begi Gadu fu a yeye fi en gi u koni anga fu a yeepi u fu kon fusutan sani moo bun. We begi en tu fu a yeepi u fu kon sabi finifini san na a wani fi en.
10 We begi tu fu u sa tyai useefi a wan fasi di e soi taki we dini Yehofa*. Da aw piisii anga u fu di we du ala sowtu bun wooko anga fu di we kon sabi Gadu moo bun.
11 We begi fu Gadu koboloiki a gaan makiti fi en fu gi wi a kaakiti di wi abi fanowdu fu u sa holidoo anga pasensi anga ala piisii.
12 U mu e gi u Dda daa. Neen meke u fende a gudu di a paamisi den santawan di de aini a kiin.
13 A puu wi aini dunguu, neen a poti wi aini a kownukondee fi en Manpikin di a lobi.
14 A meke a Manpikin ya pai a paiman fu fii wi fu u sa fende paadon fu sondu.
15 A Manpikin abi denseefi manii fu a Gadu di sama á poi si. Neen na a fosi sani di Gadu meke.
16 Neen na a sama di Gadu teke fu meke ala taa sani a hemel anga goontapu, den sani di u poi si anga den sani di wa poi si. Sani enke kownu, heiheiman, tiiman, efuso taa makiti. Neen Gadu teke fu meke ala taa sani, a fi en ede den sani ya meke.
17 Boiti dati, a be de kaba fosi ala taa sani, neen na a sama di Gadu teke fu meke ala taa sani.
18 Neen na a ede fu a sikin, dati na a kemeente. Neen na a bigin. Neen na a fosiwan di kon a libi baka, fu a be sa de a fosiwan aini ala sani.
19 Bika Gadu be wani Yesesi abi ala den manii fi en.
20 Na a Manpikin ya Gadu teke fu meke ala sani a hemel anga goontapu kon bun baka anga en. A du a sani ya di a buulu fu Yesesi lon na a pina ponsu.
21 Aini a ten di pasa, wi anga Gadu be poli. Wi anga en a be feyanti, bika a soso ogii u be e pakisei.
22 Ma a dede di a meke Yesesi kon dede gi u meke wi anga en toon mati baka. A du a sani ya fu u be sa taampu neen fesi enke sama di santa, sama di naabi nawan fowtu, efuso sama di taawan á poi fende fowtu a den.
23 Ma u mu solugu taki u tan aini a biibi. U mu taampu gingin, wa mu meke nawan sani meke u lasi a howpu fu a bun nyunsu di u be yee. A bun nyunsu ya paati gi ala sama na ala se. Gadu gi mi Pawlesi a wooko fu paati a bun nyunsu ya tu.
24 Mi e piisii fu nyan pina fu wi ede. Mi sabi taki mi abi fu nyan pina gi Kelestesi. A fu a sikin fi en ede meke mi abi fu du a sani ya, dati na a kemeente.
25 A Gadu seefi poti mi a wooko fu dini a kemeente fi en. Mi e du a sani ya fu u sa fende wini. Neen meke mi e paati a wowtu fu Gadu anga mi hii ati.
26 A santa kibiitoli be kibii aini a ten di pasa, a be kibii gi den sama fu fositen. Ma nownow a kon a kiin gi den santawan fu Gadu.
27 Gadu e piisii fu meke den kon sabi a santa kibiitoli fi en. A kibiitoli ya na a toon di Kelestesi toon wan anga u. Wi abi a howpu tu fu fende gaandi makandii anga en.
28 A fu a Yesesi ya we peleiki. We leli sama, we poti den a pasi, we koboloiki a koni di u fende tu fu paati a bun nyunsu gi den. We du den sani ya fu yeepi den bakaman fu Kelestesi fu toon gaansama aini a biibi.
29 Neen meke mi e du ala san mi poi. Mi e wooko taanga anga a kaakiti fi en di a gi mi.
A maiki
^ Luku a wowtu ‘Yehofa’ na a pisi ‘San den wowtu ya wani taki.’
