Den sani di Lukasi sikiifi 23:1-56
23 Ala den opo, neen den tyai Yesesi gwa Pilatus.
2 Neen den bigin taki omen sani fu poli en nen. Den taki: ‘A man ya e gi a foluku taanga-sikin fu taangayesi lanti. A taigi den taki den á mu pai lantimoni. Boiti dati a taki neen na a Kelestesi, a kownu.’
3 Pilatus akisi en taki: ‘A yu na a Kownu fu den Dyu?’ Neen Yesesi piki en taki: ‘A leti enke fai taki de.’
4 Bakadati Pilatus taigi den fesiman fu den pilisite anga den sama di be de ape taki: ‘Mia fende nawan fowtu na a man ya ye.’
5 Ma den be e taki naamo taki: ‘Den sani di ai leli sama e gi den taanga-sikin fu taangayesi lanti. A leli sama aini hii Yudeya. A bigin a Galileya, nownow a doo aw ya.’
6 Di Pilatus yee a sani de, a akisi den taki: ‘A man ya a wan Galileyasama?’
7 Di a fusutan taki Yesesi a be fu a pisi kondee pe Herodes be e tii, a sende en gwa Herodes di be de a Yelusalem a pisiten de.
8 A wan hii pisiten kaba Herodes be wani si Yesesi, neen meke a poolo te di a si en. A be yee fu den somen sani di Yesesi be e du, neen meke a be wani a du wan wonduu fu a si.
9 Herodes bigin poti omen akisi gi Yesesi, ma Yesesi á be piki en nawan mofu.
10 Den fesiman fu den pilisite anga den leliman fu a Weiti be taampu ape e ligei. Den be e taki omen sani fu Yesesi.
11 Herodes anga den suudati fi en be e wisiwasi Yesesi. Den wei wan moin koosi gi en fu soso en. Bakadati Herodes sende en gwa Pilatus baka.
12 Fosi Herodes anga Pilatus á be e koti, ma aseefi dei de den toon mati wanten.
13 Pilatus kai den fesiman fu den pilisite, den tiiman, anga a foluku kon a wan, neen a taigi den taki:
14 ‘U be tyai a man ya kon a mi taki ai gi a foluku taanga-sikin fu taangayesi lanti. A omen akisi mi poti gi en leti aw fesi ya, ma mi si taki aa du nawan fu den ogii di u taki a du.
15 Herodes seefi á fende nawan fowtu neen, neen meke a sende en kon ya baka. Aa du nawan sani fu a mu dede.
16 Mio sitaafu en, da mi losi en.’
17 *——
18 Ma ala den sama bali taki: ‘Kii a man ya dai losi Barabas gi u.’
19 (Barabas a be wan kiiman. Den be sooto en fu di en anga wan kulu sama be e ligei anga den tiiman.)
20 Ma Pilatus taki anga den ete wan leisi bika a be wani losi Yesesi.
21 Neen ala den bigin bali taki: ‘Kii en*! Kii en!’
22 Neen Pilatus akisi den du fu dii toon taki: ‘Saide? Sowtu ogii a man ya du? Mia fende nawan fowtu neen fu a mu dede. Mio meke den wipi en da mi losi en.’
23 Di Pilatus taki a sani de, den bali taki Yesesi mu dede. Den ligei te,
24 neen Pilatus taki aw du san den wani.
25 A losi a man di den be akisi en fu losi gi den, a kiiman di be e feti anga lanti. Neen a meke den du san den wani anga Yesesi.
26 Di den be e tyai en gwe, den miti Simon, wan man fu Sireine di be komoto a doose fu a foto. Neen den dwengi en fu tyai a ponsu fu Yesesi.
27 Wan gaan kulu sama be e waka a Yesesi baka. Wantu uman be e waka neen baka. Den be poti den ana a den mindii ede e bali e kee*.
28 Yesesi daai luku den uman, neen a taigi den taki: ‘Umanpikin fu Yelusalem, wa kee gi mi moo. U kee gi useefi anga den pikin fu u.
29 Wan ten o kon te sama o taki: “Koloku fu den uman di á poi meke pikin, koloku fu den uman di á meke pikin, anga den uman di á gi pikin bobi.”
