Den sani di Lukasi sikiifi 1:1-80
1 A omen sama meke moiti fu ondoosuku ala den sani di pasa. We biibi den sani di den sikiifi tu.
2 U taki anga den sama tu di e paati a bosikopu fu Gadu. Den sama ya be de ape di den sani ya e pasa.
3 Fu di miseefi ondoosuku ala sani finifini fanafu a bigin, meke mio sikiifi den gii pilisisi enke fa den be pasa tuutuu, mi lesipeki Teyofilus.
4 Mi du a sani ya fu soi i taki den sani di sama leli i, a tuu.
5 Na a ten di Herodes* be e tii enke kownu fu Yudeya, i be abi wan pilisite di den be e kai Sakaliya. En a be wan pilisite fu a kulu di den be e kai Abiya. A be toow anga Elisabet, wan bakapikin fu Aron.
6 Ala den tu man be e libi enke fa Gadu wani. Den be e du ala san den weiti fu Yehofa* e taki ala yuu.
7 Ma den á be abi pikin, bika Elisabet á be poi meke pikin. Ala den tu man be gaandi kaba.
8 Wan dei, Sakaliya be de aini a tempel e du en pilisite wooko gi Gadu, bika a yuu fu a kulu fi en be doo fu du a wooko ya.
9 A leisi ya neen be mu go aini a tempel fu boon sumee switi ofaandi gi Yehofa*, leti enke fa den pilisite be gwenti.
10 Di a yuu doo fu boon a sumee switi ofaandi, ala den sama be taampu a doose e begi.
11 Wan engel fu Yehofa* kon a Sakaliya. A be taampu na a letise fu a altari*.
12 Sakaliya dyombo di a si en, ná pikin feele a feele.
13 Ma a engel taigi en taki: ‘Ná feele Sakaliya, bika Gadu aliki den fayafaya begi fii. Yu uman Elisabet o meke wan boi. I mu kai en Yohanisi.
14 Ná pikin piisii yo piisii. A omen sama o poolo di aw meke,
15 bika aw de wan pelensipali man gi Yehofa*. Ma aa mu diingi win efuso sopi. Gadu o gi en a santa yeye fi en fanafu di aw de aini en mma bee.
16 Aw yeepi omen Islayelisama fu daai kon baka a den Gadu Yehofa*.
17 Gadu o sende en gwa fesi anga aseefi yeye anga a kaakiti fu Eliya. Aw meke a ati fu den dda kon de enke pikinnengee. Aw meke den sama di á be e aliki bigin libi enke den sama di e du sani enke fa Gadu wani. Aw seeka a foluku fu den sa libi enke fa Yehofa* wani.’
18 Sakaliya akisi a engel taki: ‘Fa a sani ya o du pasa? Bika mi gaandi kaba, mi uman seefi gaandi.’
19 A engel piki en taki: ‘Mi a Gabriyel, di e taampu a Gadu fesi. A Gadu seefi sende mi fu tyai a bun nyunsu ya gii.
20 Ma fu di ya biibi den sani di mi taigi i, meke i naw poi taki moo te enke den sani ya pasa. Den sani di mi taki o pasa te a yuu doo.’
21 A yuu ten de den sama di be de a doose be e wakiti Sakaliya. Den be foondoo taki a tan so langa aini a tempel*.
22 Di a kon a doose, aa be poi taki. Neen den sama fusutan taki a be si wan foondoo sani aini a tempel. A be e soi den sani anga ana, ma aa be poi taki.
23 Di den dei pasa, di Sakaliya kaba du en wooko aini a tempel, a daai go neen osu baka.
24 Baka wan pisiten en uman Elisabet kon de anga bee. Feifi mun langa Elisabet á komoto a osu. A be taki:
25 ‘Na a sani ya Yehofa* du gi mi, a poti pakisei a mi neen a puu sen a mi ain.’
26 Di Elisabet be de anga sigisi mun bee, Gadu sende a engel* Gabriyel gwa Nasaleti, wan foto aini Galileya
27 fu go miti wan yonkuu-uman* den e kai Maliya. A be abi mofu fu toow anga Yowsefu, wan bakapikin fu David.
28 Di a engel doo Maliya, a taki: ‘I fende wan gaan belesi, bika Yehofa* e piisii anga i.’
29 Di a yee san a engel taki a dyombo, a be e akisi enseefi saide a engel taki a sani ya.
30 Neen meke a engel taigi en taki: ‘I naafu feele Maliya, bika Gadu e piisii anga i.’
31 Yo de anga bee, da yo meke wan manpikin. I mu kai en Yesesi.
32 Aw de wan pelensipali man, den o kai en a Manpikin fu a Moo Gaan Gadu. Yehofa* Gadu o gi en a kownusutuu fi en dda David.
33 Aw tii fu teego enke Kownu fu a famii fu Yakopu, a Kownukondee fi en o tan fu teego.’
34 Ma Maliya akisi a engel taki: ‘Fa a sani ya o pasa? Bika noiti mi siibi anga wan man.’
35 Neen a engel taigi en taki: ‘A Moo Gaan Gadu o gi yu en santa yeye*, da a kaakiti fi en o kibii yu. Neen meke a pikin di yo meke o santa, sama o kai en Gadu Manpikin.
