Den sani di Lukasi sikiifi 18:1-43
-
A ageisitoli fu a uman di be de na a kuutuman baka naamo (1-8)
-
A Faliseiman anga a man di be e piki lantimoni (9-14)
-
A toli fu Yesesi anga den pikinnengee (15-17)
-
Wan fu den fesiman fu den Dyu akisi Yesesi wan sani (18-30)
-
Yesesi taigi den ete wan leisi taki aw dede (31-34)
-
Wan beendiman di be e begi sani a sikinpasi bigin si baka (35-43)
18 Bakadati a gi den wan ageisitoli fu meke den fusutan taki a de fanowdu fu e begi ala yuu. A be wani den fusutan tu taki noiti den mu gi abaa.
2 A taigi den taki: ‘Wan kuutubakaa be de aini wan foto. A man ya á be e lesipeki Gadu efuso libisama.
3 Ma wan uman di man be dede kaba be de aini a foto de. Ala yuu a be e go na a kuutubakaa, da a be e taigi en taki: “Mi be tyai wan toli fu mi anga wan taa sama gwa kuutu, gaantangi yeepi mi fu den kuutu a toli fu mi a wan letifasi baa.”
4 Wan hii pisiten a kuutubakaa á be wani yeepi en. Ma bakaten a denki taki: “Winsi fa mi nai lesipeki Gadu, anga libisama,
5 tokuso mio yeepi a uman ya, bika na ala yuu ai kon fuufeli mi. Di mio yeepi en anga a toli fi en, a naw kon simpan mi ede moo.”’
6 Bakadati Masaa Yesesi taki: ‘U yee san a kuutubakaa taki winsi fa a nai du sani a wan letifasi?
7 Da wa si enke Gadu o meke sani waka a wan letifasi gi den sama di a kai, te den e bali kai en dei anga neti noh? Aw pasensi anga den tu.
8 Mi e taigi u taki aw meke sani waka a wan letifasi gi den namo, a naw daaidaai fu du a sani ya. Ma te a Manpikin fu libisama kon, aw fende sama a goontapu anga a sowtu biibi ya?’
9 A gi den sama di e si denseefi enke bunbun sama wan ageisitoli tu. Den sama ya á be e si taawan fu wan sani. A taigi den taki:
10 ‘Tu man be go na a tempel fu begi. Wan fu den a be wan Faliseiman, a taawan be e piki lantimoni.
11 A Faliseiman opo taampu neen a bigin begi aini en ati taki: “Gadu mi e gii daa taki mia de enke den taa sama, den sama di e fooseli taawan, den sama di nai du sani anga wan kiin ati, anga den sama di e libi wan wakalibi. Mi e gii daa tu taki mia de enke a man ya di e piki lantimoni.
12 A tu boo wan wiki mi e faste*, mi e gi du fu tin pisi fu ala san mi e fende.”
13 Ma a man di e piki lantimoni be taampu a faawe. Aa be wani opo ede luku gwa tapu seefi, bika sen be e kisi en fu den sondu fi en. Neen meke a taki: “Gadu, gaantangi soi tyali-ati gi mi baa, bika mi a wan sondu sama.”
14 Mi e taigi u taki, di a man ya daai go neen osu, Gadu be e si en enke wan sama di bun moo a Faliseiman. Bika Gadu o saka a sama di e hei enseefi. Ma aw hei a sama di e saka enseefi.’
15 Den sama be e tyai den pikin fu den kon a Yesesi fu a poti ana a den tapu da a belesi den. Di den bakaman fi en si a sani ya, den bali den sama.
16 Ma Yesesi taigi den sama fu den tyai den pikin kon neen. A taigi den taki: ‘Meke den pikin kon a mi, wa mu tapu den, bika a den sama di de enke den pikin ya, o fende a Kownukondee fu Gadu.
17 Biibi mi, efu wan sama nai biibi aini a Kownukondee fu Gadu enke fa wan pikinnengee e biibi sani, da noiti aw go aini a Kownukondee.’
18 Wan fu den fesiman fu den Dyu akisi en taki: ‘Bun Leliman, san mi mu du fu fende teego libi?’
19 Yesesi taigi en taki: ‘Saide ye kai mi Bun Leliman? Nawan sama bun, a Gadu wawan bun.
20 I sabi den weiti di e taki: “Ná libi wakalibi, ná kii sama, ná fufuu, ná lei, i mu lesipeki i mma anga i dda.”’
21 A man piki en taki: ‘Senten di mi nyoni neen mi e du ala den sani ya.’
22 Di Yesesi yee san a man taki, a taigi en taki: ‘I mu du ete wan sani. Go seli ala den sani di yu abi, dai paati a moni gi den pootiman, da yo fende wan gudu a hemel. Tei kaba dai kon toon mi bakaman.’
23 Di a yee san Yesesi taki, tyali kisi en bika a be abi tyaipi gudu.
24 Yesesi luku en neen a taki: ‘Ná pikin taanga aw taanga gi den sama di abi moni fu go aini a Kownukondee fu Gadu.
25 A moo makiliki gi wan kameili fu pasa a wan nanain-olo, moo gi wan guduman fu go aini a Kownukondee fu Gadu.’
26 Di den sama yee san a taki, den taki: ‘Da sama sa fende teego libi seefi?’
27 Neen a taigi den taki: ‘Den sani di libisama á poi du, a den sani de Gadu e du.’
28 Neen Peitilisi taki: ‘Ma u gwe fika ala san u be abi, neen u kon waka ai baka.’
29 Neen Yesesi taigi en taki: ‘Biibi mi, iniiwan sama di gwe fika en osu, en uman, en baala, en mma anga en dda, efuso en pikin fu a Kownukondee fu Gadu ede,
30 o fende teego libi aini a ten di e kon, ma aini a ten ya, aw fende moo enke san a lasi.’
31 Bakadati Yesesi bendi a se anga den twalufu apostel fi en, neen a taigi den taki: ‘Wo gwa Yelusalem, da ala den sani di den polofeiti be sikiifi fu a Manpikin fu libisama o kon tuu.
32 Den o tyai en go gi den taa kondee sama da den o soso en, den o du ogii anga en da den tufe neen.
33 Baka te den wipi en, den o kii en, ma aw kon a libi baka na a du fu dii dei.’
34 Ma den apostel á be fusutan den sani di a taki, bika a yuu á be doo ete fu den be fusutan den.
35 Di Yesesi be de koosube fu Yerikow, wan beendiman be sidon a sikinpasi e begi sama sani.
36 Di a yee a takitaki fu omen sama, a akisi den sai pasa.
37 Den taigi en taki: ‘A Yesesi fu Nasaleti e kon.’
38 Di a yee a sani ya, a bali taki: ‘Yesesi, Manpikin fu David, soi tyali-ati gi mi baa.’
39 Den sama di be e waka a fesi bali en taki a mu tapu en mofu. Ma a be e bali moo taanga taki: ‘Manpikin fu David, soi tyali-ati gi mi baa.’
40 Yesesi taampu neen a taigi den sama fu den tyai a man kon neen. Di a man doo, Yesesi akisi en taki:
41 ‘Sai wani mi du gii?’ A man taigi en taki: ‘Masaa, meke mi si baka baa.’
42 Neen Yesesi taigi en taki: ‘A biibi fii meke i betee, yo si baka.’
43 Faisi a taki a sani ya, neen a beendiman bigin si baka. A bigin waka a Yesesi baka, da a be e gafa Gadu. Di den sama si san pasa denseefi gafa Gadu.
A maiki
^ Luku a wowtu ‘faste’ na a pisi ‘San den wowtu ya wani taki.’
