Den sani di Lukasi sikiifi 15:1-32
15 Ala den sama di be e piki lantimoni anga den sama di be e libi wan sondu libi be e kon a Yesesi fu aliki san a be e taki.
2 Ma den Faliseiman anga den leliman fu a Weiti be e kuutukuutu taki: ‘A man ya e paa anga sama di e libi wan sondu libi, ai nyan anga den tu.’
3 Neen a gi den wan ageisitoli. A taigi den taki:
4 ‘Kow taki wan man abi 100 sikapu, neen wan fu den lasi. A naw fika den taa 99 aini a sabana fu go suku a wan di lasi te enke a fende en noh?
5 Te a fende en, anga ala piisii aw diki en poti neen sikoo.
6 Te a doo osu, ai kai ala den mati fi en, anga den sama di e tan koosube da a taigi den taki: “U piisii anga mi, bika mi fende a sikapu fu mi di be lasi.”
7 Biibi mi, a letiso den e piisii a hemel te wan sama di be e libi wan sondu libi daai en libi. Den e moo piisii moo enke te 99 bun sama naabi fu daai den libi.
8 Efu wan uman abi tin solufu moni, neen wan lasi, a naw leti wan abeni, da a sibi ala a osu te enke a fende en noh?
9 Te a fende en, ai kai den mati fi en, anga den sama di e tan na a pisi fi en, da a taigi den taki: “U piisii anga mi, bika mi fende a solufu moni* fu mi di be lasi.”
10 Biibi mi, a so den engel fu Gadu e piisii tu te wan sama di be e libi wan sondu libi daai en libi.’
11 Bakadati a taki: ‘Wan man be abi tu boi.
12 Wan dei a moo yonkuuwan taigi en dda taki: “Nda, mi wani i paati den gudu fii dai gi mi fu mi se.” A so a dda paati a gudu, neen a gi ibiiman en pisi.
13 Baka wantu dei, a moo yonkuuwan teke ala den sani fi en, neen a gwa wan faawe kondee. Di a go anda, a poli ala den gudu fi en, bika a be e libi wan yayolibi.
14 Baka di a poli ala den gudu fi en, wan gaan angiiten kon aini a kondee, neen a bigin pina.
15 A go suku wooko a wan sama fu a kondee de, neen a sama poti en fu luku agu a den goon fi en.
16 Angii be e kii en te da a be e wani a nyanyan fu den agu, ma dati seefi den á be wani gi en.
17 Di a kisi enseefi a taki: “Den wookoman fu mi dda nai pina fu nyanyan*, da mi de ya e dede anga angii.
18 Mio daai gwa nda baka da mi taigi en taki: ‘Nda, mi sondu a yu anga Masaa Gadu fesi.
19 Mia fiti moo fii kai mi i manpikin, ma gaantangi meke mi toon wan fu den wookoman fii baa?’”
20 Neen meke a opo neen a teke pasi go neen dda osu baka. Di en dda si a opo uku e kon, tyali kisi en neen a lon go neen. A baasa en neen a bosi en.
21 Neen a boi taigi en taki: “Nda, mi sondu a Gadu fesi, mi sondu a yu tu. Mia fiti moo fii kai mi i manpikin.”
22 Ma a dda taigi den saafu fi en taki: “U go teke a moo moin dyakiti esi-esi, daw wei en gi en. U wei wan linga neen finga, daw toosi susu neen futu.
23 U go kii a moo fatu yonkuu kaw tyai kon, meke u nyan daw piisii,
24 bika a boi fu mi ya be dede, ma a kon a libi baka, a be lasi, ma u fende en baka.” Neen den sama bigin piisii.
25 A pisiten de a gaan baala be de a goon. Di ai kon a osu a yee poku e pee, sama be e dansi tu.
26 Neen meke a kai wan fu den wookoman neen a akisi en saide den e fii fesa.
27 A taigi en taki: “I baala daai kon a osu baka. I dda kii a fatu yonkuu kaw fu di a poolo taki a daai kon baka gusontugusontu.”
28 Ma a gaan baala ati boon te, aa be wani go a inise. Neen meke a dda kon a doose neen a bigin begi en fu kon a inise.
29 Ma a taigi en dda taki: “Luku omen yali mi de ya e wooko taanga gii, tokuso noiti wan dei i gi mi wan yonkuu kaabita seefi fu mi anga den mati fu mi nyan.
30 Ma di a boi fii ya go poli ala den gudu fii a hulu-uman, i kii a moo fatu yonkuu kaw gi en di a daai kon baka.”
31 Neen a dda taigi en taki: “Mi boi oo, noiti i gwe fika mi, ala san mi abi, a fii.
32 Ma u be abi fu poolo, u be abi fu piisii, bika i baala be dede ma a kon a libi baka, a be lasi ma u fende en baka.”’
