Den sani di Lukasi sikiifi 10:1-42
-
Yesesi sende 70 bakaman fi en go peleiki (1-12)
-
Heelu fu den foto di á wani daai den libi (13-16)
-
Den 70 bakaman fu Yesesi daai kon baka (17-20)
-
Yesesi e gafa en Dda fu di ai tyai sani kon a kiin gi den sama di abi sakafasi (21-24)
-
A ageisitoli fu a Samaliyaman di be soi taki a lobi taawan (25-37)
-
Yesesi go luku Maata anga Maliya (38-42)
10 Bakadati Masaa Yesesi teke ete 70 fu den bakaman fi en, neen a sende den tu na tu go na ala den foto anga den kampu pe enseefi be o go bakaten.
2 A taigi den taki: ‘A nyanyan di lepi a goon ipi, ma wookoman á sai. Neen meke u mu begi a Masaa di abi a wooko fu a sende moo sama fu kon koti a nyanyan.
3 U go, ma u mu de na ain, bika mi e sende u go enke sikapu a busidagu mindii.
4 Wa mu tyai moni, nyanyan-saka efuso susu. Wa mu e tapu a pasi fu gi sama odi*.
5 Te u go aini wan osu, taigi den sama taki: “Meke ala sani waka bun anga u*.”
6 Efu wan sama di lobi freide de ape, da a freide fu u o de anga en. Ma efu sama á de ape di lobi freide da a freide fu u o daai kon aw baka.
7 U mu tan aini a osu ape, daw nyan efuso diingi san den e gi u, bika a wookoman fiti fu fende en pai. Wa mu e komoto fu a wan osu go na a taawan.
8 Te u gwa wan foto neen den bali wadaa gi u, u mu nyan san den gi u.
9 U mu deesi den sama di siki daw taigi den sama na ape taki: “A Kownukondee fu Gadu de koosube.”
10 Ma efu u gwa wan foto neen den á bali wadaa gi wi ape, u mu gwa den gaan pasi fu a foto daw taki:
11 “A doti fu a foto fu u di de aw futu seefi we naki puu. Ma u mu sabi taki a Kownukondee fu Gadu koosube.”
12 Biibi mi, a dei di Gadu o kuutu sama, o ibi gi a foto ya moo a foto Sodom.
13 Heelu fii Korasin. Heelu fii Betsaida. Bika efu aini Tirus anga Sidon mi be du den gaan wonduu di mi du aini u foto, da den sama ya be o daai den libi. Den be o wei koosi di sama e wei te den e tyali da den sidon aini asisi.
14 Neen meke a sitaafu di wo fende na a dei di Gadu o kuutu sama, o ibi moo du fu Tirus anga Sidon.
15 Kaperna-um, u dati denki taki wo gwa hemel? Noiti, a geebi wo go!
16 A sama di e aliki u e aliki mi. Ma a sama di nai aliki u, nai aliki mi tu. Boiti dati, a sama di nai aliki mi, nai aliki a Sama di sende mi kon.’
17 Den 70 bakaman daai kon baka anga piisii neen den taigi en taki: ‘Masaa den takuu yeye seefi e du saw taki te u kai i nen.’
18 A piki den taki: ‘Mi e si fa Saatan e kai komoto a hemel kaba enke te tapu e koti faya.
19 Mi gi u a makiti fu masi sineki anga doti-kwata anga u futu. Mi meke wi abi makiti moo u feyanti, nawan sani o poi du ogii anga u.
20 Wa mu piisii fu di den takuu yeye e du saw taki, ma u mu piisii fu di u nen sikiifi a hemel.’
21 Aseefi pisiten de, a santa yeye be meke a piisii, neen a taki: ‘Nda, Masaa fu hemel anga goontapu, mi e gafa i na ala sama fesi ye. Bika i kibii den sani ya gi den koniman anga den sabiman, ma i tyai den kon a kiin gi pikinnengee. Eeye Nda, bika a so i wani sani waka.
