Den sani di Malikisi sikiifi 1:1-45
-
Yohanisi a Dopuman e peleiki (1-8)
-
A dopu fu Yesesi (9-11)
-
Saatan e tesi Yesesi (12, 13)
-
Yesesi bigin peleiki a Galileya (14, 15)
-
Den fosi sama di Yesesi kai fu toon en bakaman (16-20)
-
Yesesi e puu takuu yeye a sama tapu (21-28)
-
Yesesi deesi omen sama aini Kaperna-um (29-34)
-
Yesesi go a wan peesi pe en wawan be de fu begi (35-39)
-
Yesesi deesi wan gwasiman (40-45)
1 Disi na a bigin fu a bun nyunsu fu Yesesi Kelestesi*, a Manpikin fu Gadu:
2 Polofeiti Yesaya be sikiifi taki: ‘(Luku, mio sende mi bosikopuman go ai fesi fu seeka a pasi gii.)
3 Wan sama e bali aini a sabana taki: “U seeka a pasi gi Yehofa*! U kiin a pasi fi en.”’
4 Yohanisi a Dopuman be de aini a sabana e leli sama taki den mu dopu*. A be taigi den taki efu den be wani Gadu gi den paadon fu den sondu fu den, den be mu dopu fu soi taki den sani di den du e hati den.
5 Ala den sama fu Yudeya anga den sama fu Yelusalem be e kon a Yohanisi. Den be e taki na ala sama fesi sowtu sondu den du, da a be e dopu den aini Yordaan liba.
6 Yohanisi be e wei* koosi di meke anga kameili uwii, a be e wei wan lelibuba neen mindii. A makonkon* anga oniki a be e nyan.
7 A be e taigi sama taki: ‘Wan sama di abi makiti moo mi mu kon ete. Mia fiti seefi fu losi den tetei fi en susu.
8 Mi dopu wi anga wataa, ma aw dopu wi anga santa yeye.’
9 A pisiten de, Yesesi komoto a Nasaleti a Galileya, neen Yohanisi dopu en aini Yordaan liba.
10 Faisi Yesesi opo kon a tapu, a si hemel opo, neen a yeye fu Gadu saka kon neen tapu enke wan doifi.
11 Neen den yee Gadu taki komoto a tapu taki: ‘Yu a mi manpikin, mi lobi i, ye meke mi piisii.’
12 Faisi Yesesi dopu, a yeye fu Gadu tyai en go aini a sabana.
13 Yesesi tan 40 dei langa aini a sabana. Di a be de ape, Saatan kon tesi en. Ogii meti be de aini a sabana tu, ma den engel* be e yeepi* en.
14 Baka di Yohanisi sooto, Yesesi gwa Galileya fu paati a bun nyunsu fu Gadu.
15 A be e taigi den sama taki: ‘A yuu doo. Gadu Kownukondee* koosube. U daai u libi*, daw biibi a bun nyunsu fu Gadu.’
16 Di a be e waka na a lanpeesi fu a ze fu Galileya, a si Simon anga en baala Andreyas e towe seepi, bika den a be fisiman.
17 Neen Yesesi taigi den taki: ‘U waka a mi baka, da mio soi u faw sa kisi libisama enke fa we kisi fisi.’
18 Di a taki a sani ya, den á daaidaai, den fika den seepi fu den neen den bigin waka neen baka.
19 Di a waka go moo faawe, a si tu manpikin fu Sebedeyus di den e kai Yakowbesi anga Yohanisi. Den be de aini den boto e seeka den seepi.
20 Yesesi á daaidaai fu kai den. Di a kai den, den fika den dda Sebedeyus anga den wookoman aini a boto, neen den go waka neen baka.
21 Bakadati den gwa Kaperna-um.
Faisi a Sabadei bigin, Yesesi go aini a snoga* neen a bigin leli sama.
22 Den sama be e foondoo fu a fasi fa a be e leli den. Bika a be e leli den enke wan sama di Gadu gi makiti. Aa be e leli den enke den leliman fu a Weiti*.
