Wan biifi gi den Kolosesama 4:1-18
4 Den masaa, u mu libi bun anga den saafu fu u, u mu gi den san den mu fende, bika u sabi taki useefi abi wan Masaa a hemel.
2 U mu e begi naamo. Wa mu e feegete fu du a sani ya, u mu e gi Gadu daa tu.
3 U begi gi u dise tu fu Gadu sa opo doo gi a wowtu fi en, fu u sa paati a santa kibiitoli di abi fu du anga Kelestesi, bika a fu a sani ya ede mi de a sitaafu-osu.
4 U begi gi mi tu fu mi sa paati a bosikopu enke fa mi mu paati en.
5 U mu e du sani anga koni te u de a sama ini di nai dini Gadu. U mu e koboloiki u ten bun.
6 Taki switi anga taawan ala yuu. Den sani di we taki mu abi sawtu, da wo sabi faw mu piki iniiwan sama.
7 Mi lobi baala Tikikus, a wan man di e du san Masaa taki ala yuu, ai wooko taanga gi Masaa leti enke u. Aw taigi u ala sani fu mi di u mu sabi.
8 Mi e sende en kon a wi anda fu a taigi u fa ai go anga u dise, aw gi u taanga-sikin tu.
9 Mi e sende en kon makandaa anga mi lobi baala Oneisimus di komoto a wi anda. Enseefi e du san Masaa taki ala yuu. Den o taigi u ala sai pasa dise.
10 A mi anga Aristakus de a sitaafu-osu ya. A sende odi gi u. Malikisi, wan famii fu Barnabas sende odi gi u tu. (Neen mi be taki u mu bali wadaa gi te a kon a wi anda.)
11 Yesesi, di sama sabi enke Yustus sende odi gi u tu. En a wan fu den sama di besnei*. A den man ya wawan de ya e wooko makandaa anga mi gi a Kownukondee fu Gadu. A den e toosutu mi.
12 Epafras, wan saafu fu Kelestesi di komoto a wi anda sende odi gi u tu. Ala yuu ai begi gi u fu u sa toon gaansama aini a biibi, fu u sa biibi ala den sani di Gadu o du.
13 Miseefi sa taigi u taki ai wooko taanga gi wi anga den baala fu La-odiseya anga Hirapolis.
14 Lukasi, a dataa di sama lobi, anga Deimas sende odi gi u.
15 Gi den baala fu La-odiseya odi gi mi. Gi Nimfa anga a kemeente di e kon makandaa aini en osu odi gi mi tu.
16 Baka te u leisi a biifi ya, u mu seeka sani fu a kemeente fu La-odiseya fende en leisi tu. U mu leisi a biifi di mi sende gi a kemeente fu La-odiseya tu.
17 U gi Akepus a bosikopu gi mi taki: ‘A mu tan poti pakisei na a wooko di a be teke di a toon wan bakaman fu Masaa, fu a sa kaba en.’
18 Mi Pawlesi e sende odi gi u tu. A miseefi ana sikiifi a biifi ya. Wa mu feegete taki mi de a sitaafu-osu ete. Meke a bun-ati fu Gadu de anga u ye.
A maiki
^ Dati a te den be e koti a fesise buba fu a senpeesi fu wan mannengee puu.