22 Nda poti ala sani aini mi ana. A wan kodo sama di sabi a Manpikin tuutuu na a Dda. A wan kodo sama di sabi a Dda tuutuu na a Manpikin, anga iniiwan sama di a Manpikin gi a gaandi fu sabi a Dda.’
23 Di Yesesi anga den bakaman fi en wawan be de, a taigi den taki: ‘Koloku fu den sama di ain si den sani di we si.
24 Bika mi e taigi u taki: a omen polofeiti anga kownu be wani si den sani di we si, ma den á si den. Den be wani yee den sani di we yee, ma den á yee den.’
25 Wan man di be sabi a Weiti bun be wani tesi Yesesi, neen meke a akisi en taki: ‘Leliman, san mi mu du fu fende teego libi?’
26 Yesesi akisi en taki: ‘San sikiifi aini a Weiti? Sai fusutan dii leisi en?’
27 A man piki en taki: ‘“I mu lobi Yehofa* i Gadu anga i hii ati, i hii libi, ala i kaakiti anga ala i fusutan. I mu lobi taa sama enke fai lobi iseefi.”’
28 Yesesi taigi a man taki: ‘I piki bun, tan du a sani ya, da yo fende teego libi.’
29 Ma a man be wani soi taki ai libi enke fa Gadu wani, neen meke a akisi Yesesi taki: ‘Sama a den taa sama di mi mu lobi?’
30 Di a akisi en a sani ya, Yesesi gi en wan toli. A taigi en taki: ‘Wan man be e saka komoto a Yelusalem fu gwa Yerikow. Wantu fufuuman fufuu ala den sani fi en, den puu en koosi neen sikin, den fon mi en te a fon, neen den fika en ape fu dede.
31 Aseefi yuu de wan pilisite be e saka komoto a Yelusalem, ma di a si a man, a lontu pasa na a taase.
32 Na aseefi sani wan Leifiman du. Di ai waka na a pasi de, di a si a man neen a waka pasa na a taase.
33 Bakadati wan Samaliyaman be e waka pasa ape. Di a si a man tyali kisi en.
34 A waka go na a man, a teke oli anga win, a kiin den soo fi en neen a tei den. Bakadati a poti a man na a buliki fi en tapu, a tyai en gwa wan peesi pe sama e yuu kambaa, neen a solugu en.
35 A tamaa fi en a teke tu solufu moni*, neen a gi a sama di be abi a peesi. A taigi en taki: “Solugu a man ya gim baa, efu a moni di mi gii á sai, mio pai i te mi kon baka.”
36 On di fu den dii man ya soi taki a lobi a man di fufuuman du ogii anga en?’
37 A man taigi en taki: ‘Na a wan di soi tyali-ati gi en.’ Neen Yesesi taigi en taki: ‘Na aseefi sani i mu du tu.’
38 Di den be de a pasi, a go aini wan fu den kampu. Wan uman den e kai Maata kai Yesesi kon neen osu.
39 A uman ya be abi wan sisa den e kai Maliya. Maliya be sidon a Yesesi futuse e aliki den sani di a be e taki.
40 Ma Maata be fika e du omen wooko. Neen meke a gwa Yesesi neen a taigi en taki: ‘Masaa, i nai si taki mi sisa fika mi wawan e du ala den wooko noh? Taigi en fu a kon yeepi mi baa.’
41 Ma Masaa piki en taki: ‘Maata, Maata, ye booko yu ede tumisi anga omen sani.
42 A wantu sani namo de fanowdu, fu taki en kiin a wan sani namo de fanowdu. Maliya teke a moo bun pisi, nawan sama o puu en neen ana.’
A maiki
^ A ten de sama be abi a gwenti fu baasa te den miti, den be e gi gaan langa toli tu.
^ Efuso ‘meke freide de anga u’.
^ Luku a wowtu ‘Yehofa’ na a pisi ‘San den wowtu ya wani taki.’
^ Aini Giikitongo den be taki: ‘denari.’
