Wan biifi gi den Kolosesama 2:1-23
2 Mi wani u sabi taki ná pikin moiti mi e meke fu yeepi wi anga den sama fu La-odiseya, anga ala den taawan di á si mi noiti.
2 Mi e taki a sani ya fu di mi wani u fende toosutu. Lobi mu tyai u kon a wan. A so wo fende den belesi di sama e fende te den e fusutan sani kiin. A sani ya o meke u sabi finifini san na a santa kibiitoli fu Gadu. A kibiitoli ya a Kelestesi.
3 Ala a koni anga a sabi fu Gadu kibii aini en.
4 Mi e taki den sani ya, fu di mia wani sama koli u anga taki di gei tuu.
5 Winsi fa mia de anda, toku mi pakisei de a wi anda. Mi e piisii fu yee taki sani nai waka fanyafanya anda, mi e piisii fu yee tu taki we biibi Kelestesi anga u hii ati.
6 We waka a Masaa Yesesi Kelestesi baka kaba, u mu tan waka neen baka.
7 Leti enke faw leli, daw biibi mu taanga fu di we biibi Kelestesi. U mu taampu gingin enke fa den lutu fu wan bon e meke a taampu gingin a doti. U mu e gi Gadu daa ala yuu.
8 U mu luku bun fu sama á koli u anga a koni fu a goontapu ya, efuso den gwenti fu libisama di de enke soso sani. Den sani ya abi fu du anga den soso sani fu a goontapu ya. Den nai kai anga den leli fu Kelestesi,
9 bika Kelestesi abi ala den manii fu Gadu.
10 Neen na a sama di meke u nai mankei nawan sani. A hei moo ala den tiimakiti anga makiti di de.
11 A fu di wi a Yesesi bakaman meke u besnei*. A ná libisama besnei u, ma den bakaman fu Kelestesi e besnei fu di den nai libi moo enke fa a sondu sikin wani.
12 Di u dopu enke Kelestesi, Gadu beli u makandaa anga en. Fu di wi a bakaman fu Kelestesi, meke u kon a libi baka makandaa anga en fu di we biibi den sani di Gadu e du anga a kaakiti fi en. A Gadu meke a kon a libi baka.
13 U be de enke dedesama fu di wi abi sondu anga fu di wa be besnei*, ma Gadu meke u kon a libi baka makandaa anga Yesesi. A be de kabakaba fu gi u paadon fu ala den sondu fu u.
14 A puu a Weiti di be sikiifi anga ana a pasi, neen a sipikii en fasi na a pina ponsu. A Weiti ya be e soi taki wi a sondu sama.
15 Anga a pina ponsu ya a wini den tiimakiti anga den makiti. A meke den waka pasa na ala sama fesi fu gi den sen anga fu soi taki a wini den.
16 Neen meke nawan sama abi a leti fu taigi u saw mu nyan efuso saw mu diingi. Den naabi a leti fu taigi u sowtu fesa, Nyun-mun efuso Sabadei u mu holi tu.
17 Den sani ya e soi gwa den sani di mu kon ete, ma a tuutuu sani a Kelestesi.
18 Wa mu meke den sama di e du enke den abi sakafasi, efuso di e dini engel tapu u fu fende a paiman di u mu fende. Den sowtu sama ya e ‘holi namo’ a san den si. A sosokaali den e fii denseefi, bika den e denki enke fa libisama e denki.
19 Den nai wooko makandaa anga Kelestesi, a ede fu a sikin. A Kelestesi e gi ala den pisi fu a sikin san den abi fanowdu. Neen e meke ala den sukuufu anga den tetei fu a sikin wooko makandaa fu a sikin sa goo enke fa Gadu wani.
20 U fii fu den denki fu a goontapu ya fu di u dede makandaa anga Kelestesi. Da saide meke we libi enke wi a wan pisi fu a goontapu ya ete? Saide we wooko anga den weiti fi en di e soi
21 ‘saw mu teke, saw mu tesi efuso saw mu holi?’
22 Bika den sani ya a weiti anga leli di libisama meke di e soi san wan sama mu nyan efuso san a mu diingi, ma nyanyan anga diingi a sani di e kaba.
23 Winsi fa a gei enke den weiti ya bun, tokuso den nai yeepi sama fu basi den sondu fii fu a sikin. Libisama e wooko anga den weiti ya fu di den wani dini Gadu enke fa denseefi wani. Ma a sani ya e meke den pina, bika a wani den wani sama si enke den abi sakafasi.
A maiki
^ Dati a te den be e koti a fesise buba fu a senpeesi fu wan mannengee puu.
^ Dati a te den be e koti a fesise buba fu a senpeesi fu wan mannengee puu.
