Den sani di Lukasi sikiifi 22:1-71
-
Den pilisite e suku wan fasi fu kii Yesesi (1-6)
-
Den e seeka sani gi a lasiti Paskafesa (7-13)
-
A Membeefesa (14-20)
-
‘A sama di o konkuu mi, sidon anga mi a tafaa ya’ (21-23)
-
Den bakaman fu Yesesi bigin kwali anga denseefi on di fu den na a moo gaanwan (24-27)
-
A kuudei fu a kownukondee di Yesesi meke anga den bakaman fi en (28-30)
-
Yesesi taigi Peitilisi taki aw sitee taki aa sabi en (31-34)
-
Den mu de seekaseeka. Den tu fetihow (35-38)
-
A begi fu Yesesi na a Oleifi Mongo (39-46)
-
Den kisi Yesesi (47-53)
-
Peitilisi sitee taki aa sabi Yesesi (54-62)
-
Den e soso Yesesi (63-65)
-
Den tyai Yesesi gwa kuutu na a Sanhedrin (66-71)
22 A fesa fu beele sondee sowda* efuso a Paskafesa, be koosube.
2 Den fesiman fu den pilisite, anga den leliman fu a Weiti be e luku san na a moo bun fasi fa den be sa fende Yesesi kii, bika den be e feele a foluku.
3 Neen Saatan go aini Yudas Iskariot ati, wan fu den twalufu apostel.
4 Bakadati Yudas go a den fesiman fu den pilisite anga den fesiman fu a tempel fu taki fa a be sa konkuu Yesesi gi den.
5 Den poolo di den yee a sani ya, neen den paamisi en taki den o gi en moni*.
6 A piki den taki a bun, neen a bigin suku wan fasi fu konkuu Yesesi gi den sondee fu sama sabi.
7 A dei fu a fesa fu beele sondee sowda be doo. Na a dei ya den e tyai a Paska ofaandi.
8 Neen Yesesi taigi Peitilisi anga Yohanisi taki: ‘Go seeka a Paska nyanyan gi u fu u nyan.’
9 Den akisi en taki: ‘Pei wani u seeka en?’
10 A taigi den taki: ‘Di wo go aini a foto, wan man di e tyai wan goo anga wataa aini o kon miti u. U waka neen baka go aini a osu pe ai go.
11 Daw taigi a sama di abi a osu taki: “A Leliman taki: ‘Aini sowtu kambaa mi anga den bakaman fu mi sa nyan a Paska nyanyan?’”
12 Da a man ya o soi u wan gaan kambaa na a sodoo di abi ala sani aini. Na ape u mu seeka a Paska nyanyan.’
13 Den gwe, neen den si ala sani pilisisi enke fa a taigi den, neen den seeka sani fu holi a Paska.
14 Di a yuu doo, Yesesi go sidon a tafaa anga den apostel fi en.
15 Neen a taigi den taki: ‘Mi be e angii fu nyan a Paska nyanyan anga u, fosi den du ogii anga mi.
16 Bika mi e taigi u taki mi naw nyan a Paska nyanyan moo te enke ala sani fu a Paska kon tuu aini a Kownukondee fu Gadu.
17 A teke wan kan, neen a gi Gadu daa. Bakadati a taki: ‘U teke daw diingi paati.
18 Bika mi e taigi u taki, mi naw diingi win moo te enke a Kownukondee fu Gadu bigin tii.’
19 Bakadati a teke wan beele, a gi Gadu daa, a paati en gi den, neen a taki: ‘A beele ya wani taki mi sikin, di mio gi fu wi ede. U mu tan du a sani ya fu e membee mi.’
20 Na aseefi sani a du anga a kan di den kaba nyan. A taigi den taki: ‘A kan ya wani taki a nyun kuudei di o sete di mi buulu o kai a doti. A sani ya o tyai wini gi u.
