Wan biifi gi den Kolosesama 3:1-25
3 Ma efu u weki baka anga Kelestesi, daw mu tan meke moiti fu fende den sani di de a hemel. Kelestesi sidon na a letise-ana fu Gadu a hemel.
2 U mu tan poti pakisei a den sani di de a hemel, wa mu poti pakisei a den sani fu a goontapu.
3 Bika u dede, a libi fu u kibii makandaa anga Kelestesi leti enke fa Gadu wani.
4 A Kelestesi na a libi fu u. Di aw kon, da useefi o kon makandaa anga en aini a gendee fi en.
5 Neen meke u mu kii den fii fu u di sa meke u libi wan hululibi efuso wan tyobo libi. U mu kii den taanga sekisi fii fu u, a fii fu du ala sowtu ogii, anga takuudu. Takuudu na aseefi enke te sama e dini falisi gadu.
6 Gadu ati o boon a den sama di e du den sani ya.
7 A den sani ya u be e du fosi.
8 Ma u mu fika ala den sani enke atiboon, takuu atiboon, ogii libi, kosi anga tyobo taki.
9 Wa mu e lei gi taawan. U mu kengi a fasi faw be de fosi, daw tapu anga den sani di u be e du.
10 U mu kengi toon nyun sama, u mu e du a sani ya ala yuu fu di we kon sabi Gadu moo bun. A so wo gei Gadu anga den manii fu u.
11 A naabi toobi efu wan sama a wan Dyu efuso Giikisama. A naabi toobi efu a besnei* efuso aa besnei. A naabi toobi efu en a wan taa kondee sama, wan Skitsama, wan saafu efuso wan sama di fii. A Kelestesi na ala sani, a de aini ala sama.
12 Wi a sama di Gadu kai, u santa, a lobi u. Neen meke u mu abi tyali-ati anga taawan, u mu abi bun manii, sakafasi, safu-ati anga pasensi. U mu wei den manii ya enke wan koosi aw sikin.
13 U mu abi boo anga taawan ala yuu. U mu e gi taawan paadon anga u hii ati te den du wan sani anga u. Leti enke fa Yehofa* e gi u paadon anga en hii ati, a so u mu gi taawan paadon tu.
14 Ma boiti den sani ya, u mu wei lobi enke wan koosi aw sikin, bika a lobi e meke sama e libi na a wan.
15 A freide fu Kelestesi mu de aini wi ati ala yuu, bika Gadu kai u fu ala u sa toon wan sikin anga fu u sa abi freide. U mu e soi taki we teke sani fu bigi ala yuu.
16 A wowtu fu Kelestesi mu fuu aini wi ati, a mu meke u toon sama di koni. U mu e leli taawan ala yuu, u mu e gi den taanga-sikin anga psalm*, singi di e gafa Gadu anga taa sowtu singi fu gi en daa. U mu e singi gi Yehofa* aini wi ati.
17 Winsi san we du efuso taki, u mu e du ala sani aini a nen fu Masaa Yesesi. U mu e gi u Dda di de a hemel daa aini a nen fu Yesesi.
18 Den uman, u mu saka useefi aw man ondoo, bika a so den bakaman fu Masaa mu tyai denseefi.
19 Den man, u mu lobi wi uman. Wa mu e libi ogii anga den.
20 Den pikin, u mu e aliki u mma anga u dda ala yuu, bika a sani ya e meke Masaa piisii.
21 Den dda, wa mu e fooseli den pikin fu u, efuso wo meke den lasi-ati.
22 Den saafu, u mu e du san den masaa fu wi a goontapu taki ala yuu. A ná te den e si u wawan u mu e du a sani ya fu di u wani den gafa u, ma u mu e du en anga u hii ati fu di we lesipeki Yehofa*.
23 Winsi san we du, u mu du en anga u hii ati anga ala u kaakiti enke a Yehofa* we du en gi, wa mu du en enke a libisama we du en gi.
24 Bika u sabi taki a Yehofa* o gi wi a gudu di u mu fende. U mu toon saafu fu Kelestesi, a Masaa fu u.
25 Ma holi a pakisei taki a sama di e du ogii, o fende a sitaafu fu a ogii di a du, bika Gadu nai paatibee.
A maiki
^ Dati a te den be e koti a fesise buba fu a senpeesi fu wan mannengee puu.
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Psalm’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