30 Da den o taigi den mongo taki: “Tapu u!” Den o taigi den pikin mongo taki: “Kibii u.”
31 Efu den sani ya e pasa te a bon de a libi, da saw pasa te a bon dee?’
32 Den be e tyai tu taa man go kii makandaa anga Yesesi. Den man ya a be ogiiman.
33 Di den doo a peesi di den e kai Ede-kaabasi, den sipikii Yesesi a wan ponsu a den tu ogiiman mindii. Wan neen letise, a taawan neen kukutuse.
34 Ma Yesesi taki: ‘Nda, gi den paadon baa, bika den á sabi san den e du.’ Bakadati, den suudati iti lowte fu luku sama be o fende den koosi fi en.
35 Den sama be taampu e luku sai pasa. Ma den sama di be e teke fesi be e soso en. Den be e taki: ‘A be e yeepi taa sama, efi en na a Kelestesi di Gadu sende, da meke a yeepi enseefi noh.’
36 Den suudati seefi be e soso en, den tyai suwa win go gi en.
37 Den be e taigi en taki: ‘Efu ai na a Kownu fu den Dyu, da yeepi iseefi noh.’
38 Den be sipikii wan sani poti na a ede fu a ponsu fu soi saide den be kii en. Den be sikiifi taki: ‘Disi na a Kownu fu den Dyu.’
39 Ma wan fu den ogiiman di den be sipikii neen se bigin soso en. A be taki: ‘I taki ai na a Kelestesi, fii iseefi dai fii u tu noh.’
40 Ma a taa man bali en taki: ‘Winsi fai fende aseefi sitaafu fu a man ya, tokuso i nai feele Gadu wan pikinso seefi noh?
41 U dati na a sitaafu fu den ogii di u du we fende. Ma a man ya dati á du nawan ogii.’
42 Bakadati a taki: ‘Yesesi, membee mi baa tei toon Kownu.’
43 Neen Yesesi taigi en taki: ‘Biibi mi, tide mi e taigi i taki yo de anga mi aini Paladeisi*.’
44 A be de wan sani fu twalufu yuu mindii dei, tokuso a hii kondee be dunguu pii te enke dii yuu bakadina,
45 bika a san á be e pii. Bakadati a gaan koosi di be tapu a santa peesi fu a tempel piiti a tu.
46 Neen Yesesi bali taki: ‘Nda, mi libi de aini yu ana ye.’ Baka di a taki a sani ya, neen en boo koti.
47 Di wan fu den suudati-edeman si san pasa, a bigin gafa Gadu. A taki: ‘A man ya á be du nawan ogii tuu baa.’
48 Di ala den sama di be kon ape fu luku a dede fu Yesesi si den sani di pasa, den daai gwa den osu baka anga gaan buduufu na ati.
49 Ala den sama di be sabi en be taampu a faawe e luku. Den uman di be komoto anga en a Galileya be taampu e luku sai pasa tu.
50 Wan man fu a Sanhedrin* be de ape di den e kai Yowsefu. A man ya a be wan bun man, a be e du sani a wan letifasi.
51 (Aa be holibaka gi den di den be e suku wan fasi fu kii Yesesi.) A man ya a be fu Arimateya, wan foto fu Yudeya. Enseefi be e wakiti a Kownukondee fu Gadu.
52 A man ya gwa Pilatus, neen a akisi en fu a sa teke a dedesikin fu Yesesi.
53 A puu a dedesikin fu Yesesi na a ponsu, neen a lolo en aini wan dii linnen koosi. Bakadati a poti en aini wan geebi-olo pe den á be poti sama ete.
54 A dei de a be a dei di den be e seeka sani fu holi a Sabat. Di neti be o doo, da a Sabadei be o bigin.
55 Ma den uman di be komoto anga Yesesi a Galileya, be go luku a geebi fu si pe den be poti en.
56 Bakadati den daai gwa osu fu seeka sumee switi uwii anga sumee switi oli. Ma di a Sabadei bigin den teke boo enke fa a Weiti e taki.
A maiki
^ Son Beibel abi a vers ya, ma aa de aini omen fu den pelensipali Giiki bukulolo.
^ Aini Giikitongo den be taki: ‘u spikii en a wan ponsu.’
^ Aini Giikitongo den be taki: ‘den be e naki den boofu-ati fu soi taki den e tyali.’
^ Luku a wowtu ‘Paladeisi’ na a pisi ‘San den wowtu ya wani taki.’
^ A moo hei kuutu-osu fu den Dyu.