21 Ma a sama di o konkuu mi, sidon anga mi a tafaa ya.
22 A tuu taki a Manpikin fu libisama o dede enke fa Gadu wowtu be taki a fesi, ma heelu fu a sama di o konkuu en.’
23 Neen den bigin akisi makandaa on di fu den be sa du sowan sani.
24 Boiti dati, den be bigin kwali anga denseefi on di fu den moo pelensipali.
25 Ma a taigi den taki: ‘Den kownu e basi den sama di den e tii. Sama e kai den wan di abi makiti bun-ati sama*.
26 Ma wa mu de enke den sama ya. Meke a moo gaanwan aw mindii de enke a moo pikinwan, a sama di e teke fesi, mu e dini taawan.
27 Sama moo bigi? A sama di sidon a tafaa e nyan efuso a wookoman di e tyai nyanyan gi en? A ná a wan di e sidon a tafaa noh? Ma a mi de enke a wookoman aw mindii.
28 A wi be e holibaka gi mi di tesi be e miti mi.
29 Neen meke mi e meke wan kuudei* anga u, leti enke fa Nda meke wan kuudei anga mi gi wan kownukondee,
30 fu u sa nyan diingi anga mi a mi tafaa aini a Kownukondee fu mi. Wo sidon a kownusutuu fu kuutu den 12 lo fu Islayeli.
31 Simon, Simon! Saatan taki leti enke fa sama e wai alisi puu buba, a so aw wai u puu a pasi.
32 Ma ná pikin begi mi begi gii fii biibi á swaki. Ma di yo kisi iseefi, dai mu taanga a biibi fu den baala fii.’
33 Neen Peitilisi taigi en taki: ‘Masaa, mi de kabakaba fu go anga i a sitaafu-osu, mi de kabakaba fu dede gii tu.’
34 Ma Yesesi taigi en taki: ‘Peitilisi mi e taigi i taki fosi wan kakafoo bali tide, yo taki dii boo taki ya sabi mi.’
35 A akisi den tu taki: ‘U be mankei wan sani di mi be sende u go peleiki sondee moni, nyanyan-saka efuso wan taa susu boiti di be de aw futu?’ Den piki en taki: ‘Nono.’
36 Bakadati a taigi den taki: ‘Ma now mi e taigi u taki, efu yu abi moni anga wan nyanyan-saka, i mu tyai den. Efii naabi fetihow, seli i dyakiti dai bai wan fetihow.
37 Bika mi e taigi u taki den sani di Gadu buku taki fu mi mu kon tuu. Ape sikiifi taki: “Den be e si en enke wan sama di nai wooko anga weiti.” A sani di Gadu buku taki ya e pasa anga mi nownow.’
38 Neen den taigi en taki: ‘Masaa, luku wi abi tu fetihow.’ Neen a taigi den taki: ‘Den tu ya sai.’
39 Di a komoto ape, a go na a Oleifi Mongo enke fa a be gwenti. Den bakaman fi en be go anga en.
40 Di den doo ape, a taigi den taki: ‘U mu e begi naamo, daw naw sondu te tesi miti u.’
41 A fika den ape neen a waka go pikinso moo faawe. A sutu kini a doti neen a bigin begi taki:
42 ‘Nda efii wani, da gaantangi puu a kan ya a mi fesi baa. Ma a ná san mi wani mu pasa, a sai wani mu pasa.’
43 Neen wan engel komoto a hemel, kon gi en taanga-sikin.
44 Ma sani be moo en te neen a bigin begi moo taanga, en sweti be kon de enke buulu di e doopu a doti.
45 Di a kaba begi, a waka gwa den bakaman fi en neen a si taki den e siibi, bika den be kusumi te neen den weli.
46 Neen a akisi den taki: ‘Saide we siibi? Wi opo, u mu e begi naamo, daw naw sondu te tesi miti u.’
47 Aa be kaba taki seefi neen Yudas wan fu den twalufu apostel tyai wan kulu sama kon ape. Neen a waka gwa Yesesi fu bosi en.
