Den sani di Lukasi sikiifi 11:1-54
-
Yesesi e leli den bakaman fi en fa den mu begi (1-13)
-
A begi di Yesesi be leli den bakaman fi en (2-4)
-
-
Yesesi e puu takuu yeye a sama tapu anga a kaakiti fu Gadu (14-23)
-
Takuu yeye daai gwa pe a be komoto baka (24-26)
-
San e meke wan sama de koloku tuutuu (27, 28)
-
A maiki fu Yona (29-32)
-
Lampu fu a sikin (33-36)
-
Heelu fu den keliki fesiman di e koli sama (37-54)
11 Wan leisi a be de a wan peesi e begi. Di a kaba begi, wan fu den bakaman fi en taigi en taki: ‘Masaa, Yohanisi leli den bakaman fi en fa den mu begi, leli u faw mu begi tu baa.’
2 Neen meke a taigi den taki: ‘Te we begi u mu taki: “Nda, i nen mu santa. Meke i Kownukondee kon.
3 Gi u san wi abi fanowdu fu nyan* tide baa.
4 Gi u paadon fu u sondu baa, bika useefi e gi ala den sama di du sani anga u paadon. Yeepi u fu wa sondu te tesi e miti u.”’
5 Bakadati a taigi den taki: ‘Kow taki wan fu u abi wan mati neen i go begi en a gaan neti taki: “Mi mati, gi* mi dii beele baa.
6 Wan mati fu mi komoto a faawe kon a mi ya, ma mi naabi nawan sani gi en fu nyan.”
7 Ma a mati di de a inise bali taki: “Saide na a yuu ya i kon? Mi sooto mi doo kaba, mi anga den pikin fu mi didon kaba tu. Mia poi opo fu kon teke sani fu nyan gii.”
8 Ma mi e taigi u taki: Aw opo go teke wan sani gi a mati fi en. A ná fu di den tu man a mati meke aw du a sani ya, ma a fu di ai akisi en naamo meke aw gi en san a abi fanowdu.
9 Neen meke mi e taigi u taki, e akisi naamo, da wo fende, e suku naamo, da wo fende, e koko a doo naamo, da a doo o opo gi u.
10 Bika a sama di e akisi, o fende. A sama di e suku, o fende. A doo o opo gi a sama di e koko naamo.
11 Wan dda o gi en pikin sineki te a akisi en wan fisi?
12 Aw gi en doti-kwata efu a akisi en wan igi?
13 Anga ala fa wi abi takuu manii toku u sabi gi u pikin bun sani. Daw mu sabi taki u Dda di de a hemel o gi sama a santa yeye* fi en te den akisi en.’
14 Bakadati Yesesi puu wan takuu yeye di e meke sama babaw a wan man tapu. Di a takuu yeye komoto na a man tapu, a man be poi taki baka. Di a sani ya pasa ala den sama foondoo.
15 Ma wantu fu den sama taki: ‘A Beyelsebub*, a tiiman fu den takuu yeye gi a man ya a kaakiti fu puu takuu yeye a sama tapu.’
16 Wantu sama be wani tesi Yesesi, neen meke den akisi en fu du wan wonduu fu soi taki a Gadu sende en kon.
17 Fu di a be sabi san den be e denki meke a taigi den taki: ‘Efu den sama aini wan kownukondee e feti anga denseefi, a kownukondee de o booko. Efu den sama fu wan osufamii e feti anga denseefi, a osufamii de o booko.
18 A letiso a de tu taki, efu Saatan e feti anga enseefi, da a kownukondee fi en o booko. Ma efu we taki a Saatan gi mi a kaakiti fu puu takuu yeye a sama tapu,
19 da anga sama den bakaman fu we wooko, bika denseefi e puu takuu yeye a sama tapu. A fu den sani ya ede meke den bakaman fu wo kuutu u.
20 Ma efu anga a kaakiti* fu Gadu mi e puu takuu yeye a sama tapu, da a Kownukondee fu Gadu doo sondee fu u fusutan.
21 Te wan taanga man di e holi wakiti gi en osu de anga ala en fetisani, sama naw poi kon fufuu den sani fi en.
22 Ma efu wan sama di taanga moo en kon feti anga en, aw puu ala den fetisani fi en neen ana. Bika a den fetisani ya a man be e si enke be o kibii den gudu fi en. Baka te a du a sani ya, aw teke den gudu fu a man go paati gi taa sama.
23 Iniiwan sama di nai wooko makandaa anga mi, a mi feyanti. Iniiwan sama di nai tyai sama kon a wan makandaa anga mi, e yaki sama fu den á kon a mi.
24 Te wan takuu yeye komoto a wan sama tapu, ai go waka lontu suku taa peesi aini den sabana fu a tan, ma te aa fende, da ai taki: “Mio daai go baka a mi osu, a pe mi be komoto.”
25 Di a daai go baka, a si taki den sibi a osu neen den seeka en te a de taa.
26 Neen a gwe go teke ete seibin taa yeye di ogii moo en. Ala den e go tan aini a sama, da a libi fu a sama e kon ogii moo fa a be de fosi.’
27 A be e taki ete di wan uman di be de aini den somen sama bali taigi en taki: ‘Koloku fu a uman di tyai i aini en bee. Koloku fu a uman di gii bobi!’
