Den sani di Lukasi sikiifi 12:1-59
-
A sowda fu den Faliseiman (1-3)
-
Wa mu feele libisama, a Gadu u mu feele (4-7)
-
Den sama di nai sen gi Kelestesi (8-12)
-
A ageisitoli fu a don guduman (13-21)
-
Wa mu booko wi ede moo (22-34)
-
Pikin kulu (32)
-
-
U mu de na ain (35-40)
-
A koni saafu, anga a ogii saafu (41-48)
-
Mia kon fu meke sama libi na a wan, ma mi kon paati sama anga sama (49-53)
-
Poti pakisei a den sani di e pasa (54-56)
-
Meke en bun anga taawan (57-59)
12 A pisiten de a omen dunsu sama be kon a wan. Sama be ipi te neen den be e taampu denseefi. Yesesi bigin taki anga den bakaman fi en fosi. A taigi den taki: ‘Luku bun anga a sowda fu den Faliseiman, dati na a koli di den e koli sama.
2 Nawan sani o kibii te, da aa kon a kiin. Ala kibiitoli o kon a kiin wan dei.
3 Neen meke sama o yee den sani di we taki te u wawan de. Den sani di we taigi taawan a yesi, a den sani de o bolotyasi na ala se.
4 Mi mati, mi e taigi u taki wa mu feele den sama di poi kii u, da bakadati den á poi du nawan sani anga u moo.
5 Ma a Gadu u mu feele, bika a poi kii u da a fiingi u go aini Gehena. Neen meke neen na a sama di u mu feele.
6 Den e seli feifi pikin foo gi tu tiisensi* namo. Tokuso Gadu nai feegete nawan fu den.
7 Ala den uwii di de a wi ede seefi a teli. Neen meke wa mu feele, bika u pelensipali moo tyaipi pikin foo.
8 Mi e taigi u taki iniiwan sama di e taki a taawan fesi taki a sabi mi, a Manpikin fu libisama o taki a den engel anga Gadu fesi taki a sabi en tu.
9 Ma efu wan sama e taki a taawan fesi taki aa sabi mi, da a Manpikin fu libisama o taki a den engel anga Gadu fesi taki aa sabi en tu.
10 Efu wan sama e taki ogii fu a Manpikin fu libisama, aw fende paadon. Ma efu wan sama e taki ogii fu a santa yeye, a naw fende paadon.
11 Te den tyai u gwa den heiheiman, den tiiman efuso a wan kulu sama fesi, wa mu feele efuso booko wi ede anga san wo taki,
12 bika di a yuu o doo a santa yeye o meke u sabi saw mu taki.’
13 Neen wan fu den sama di be de ape taigi en taki: ‘Leliman, taigi mi baala fu a paati ala den gudu fu u dda anga mi baa.’
14 Yesesi piki en taki: ‘Sama poti mi fu koti kuutu gi yu anga i baala efuso fu paati gudu gi u?’
15 Bakadati a taigi den sama taki: ‘U mu de na ain. U mu luku bun taki u naabi takuu giili, bika winsi wan sama abi tyaipi gudu, tokuso den gudu di a abi á poi gi en libi.’
16 Di a kaba taki den sani ya, a gi den wan ageisitoli. A taki: ‘A goon fu wan guduman be meke tyaipi nyanyan.
17 Neen a bigin pakisei taki: “San mio du? Mi naabi peesi sai fu poti ala den nyanyan ya.”
18 Neen meke a taki: “Mi sabi san mio du. Mio booko den magisin fu mi, mio meke moo gaanwan, da mio poti ala mi alisi anga ala den taa sani fu mi aini.
19 Bakadati a taki: ‘Den sani di mi abi ya o holi omen yali langa. Neen meke mio boo, mio nyan, mio diingi, da mi meke piisii.’”
20 Ma Gadu taigi en taki: ‘I donman yu. Ya sabi taki a neti ya yo dede noh? Da sai denki o pasa anga den sani dii be kibii?’
21 A so sani o waka anga a sama di e kibii tyaipi gudu gi enseefi, ma di nai meke moiti fu Gadu si en enke wan sama di gudu.’
22 Bakadati a taigi den bakaman fi en taki: ‘Neen meke mi e taigi u taki, wa booko wi ede moo anga u libi, wa booko wi ede anga san wo nyan efuso san wo wei.
23 Bika a libi pelensipali moo nyanyan, a sikin pelensipali moo koosi.
24 Poti pakisei a den foo di e fee a tapu. Den nai sai sii efuso koti nyanyan. Den naabi magisin fu poti nyanyan, tokuso Gadu e gi den sani fu nyan. Wa pelensipali moo den foo noh?
25 On di fu u ya poi kusumi te da a meke en libi kon moo langa pikinso?
26 Neen meke efu wa poi du a sani de, da saide we booko wi ede anga nyanyan anga koosi?
27 Luku fa den boomiki e goo. Den nai wooko efuso meke koosi, ma mi e taigi u taki Salomo sowan gendee kownu seefi á be e wei moin enke wan fu den boomiki ya.
28 Efu Gadu e meke den sani ya moin so, winsi fa den nai libi langa, da saide u nai biibi taki a poi gi u koosi fu wei?
29 Neen meke wa mu booko wi ede moo anga san wo nyan efuso san wo diingi. Wa booko wi ede moo,
30 bika a den sani ya baka den sama di nai dini Gadu* e feti. Ma u Dda sabi taki wi abi den sani ya fanowdu.