48 Ma Yesesi akisi en taki: ‘Yudas, ye seli a Manpikin fu libisama anga wan bosi?’
49 Di den sama di be de makandaa anga Yesesi si san be o pasa, den taki: ‘Masaa, u mu teke u fetihow fu feti anga den?’
50 Neen wan fu den teke en fetihow, neen a koti a letise yesi fu a saafu fu a gaan pilisite puu feleng.
51 Ma Yesesi taigi den taki: ‘U kaba!’ Bakadati a holi a yesi fu a saafu, neen a deesi en.
52 Bakadati Yesesi taigi den fesiman fu den pilisite, den fesiman fu a tempel, anga den gaanwan fu a foluku di be kon ape taki: ‘Anga fetihow anga kodya u kon kisi mi enke mi a fufuuman?
53 Di mi be de ala dei anga u aini a tempel, wa be e kon kisi mi. Ma a no fosi a yuu fu u doo, a yuu fu dunguu doo tu fu a du en wooko.’
54 Neen den kisi en tyai go na a osu fu a gaan pilisite. Peitilisi be e waka faawe a den baka.
55 Di den sama meke wan faya a mindii fu a dyali, Peitilisi go sidon anga den.
56 Ma di wan fu den uman di be e wooko aini a osu si a sidon e waan faya, a luku en duun neen a taki: ‘A man ya be de anga en tu.’
57 Ma a sitee taki: ‘Folow oo, mia sabi en.’
58 Aa langa seefi neen wan taa sama si en neen a taki: ‘Ya wan fu den tu.’ Ma Peitilisi taki: ‘A ná tuu.’
59 Baka wan sani fu wan yuu langa, wan taa man bigin taki: ‘A naabi misi, a man ya be de anga en, bika en a wan Galileyasama.’
60 Ma Peitilisi taki: ‘Mia sabi san ye taki.’ Aa kaba taki seefi neen wan kakafoo bali.
61 Di a sani ya pasa, Yesesi daai luku Peitilisi duun. Neen Peitilisi membee wanten san Yesesi be taigi en. A be taigi en taki: ‘Fosi wan kakafoo bali tide, yo taki dii boo taki ya sabi mi.’
62 Neen Peitilisi gwa doose neen a bali wan gaan adyumadye.
63 Den man di be kisi Yesesi be bigin soso en da den be e naki en.
64 Bakadati den tapu en fesi da den be e taigi en taki: ‘Efi ya wan polofeiti, da taigi u sama naki i.’
65 Den taki omen taa ogii fi en tu di be e soi taki den nai lesipeki Gadu.
66 Di peesi kiin, den gaanwan fu a foluku, den fesiman fu den pilisite anga den leliman fu a Weiti holi wan kuutu. Den tyai Yesesi go na a Sanhedrin* neen den taki:
67 ‘Taigi u efii na a Kelestesi.’ Ma Yesesi piki den taki: ‘Winsi mi taigi u seefi, toku u naw biibi mi.
68 Boiti dati efu a mi be akisi u wan sani, wa be o piki mi.
69 Ma fanafu now, a Manpikin fu libisama o sidon na a letise-ana fu a makiti Gadu.’
70 Di a taki a sani ya, ala den taki: ‘Da a yu na a Manpikin fu Gadu?’ Yesesi piki den taki: ‘A useefi taki so.’
71 Neen den taki: ‘Saide we suku kotoigi ete? Wa yee san enseefi mofu taki noh?’
A maiki
^ Luku a wowtu ‘sowda’ na a pisi ‘San den wowtu ya wani taki.’
^ Aini Giikitongo den be taki: ‘solufu moni.’
^ Sama di e du bun gi taawan.
^ Luku a wowtu ‘kuudei’ na a pisi ‘San den wowtu ya wani taki.’
^ A moo hei kuutu-osu fu den Dyu.