23 Wan man di be abi wan takuu yeye neen tapu be de aini a snoga tu. A man ya bali taki:
24 ‘Yesesi fu Nasaleti sai kon du ya? A kon i kon kii u? Mi sabi sama a yu oo. Ai na a Santawan fu Gadu.’
25 Ma Yesesi bali en taki: ‘De pii, dai komoto na a man tapu.’
26 A takuu yeye naki a man towe a doti te ala en sikin e dansi. Bakadati a bali taanga, neen a komoto na a man tapu.
27 Den sama foondoo te neen den bigin taki: ‘San a disi? A gei wan nyun leli. A abi a makiti fu puu takuu yeye a sama tapu. Den takuu yeye seefi e aliki en.’
28 Sama paati a taki fu den sani di Yesesi du aini hii Galileya.
29 Di den komoto aini a snoga, den go na a osu fu Simon anga Andreyas. Yakowbesi anga Yohanisi be go anga den tu.
30 A main fu Simon be didon a bedi, bika a be abi feba. Den taigi Yesesi wanten taki a uman ya siki.
31 Di Yesesi waka go neen, a holi en ana, neen a yeepi en fu a opo. A so a uman betee wanten, neen a bigin seeka sani gi den fu nyan.
32 Di a san saka, den sama bigin tyai omen sama di be siki, anga sama di takuu yeye be e fooseli kon a Yesesi.
33 Ala den sama fu a foto kon taampu na a doomofu.
34 A deesi omen sama di be abi ala sowtu siki. A puu takuu yeye a sama tapu, ma aa be gi den takuu yeye a okasi fu taki sama neen, bika den be sabi taki neen na a Kelestesi.
35 A fuuku mmanten fosi peesi kiin, a opo gwa doose go suku wan koo peesi pe en wawan be sa de, neen a bigin begi.
36 Ma Simon anga den taa sama di be de anga en go suku pe a de.
37 Di den fende en, den taigi en taki: ‘Ala sama e suku yu oo.’
38 Ma a taigi den taki: ‘Meke u gwa wan taa peesi. Wo gwa den pikin foto di de koosube fu mi sa paati a bun nyunsu gi den sama ape, bika a fu dati mi kon ya.’
39 A paati a bun nyunsu aini den snoga aini hii Galileya. A be e puu takuu yeye a sama tapu tu.
40 Wan gwasiman kon a Yesesi, neen a sutu kini a doti begi en taki: ‘Efii wani, da gaantangi deesi mi baa.’
41 Tyali fu a man kisi Yesesi, neen meke a langa ana holi en neen a taigi en taki: ‘Eeye mi wani i betee.’
42 Faisi a taki so, a man betee wanten, aa be abi gwasi moo.
43 Fosi Yesesi sende a man gwe, a bali en taki:
44 ‘Ya mu taigi nawan sama san pasa ye. Go meke a pilisite luku i fu a si taki i betee, dai tyai a ofaandi leti enke fa a Weiti fu Mosesi e taki.’
45 Ma di a man gwe, a paati a taki na ala se. Yesesi á be poi go aini wan foto moo sondee fu sama booko kon neen. Neen meke a be e suku peesi fu tan a doose fu den foto pe tyaipi sama á de. Tokuso sama be e komoto na ala se e kon neen.
A maiki
^ Luku a wowtu ‘Kelestesi’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘dopu’ na a pisi ‘San den wowtu ya wani taki.’
^ Efuso ‘weli koosi’.
^ Luku a wowtu ‘makonkon’ na a pisi ‘San den wowtu ya wani taki.’
^ Luku a wowtu ‘engel’ na a pisi ‘San den wowtu ya wani taki.’
^ Den be gi en nyanyan, den be gi en taanga-sikin.
^ Luku den wowtu ‘A Kownukondee fu Gadu’ na a pisi ‘San den wowtu ya wani taki.’
^ Efuso ‘kengi a fasi fa we denki’. Luku a wowtu ‘daai libi’ na a pisi ‘San den wowtu ya wani taki.’
^ A peesi pe den Dyu be e go fu dini Gadu.
^ Luku a wowtu ‘Weiti’ na a pisi ‘San den wowtu ya wani taki.’