36 I famii Elisabet de anga sigisi mun bee nownow anga ala fa a gaandi, winsi fa sama be e taki aa poi meke pikin.
37 Ma sani á de di Gadu á poi du.’
38 Neen Maliya taki: ‘Mi na a umansaafu fu Yehofa*. Meke sani pasa leti enke fai taki.’ Di a taki so, a engel gwe.
39 Bakadati, Maliya go gawgaw a wan foto di be de a den mongo mindii a Yuda.
40 Di a doo pe Sakaliya e tan, a go aini a osu neen a gi Elisabet odi.
41 Di Elisabet yee a odi fu Maliya, a pikin di be de aini en bee bigin fetifeti. Neen Gadu gi Elisabet en santa yeye,
42 neen a bali taki: ‘A yu na a moo koloku uman di de, meke Gadu belesi a pikin di de aini i bee.
43 A wan gaandi gi mi taki a mma fu mi Masaa kon luku mi.
44 Di mi yee a odi fii neen a pikin aini mi bee piisii te neen a bigin fetifeti.
45 Koloku tu fu a uman di biibi den sani di a yee, bika ala den sani di Yehofa* taigi en o pasa leti enke fa a taki.’
46 Neen Maliya taki: ‘Mi e gafa Yehofa*.
47 Mi e piisii aini mi ati, bika a Gadu na a sama di fii mi.
48 A poti pakisei na a pooti umansaafu fi en. Fanafu now, ala sama o taki mi a wan koloku uman,
49 bika a moo Makiti Gadu du gaan sani gi mi. En nen santa.
50 Ala yuu ai soi tyali-ati gi den sama di e lesipeki en.
51 A du omen gaan sani anga a makiti fi en*, a yaki den sama di abi heimembee aini den ati.
52 A puu a posisi fu omen tiiman a den ana, a hei den mofinawan.
53 A gi den sama di angii e kii san den abi fanowdu, ma a sende den sama di be gudu gwe anga soso ana.
54 A kon yeepi en futuboi Islayeli. Di a du a sani ya, a soi taki aa feegete a sani di a be paamisi den.
55 A be paamisi taki ala yuu aw soi tyali-ati gi Abalaham anga den bakapikin fi en, na a sani ya a be taigi den gaansama fu u.’
56 Maliya tan wan sani fu dii mun anga Elisabet neen a daai go neen osu baka.
57 Di a yuu fu Elisabet doo, a meke wan boi.
58 Di den famii fi en, anga den sama fu a pisi pe a be e tan si taki Yehofa* soi tyali-ati gi en, den poolo anga en.
59 Di a pikin abi aitin dei, den kon fu besnei* en. Den be wani gi en a nen fi en dda Sakaliya.
60 Ma en mma taigi den taki: ‘Nono, a Yohanisi wo kai en.’
61 Ma den taigi en taki: ‘Nawan fu den famii fii abi a nen ya.’
62 Neen den akisi a dda anga ana fa a wani den kai a boi.
63 A dda akisi den wan pisi paanga neen a sikiifi taki: ‘A Yohanisi neen nen.’ A sani ya meke ala den sama di be de ape foondoo.
64 Sakaliya tongo losi wanten, neen a bigin taki, a be e gafa Gadu.
65 Ala den sama di be e tan na a pisi de be foondoo. A taki ya be e paati aini hii Yudeya.
66 Ala den sama di be yee den sani ya, be e tan pakisei den sani di pasa. Den be e akisi denseefi taki: ‘San a pikin ya o toon di aw kon bigi?’ Ala sama be poi si kiin taki Yehofa* be de anga a pikin ya.
67 Gadu gi Sakaliya, a dda fu a pikin en santa yeye, neen a bigin taki polofeititoli. A taki:
68 ‘U gafa Yehofa*, a Gadu fu Islayeli, bika a poti pakisei na a foluku fi en, neen a fii den.
69 A gi u wan taanga man aini a osu fi en futuboi David. Na a man ya o fii wi.
70 Na a sani ya a be meke den santa polofeiti fi en fu fositen taki.
71 A be paamisi taki aw fii wi puu aini a ana fu den feyanti fu u, anga ala den sama di e buuse u.
72 Aw soi tyali-ati gi u, leti enke fa a be paamisi den gaansama fu u. A naw feegete a santa kuudei fi en.
73 Na a sani ya a be paamisi wi afo Abalaham.
74 Baka di Gadu o puu wi aini a ana fu den feyanti fu u, a naw de fu u feele sama moo te we dini en.
75 Wo poi dini en anga u hii ati u hii libi langa. Solanga u de a libi, wo du sani enke fa a taki.
76 Ma yu, mi pikin, sama o kai i wan polofeiti fu a Moo Gaan Gadu, bika yo waka a Yehofa* fesi fu seeka a pasi gi en.
77 Yo meke a foluku fi en sabi taki aw fii den, bika aw gi den paadon fu den sondu fu den.
78 Gadu o du ala den sani ya fu di a abi tyali-ati. A tyali-ati di o komoto a hemel o de enke te a san e pii.
79 Aw kiin peesi gi den sama di de a dunguu, anga den sama di de a dede mofu, aw soi u tu saw mu du fu abi freide.’
80 Di a pikin be e goo kon bigi, a yeye fu Gadu be de anga en. A tan aini a sabana te enke a yuu doo fu paati a bosikopu fu Gadu gi den Islayelisama.
A maiki
^ Luku a wowtu ‘Herodes’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ A altari pe den be e boon sumee switi ofaandi. Luku a wowtu ‘altari’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ A santa peesi fu a tempel.
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘engel’ na a pisi ‘San den wowtu ya wani taki.’
^ Aini Giikitongo den be taki: ‘uman di á siibi anga man ete.’
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Luku den wowtu ‘santa yeye’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Aini Giikitongo den be taki: ‘a du omen gaan sani anga en ana.’
^ Luku a wowtu ‘Yehofa’ na a pisi ‘San den wowtu ya wani taki.’
^ Dati a te den be e koti a fesise buba fu a senpeesi fu wan mannengee puu.
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
