Den sani di Lukasi sikiifi 4:1-44
-
Didibii kon tesi Yesesi (1-13)
-
Yesesi bigin peleiki aini Galileya (14, 15)
-
Den sama fu Nasaleti á be wani aliki Yesesi (16-30)
-
Yesesi de aini a snoga fu Kaperna-um (31-37)
-
Yesesi deesi a main fu Simon. A deesi taa sama tu (38-41)
-
Yesesi wawan be de a wan peesi. Den sama suku en te neen den go si en (42-44)
4 Di Yesesi komoto na a Yordaan liba, Gadu gi en a santa yeye fi en, neen a yeye fu Gadu tyai en go aini a sabana.
2 A be tan ape 40 dei sondee nyan, neen meke angii be e kii en. Didibii* kon tesi en,
3 neen a taigi en taki: ‘Efi ya wan manpikin fu Gadu, da meke den siton ya toon beele* osi.’
4 Ma Yesesi taigi en taki: ‘Gadu buku taki: “Libisama á mu libi fu beele wawan.”’
5 Bakadati Didibii tyai en gwa wan gaan hei peesi, neen a soi en ala den kondee fu goontapu.
6 Neen a taigi en taki: ‘Mio gii den gudu fu ala den kondee ya anga a makiti fu taki fu den, bika a mi abi den. A sama mi wani mi e gi den.
7 Neen meke mio gii ala den, efii dini mi wan leisi namo.’
8 Yesesi piki en taki: ‘Gadu buku taki: “A Yehofa* i Gadu wawan i mu sutu kini a doti begi, neen wawan too i mu dini.”’
9 Bakadati Didibii tyai en gwa Yelusalem, a poti en na a moo hei pisi fu a tempel, neen a taigi en taki: ‘Efi ya wan manpikin fu Gadu, da dyombo gwa ondoo,
10 bika Gadu buku taki: “Aw meke den engel fi en kon yeepi i fu sani á du i.
11 Den o fanga i fi ya naki i futu a siton.”’
12 Ma Yesesi piki en taki: ‘Gadu buku taki: “Ya mu du sani fuseefi fu si efu Yehofa* i Gadu o yeepi i.”’
13 Di Didibii kaba tesi en, a gwe fu kon neen baka a wan moo bun yuu.
14 Bakadati Yesesi daai gwa Galileya baka. A yeye fu Gadu be de anga en. Den sama fu a pisi de be e taki fu den bun sani di a be e du.
15 A be e leli den aini den snoga* di be de ape. Ala sama be e gafa en.
16 Bakadati a gwa Nasaleti a pe a be kiya. Di a doo ape, a go aini a snoga* enke fa a be gwenti a Sabadei, neen a opo taampu fu leisi a wowtu fu Gadu.
17 Wan sama gi en a bukulolo* fu polofeiti Yesaya. A opo a bukulolo neen a suku a pisi pe sikiifi taki:
18 ‘A yeye fu Yehofa* de anga mi, a gi mi a wooko* fu paati a bun nyunsu* gi den pootiman. A sende mi fu taigi den sama di de a katibo taki den o fii, a sende mi fu taigi den beendiman taki den o si baka. A sende mi fu fii den sama di e pina.
19 A sende mi fu paati a bosikopu taki a yuu doo fu Yehofa* soi bun-ati gi sama.’
20 Di a kaba, a lolo a bukulolo tapu, a langa en gi a sama di e seeka sani aini a snoga* neen a go sidon. Ala den sama di be de aini a snoga be fika e luku en.
21 Bakadati a taigi den taki: ‘Tide den sani di mi leisi ya, kon tuu.’
22 Neen ala den sama bigin gafa en. Den be e foondoo fu den bun sani di a be taki. Den be e taki: ‘A na a manpikin fu Yowsefu de ya noh?’
23 Neen a taigi den taki: ‘Mi sabi taki wo koti a nongo ya gi mi. Wo taki: “Deesi iseefi noh, di na i taki ya wan dataa. U yee den sani dii du aini Kaperna-um, du denseefi sani de na a pisi kondee fii tu.”’