28 Ma Yesesi taki: ‘Nono, koloku fu den sama di e yee a wowtu fu Gadu, da den e du san a taki.’
29 Di den sama be e kon makandaa, Yesesi bigin taki: ‘Den sama fu a ten ya abi ogii-ati. Den wani si wonduu fosi den o biibi. Ma den naw si nawan taa wonduu moo enke a sani di be pasa anga Yona.
30 Bika leti enke fa Yona be de enke wan maiki gi den sama fu Ninifei, a so a Manpikin fu libisama o de enke wan maiki gi den sama fu a ten ya.
31 A umankownu fu Skeiba o kon a libi baka makandaa anga den sama fu a ten ya na a dei di Gadu o kuutu sama. Aw soi taki den sama fu a ten ya nai tyai denseefi bun. Bika a be komoto te a faawe fu kon yee den koni fu Salomo. Ma wan sama di pelensipali moo Salomo de ya.
32 Den sama fu Ninifei o kon a libi baka makandaa anga den sama fu a ten ya na a dei di Gadu o kuutu sama. Bika den daai den libi di den yee a bosikopu fu Yona. Ma wan sama di pelensipali moo Yona de ya.
33 Te wan sama leti wan abeni, a nai poti en a wan bakisi ondoo efuso kibii en a wan peesi. Ma ai poti en a wan tafaa tapu fu a sa kiin peesi gi den sama di e kon aini a osu.
34 A faya fu a sikin, a den ain fii. Efu yu ain kiin, dai hii sikin o beenki. Ma efu yu ain e luku sani di á bun, i hii sikin o dunguu.
35 I mu de na ain. I mu luku bun taki a faya di de aini yu, a ná dunguu.
36 Neen meke efii hii sikin e beenki sondee fu wan pisi fi en dunguu, da aw de enke wan faya di e kiin peesi.’
37 Baka di Yesesi taki den sani ya, wan Faliseiman akisi en fu kon nyan neen osu. Neen meke a go na a osu fu a man, neen a sidon a tafaa.
38 Ma a Faliseiman foondoo di a si taki Yesesi á wasi en ana* fosi a nyan.
39 Ma Masaa Yesesi taigi en taki: ‘U Faliseiman de enke kan anga beenki di kiin a doose ma inise de tyobotyobo. Bika a soso takuu giili anga takuu pakisei de aini wi ati.
40 A don di u don! A ná a sama di meke doose meke inise noh?
41 Te we du bun gi pootiman u mu du en anga u hii ati, da ala taa sani fu wo kiin.
42 Ma heelu fu u Faliseiman, bika we gi du fu tin pisi fu a menti-uwii, a winlutu-uwii* anga ala taa sowtu guluntu di we paandi. Ma wa lobi sama enke fa Gadu lobi den. U nai koti kuutu a wan letifasi enke en tu. U mu gi a du fu tin pisi fu san wi abi, ma u mu du den taa sani ya tu.
43 Heelu fu u ye Faliseiman, bika u lobi sidon a fesi aini den snoga*. U lobi te sama e gi wi odi tu te u de a wowoyo.
44 Heelu fu u ye, bika u de enke geebi di sama nai si. Den e waka pasa a den tapu sondee fu sabi taki a geebi de ape!’
45 Di a taki den sani ya, wan fu den sama di be sabi a Weiti bun taigi en taki: ‘Leliman, efu a so i taki dai kosi u tu.’
46 Neen Yesesi taigi en taki: ‘Heelu fu u tu ye, u sama di sabi a Weiti bun. Bika we meke weiti di de enke gaan ibi lai gi taawan fu sow, ma useefi nai wani langa wan finga holi den!
47 Heelu fu u ye, bika we meke geebi gi den polofeiti, ma a den gaansama fu u be kii den.
48 U sabi san den gaansama fu u du, ma toku we holibaka gi den. Den kii den polofeiti, daw dati e meke den geebi fu den polofeiti.
49 A fu di Gadu koni meke a taki a sani ya. A taki: “Mio sende polofeiti anga apostel gwa den. Den o kii son wan fu den, da den du ogii anga son wan.
50 Neen meke Gadu o meke den sama fu a ten ya pai fu a buulu fu ala den polofeiti di den kii fanafu di goontapu sete.
51 Fanafu a buulu fu Abel te anga a buulu fu Sakaliya, di den kii na a altari anga a tempel* mindii.” Mi e taigi u taki Gadu o akisi den sama fu a ten ya faantiwowtu fu a sani ya.
52 Heelu fu u ye, den sama di sabi a Weiti fu Gadu. U towe a sooto di mu opo a doo gi sama fu kon sabi Gadu. Useefi á gwa inise, da we tapu den taa sama di wani go aini.’
53 Di a komoto ape, den leliman fu a Weiti anga den Faliseiman bigin du sani fu fooseli en. Den be e poti omen akisi gi en,
54 bika den be wani a taki wan sani di á bun fu den be sa fende fowtu neen.
A maiki
^ Efuso ‘gi wi a beele di wi abi fanowdu’.
^ Aini Giikitongo den be taki: ‘leni.’
^ Luku den wowtu ‘santa yeye’ na a pisi ‘San den wowtu ya wani taki.’
^ Efuso ‘Saatan’.
^ Aini Giikitongo den be taki: ‘a finga fu Gadu.’
^ Den Faliseiman anga den taa Dyu be meke den eigi weiti fu soi fa wan sama mu wasi en ana.
^ Bakaatongo kai en wijnruit.
^ A peesi pe den Dyu be e go fu dini Gadu.
^ Luku a wowtu ‘tempel’ na a pisi ‘San den wowtu ya wani taki.’