31 Neen meke a Kownukondee fu Gadu mu de a moo pelensipali sani aini u libi, da Gadu o gi u ala den taa sani di wi abi fanowdu.
32 Pikin kulu ná feele, bika u Dda o gi wi a Kownukondee anga ala piisii.
33 Seli ala den sani di wi abi, daw du bun gi den pootiman. Meke monisaka di nai booko, dati a den gudu di wi abi a hemel di nai kaba noiti. Fufuuman á poi doo anda, woon á poi nyan mi en tu.
34 Bika a pe u gudu de, na ape wi ati o de.
35 U wei u koosi daw de seekaseeka*, a faya fu den abeni fu u mu de letileti.
36 U mu de enke saafu di e wakiti den masaa fu komoto a wan toowfesa, fu den sa opo a doo gi en wanten te a koko a doo.
37 Koloku fu den saafu ya te a masaa fu den doo, da a si taki den de na ain. Biibi mi, a masaa o tei en mindii, aw meke den sidon a tafaa da aw gi den sani fu nyan.
38 Koloku fu den saafu ya efu a masaa fu den kon a gaan neti* efuso a musude* da a si taki den de na ain.
39 Ma u mu sabi taki, efu a masaa fu a osu be sabi on yuu a fufuuman be o kon, da a be o de na ain fu sama á booko go aini en osu.
40 Useefi mu de seekaseeka, bika a Manpikin fu libisama o kon a wan yuu di wa poti pakisei.’
41 Neen Peitilisi akisi en taki: ‘Masaa, a ageisitoli ya a gi u wawan, efuso a gi ala sama?’
42 Yesesi piki en taki: ‘Sama na a koni futuboi di u sa fitoow, di en masaa poti a wooko fu gi ala den futuboi fi en nyanyan na a yuu di den abi en fanowdu?
43 Koloku fu a saafu de te en masaa kon da a si taki ai du a wooko di a be fika gi en.
44 Biibi mi, a masaa o poti en fu luku ala den sani di a abi.
45 Ma kow taki a saafu e denki taki: “Mi masaa nai kon ete,” neen a bigin fon den taa saafu, ai nyan, ai diingi fu te a duungu.
46 A masaa fu a saafu ya o kon a wan dei anga wan yuu di aa be pakisei. Aw gi en wan ibi sitaafu, da a poti en makandaa anga den taa sama di nai aliki en.
47 Bakadati a masaa o fon a saafu te a fon. Bika winsi fa a saafu be fusutan san en masaa be akisi en, tokuso aa be seeka, aa be du san a be mu du tu.
48 A saafu di du poli sani fu di aa be fusutan san en masaa be wani a du, o fende fonfon, ma a fonfon di aw fende naw ibi enke du fu a saafu di be fusutan san a be mu du. Efu wan sama abi tyaipi wooko, den o akisi en faantiwowtu fu ala den sani de. A faantiwowtu di den o akisi a sama di den poti fu teke fesi a omen wooko o ipi.
49 Mi be kon fu leti wan faya a goontapu, ma efu a faya leti kaba da sa mi wani moo?
50 Mi mu dopu wan dopu ete. A te mi du a sani ya fosi mi naw booko mi ede moo.
51 U denki mi kon a goontapu fu meke sama libi na a wan? Noiti, a kon mi kon fu paati sama anga sama.
52 Fanafu tide den sama aini wan osu naw libi na a wan moo. Efu feifi sama de aini wan osu, dii fu den o libi ogii anga den taa tu, efuso tu fu den o libi ogii anga den taa dii.
53 Wan dda o libi ogii anga en boi, wan boi o libi ogii anga en dda, wan mma o libi ogii anga en umanpikin, wan umanpikin o libi ogii anga en mma, wan mma o libi ogii anga a uman fi en boi, wan uman o libi ogii anga en main.’
54 Bakadati a taigi den sama taki: ‘Te u si wan woluku e komoto na a se pe a san e saka, da we taki: “A alen o kai”, da a alen e kai tuu.
55 Te u si a winta e wai komoto na a se pe a san e opo, da we taki: “A peesi o waan”, da a peesi e waan tuu.
56 Wi abi ogiidu! U sabi fa fu luku tapu fu sabi on ten alen o kai efuso on ten a san o pii, da fa a waka wa poi fusutan den sani di e pasa nownow?
57 Saide u nai fusutan saw mu du?
58 Efi yu anga wan sama abi wan sani, neen u de a pasi e gwa gaan lanti, i mu meke moiti fu seeka a sani di yu anga en abi fosi u doo ape. Bika efi ya du a sani ya, kande a sama tyai i gwa kuutu, da a kuutubakaa o meke den sikowtu sooto i.
59 Biibi mi, i naw komoto ape te enke i pai a lasiti tiisensi.’
A maiki
^ Aini Giikitongo den be taki: ‘tu asarion.’
^ Efuso ‘den foluku fu goontapu’.
^ Aini Giikitongo den be taki: ‘tei u mindii.’
^ Wan pisiten fu 9 yuu go miti 12 yuu neti.
^ Wan pisiten fu 12 yuu go miti 3 yuu musude.