24 Neen meke a taigi den taki: ‘Noiti sama e lesipeki wan polofeiti na a pisi pe a kiya.
25 Pakisei a ten fu Eliya: Wan gaan angiiten be de aini a kondee bika alen á be kai dii yali anga sigisi mun. A omen uman di man dede kaba be de aini Islayeli a ten de.
26 Tokuso Gadu á sende Eliya gwa nawan fu den uman ya. Ma a sende en gwa wan uman fu Sarfat aini a kondee Sidon, a uman ya man be dede kaba.
27 Na a ten fu polofeiti Elisa, a omen gwasiman be de aini Islayeli, toku aa deesi nawan fu den. A Naaman, a man fu Siriya wawan a be deesi.’
28 Ala den sama di be de aini a snoga* ati boon di den yee san a taki.
29 Den opo, neen den tyai en gwa doose fu a foto. Den tyai en go na a lanki fu a mongo pe a foto be de, bika den be wani toto en gwa ondoo.
30 Ma a komoto a den mindii, neen a gwe.
31 Bakadati a gwa Kaperna-um wan foto aini Galileya. A be e leli den sama na a Sabadei.
32 Den be e foondoo fu a fasi fa a be e leli den, bika a be e taki enke wan sama di abi makiti.
33 Wan man be de aini a snoga* di be abi wan takuu yeye neen tapu. A bali taanga taki:
34 ‘Yesesi fu Nasaleti sai kon du ya? A kon i kon kii u? Mi sabi sama a yu oo. Ai na a Santawan fu Gadu.’
35 Ma Yesesi bali a takuu yeye taki: ‘De pii dai komoto na a man tapu. A takuu yeye towe a man a doti a den sama fesi, neen a komoto neen tapu sondee fu gi en mankei.’
36 Ala den sama be foondoo, den be e taigi denseefi taki: ‘U yee den sani di ai taki? A abi a makiti anga a kaakiti fu taigi den takuu yeye san den mu du, da den e du san a taki.’
37 Sama be e taki fu den bun sani di a be e du na a hii pisi kondee de.
38 Di a komoto na a snoga* a gwa Simon osu. Wan taanga feba be naki a main fu Simon, neen meke den akisi Yesesi fu yeepi en.
39 Yesesi go taampu a pe a uman be didon neen a deesi en, a so a feba saka. Faisi a uman betee, a bigin seeka sani gi den fu nyan.
40 Di a san be e saka, den sama tyai ala den sama fu den di be siki kon a Yesesi. A poti ana a ibiiwan fu den tapu, neen a deesi den.
41 A be puu takuu yeye a omen sama tapu. Den takuu yeye be e bali taki: ‘Ai na a Manpikin fu Gadu.’ Ma a be e bali den. Aa be wani den taki, bika den be sabi taki neen na a Kelestesi.
42 A komoto ape a taa dei, neen a gwa wan peesi pe en wawan be sa de. Ma den sama suku en te neen den go si en. Den begi en fu a tan anga den.
43 Ma a taigi den taki: ‘Mi mu paati a bun nyunsu fu a Kownukondee fu Gadu* a den taa foto tu, bika a fu a sani ya ede Gadu sende mi kon a goontapu.’
44 Neen a go paati a bun nyunsu aini den snoga* a Yudeya.
A maiki
^ Luku a wowtu ‘Didibii’ na a pisi ‘San den wowtu ya wani taki.’
^ Efuso ‘nyanyan’.
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ A peesi pe den Dyu be e go fu dini Gadu.
^ Luku a wowtu ‘snoga’ na a pisi ‘San den wowtu ya wani taki.’
^ Luku a wowtu ‘bukulolo’ na a pisi ‘San den wowtu ya wani taki.’
^ Aini Giikitongo den be taki: ‘salufu.’ Luku a wowtu ‘salufu’ na a pisi ‘San den wowtu ya wani taki.’
^ Luku den wowtu ‘bun nyunsu’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ A peesi pe den Dyu be e go fu dini Gadu.
^ A peesi pe den Dyu be e go fu dini Gadu.
^ A peesi pe den Dyu be e go fu dini Gadu.
^ A peesi pe den Dyu be e go fu dini Gadu.
^ Luku den wowtu ‘Kownukondee fu Gadu’ na a pisi ‘San den wowtu ya wani taki.’
^ A peesi pe den Dyu be e go fu dini Gadu.
