Den sani di Lukasi sikiifi 5:1-39
5 Wan dei di a be taampu koosube fu a ze fu Geneisaret, wan kulu sama be e toto kon neen fu aliki a wowtu fu Gadu.
2 A si tu boto na a lanpeesi. Ma den fisiman be komoto aini den boto fu wasi den seepi fu den.
3 A go aini a boto fu Simon neen a akisi en fu toosi a boto gwa mindii. Bakadati a sidon aini a boto neen a bigin leli den sama.
4 Di a kaba taki anga den sama, a taigi Simon taki: ‘Puu go na a dipi daw towe den seepi.’
5 Ma Simon taigi en taki: ‘Leliman a hii neti u towe den seepi ma wa kisi nawan sani, ma di na i taki so da mio puubei baka.’
6 Di den du a sani ya, den kisi fisi ipi te neen den seepi fu den bigin piiti.
7 Neen meke den kai den man di be de aini a taa boto fu kon yeepi den. Di den kon, den simpan ala den tu boto anga fisi te pikinmoo den sungu.
8 Di Simon Peitilisi si san pasa, a sutu kini a Yesesi fesi neen a taigi en taki: ‘Masaa mia fiti fu de ai se, bika mi a wan sondu sama.’
9 En anga den taa sama di be de ape be foondoo fu den somen fisi di den kisi, neen meke a be taki a sani ya.
10 Yakowbesi anga Yohanisi, den manpikin fu Sebedeyus be foondoo tu. Ma Yesesi taigi Simon taki: ‘Ná feele moo. Fanafu tide yo kisi libisama enke fa ye kisi fisi.’
11 Bakadati den tyai den boto fu den gwa lanpeesi, den fika ala den sani fu den ape, neen den waka neen baka.
12 Wan taa leisi di Yesesi be de aini wan fu den foto, wan man be de ape di be abi gwasi* neen hii sikin. Di a si Yesesi, a kai anga fesi a doti neen a bigin begi en taki: ‘Masaa, efii wani, da gaantangi deesi mi baa.’
13 Yesesi langa ana holi a man, neen a taki: ‘Mi wani. Mio meke i betee.’ Faisi a taki so, a man betee wanten, aa be abi gwasi moo.
14 A taigi a man taki: ‘Ná taigi nawan sama san mi du gii, ma go meke a pilisite luku i. Tyai wan ofaandi fu dii betee enke fa a Weiti fu Mosesi e taki, fu soi taki i betee tuu.’
15 Moo anga moo sama be e taki fu Yesesi. Gaan kulu sama be e kon aliki en, den sama di be siki be e kon fu a deesi den.
16 Winsi fa a be e du den sani ya, toku a be lobi go a peesi pe nawan sama á de, fu begi.
17 Wan dei a be de aini wan osu e leli sama. Den Faliseiman* anga den leliman fu a Weiti di be komoto a Galileya, Yudeya, anga Yelusalem seefi be sidon e aliki en. Yehofa* be gi en a kaakiti fu deesi den sama di siki.
18 Wantu man be tyai wan lanman a wan bedi* tapu kon de. Den be e suku fasi fu tyai en gwa inise a pe Yesesi be de.
19 Ma den á be poi doo anga en a inise, bika wan gaan kulu sama be de ape. Neen meke den subi gwa tapu neen den puu wan pisi fu a daki. Bakadati den saka a man anga a bedi go leti a Yesesi fesi.
20 Di a si a biibi fu den sama, a taigi a man taki: ‘Mi gii paadon fu den sondu fii.’
21 Neen meke den leliman fu a Weiti anga den Faliseiman bigin taki: ‘Sama na a man di nai lesipeki Gadu ya? Sama poi gi taawan paadon fu sondu boiti Gadu?’
22 Ma Yesesi be fusutan den, neen meke a akisi den taki: ‘Saide meke we denki so du?
23 San moo makiliki? Fu taigi wan sama taki: “Mi gii paadon fii sondu” efuso fu taigi en taki: “Opo taampu dai waka.”
24 Ma mi wani u sabi taki a Manpikin fu libisama abi a makiti a goontapu fu gi sama paadon fu den sondu.’ Bakadati a taigi a lanman taki: ‘Mi e taigi i, opo teke i bedi dai gwa yu osu.’
25 Di Yesesi taki a sani ya, a man opo teke en bedi neen a go neen osu. A be e gafa Gadu.
26 Ala den sama di be de ape be e foondoo. Den be bigin gafa Gadu taki: ‘A fositoon u si den sani ya.’
27 Bakadati a gwa doose, neen a si wan man di be e piki lantimoni den e kai Leifi sidon na a kantoo pe sama e go pai lantimoni. A taigi en taki: ‘Kon waka a mi baka*.’
28 Leifi gwe fika ala sani, neen a bigin waka neen baka.
29 Bakadati Leifi seeka wan gaan nyanyan gi Yesesi neen osu. Omen sama di be e piki lantimoni anga taa sama be sidon e nyan anga den.
30 Di den Faliseiman anga den leliman fu a Weiti si a sani ya den bigin kuutu. Den akisi den bakaman fu Yesesi taki: ‘Saide we nyan e diingi anga sama di e piki lantimoni anga den sama di e libi wan sondu libi?’
31 Ma Yesesi taigi den taki: ‘Gusontu sama naabi dataa fanowdu, a siki sama abi dataa fanowdu.
32 Mia kon a goontapu gi bun sama, ma mi kon fu yeepi den sondu sama fu daai den libi.’
33 Den taigi Yesesi taki: ‘Den bakaman fu Yohanisi e faste*, den e begi fayafaya. Na aseefi sani den bakaman fu den Faliseiman e du tu. Ma den bakaman fii dati e nyan e diingi.’
34 Yesesi taigi den taki: ‘Den mati fu a man di e toow nai faste* te a de makandaa anga den. Ná so noh?
35 Ma a ten o doo te sama o puu a man di e toow a den mindii. A te a sani ya pasa fosi den o faste*.’
36 A gi den wan ageisitoli tu. A taigi den taki: ‘Nawan sama e koti wan nyun pisi koosi fu nain miti anga wan gaandiwan. Efu a be o du a sani ya, da a nyun pisi koosi o piiti komoto. Te go taki a nyun pisi koosi nai fiti anga a gaandiwan.
37 A letiso nawan sama e poti nyun win aini gaandi winsaka*. Efu a du a sani ya, a nyun win o piiti a winsaka da a win o doo kai. A winsaka seefi o poli.
38 Ma nyun win mu go aini nyun winsaka.
39 Nawan sama di diingi gaandi win e wani diingi nyun win, bika ai taki: “A gaandi win switi.”’
A maiki
^ Luku a wowtu ‘gwasi’ na a pisi ‘San den wowtu ya wani taki.’
^ Luku a wowtu ‘Faliseiman’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Efuso ‘daagi’.
^ Aini Giikitongo den be taki: ‘toon mi bakaman.’
^ Te wan sama e tan sondee fu nyan wan pisiten.
^ Te wan sama e tan sondee fu nyan wan pisiten.
^ Te wan sama e tan sondee fu nyan wan pisiten.
^ Den saka ya be e meke anga metibuba.
