Den sani di Malikisi sikiifi 10:1-52
-
Toow anga booko toow (1-12)
-
Yesesi e belesi den pikin (13-16)
-
Wan guduman e akisi Yesesi wan sani (17-25)
-
Sani di sama e fika fu man go aini a Kownukondee (26-31)
-
Yesesi taigi den ete wan leisi taki aw dede (32-34)
-
Yakowbesi anga Yohanisi e akisi Yesesi wan sani (35-45)
-
Yesesi kon gi en libi enke wan paiman fu fii omen sama (45)
-
-
Yesesi deesi a beendiman Bartimeyus (46-52)
10 Di a komoto ape, a go na a pisi fu Yudeya na abaase fu Yordaan liba. Di a doo ape, wan gaan kulu sama kon neen, neen a bigin leli den enke fa a be gwenti.
2 Den Faliseiman be wani tesi en, neen meke den akisi en taki: ‘Wan man sa booko toow anga en uman?’
3 A piki den taki: ‘San Mosesi be taigi u?’
4 Den taki: ‘Mosesi be taki wan man sa towe en uman, da a gi en wan pampila di e soi taki a booko toow anga en.’
5 Ma Yesesi taigi den taki: ‘A di u nai teke taki meke a be gi wi a weiti ya.
6 Ma fanafu a bigin, “Gadu be meke den enke man anga uman.
7 Neen meke wan man o gwe fika en mma anga en dda,
8 da en anga en uman o toon wan sikin”, den naw de tu sikin moo, ma wan sikin.
9 Neen meke nawan sama mu paati san Gadu tyai kon a wan.’
10 Di den be de aini a osu, den bakaman fi en kon akisi en san a be wani taki anga a sani ya.
11 A taigi den taki: ‘Efu wan man booko toow anga en uman, da a toow anga wan taa uman, da a waka a waka gi en uman.
12 Efu wan uman booko toow anga en man neen a toow anga wan taa man, da a waka gi en man.’
13 Den sama be e tyai den pikinnengee kon a Yesesi fu a poti ana a den tapu da a belesi den, ma den bakaman fi en bali den sama.
14 Di Yesesi si a sani ya, en ati boon neen a taigi den taki: ‘Meke den pikin kon a mi, wa mu tapu den, bika a den sama di de enke den pikin ya o fende a Kownukondee fu Gadu.
15 Biibi mi, efu wan sama nai biibi aini a Kownukondee fu Gadu enke fa wan pikinnengee e biibi sani, da noiti aw go aini a Kownukondee.’
16 A baasa den pikin, a poti en ana a den tapu, neen a belesi den.
17 Di a be de a pasi e gwe, wan man lon kon neen. A kai anga kini a doti neen fesi, neen a akisi en taki: ‘Bun Leliman, san mi mu du fu fende teego libi?’
18 Yesesi taigi en taki: ‘Saide ye kai mi Bun Leliman? Nawan sama bun, a Gadu wawan bun.
19 I sabi den weiti di e taki: “Ná kii sama, ná libi wakalibi, ná fufuu, ná lei, ná bidiigi taawan, lesipeki i mma anga i dda.”’
20 A man piki en taki: ‘Leliman, senten di mi nyoni neen mi e du ala den sani ya.’
21 Di Yesesi luku a man, a be lobi en, neen meke a taigi en taki: ‘Wan sani e mankei ete. Go seli den sani di yu abi, paati a moni gi den pootiman, da yo fende wan gudu a hemel. Tei kaba dai kon toon mi bakaman.’
22 Di a yee san Yesesi taki, a daai gwe tyokoo* bika a be abi tyaipi gudu.
23 Baka di Yesesi luku lontu, a taigi den bakaman fi en taki: ‘Ná pikin taanga aw taanga gi den sama di abi tyaipi moni fu go aini a Kownukondee fu Gadu.’
24 Den bakaman fu Yesesi be foondoo di den yee san a taki, neen meke a taigi den taki: ‘Ná pikin taanga a taanga fu go aini a Kownukondee fu Gadu.
25 A moo makiliki gi wan kameili fu pasa a wan nanain-olo, moo enke gi wan guduman fu go aini a Kownukondee fu Gadu.’
26 Den bakaman fi en moo foondoo, neen meke den taki: ‘Da sama sa fende a teego libi seefi?’
27 Yesesi luku den duun, neen a taki: ‘Libisama e si enke a sani ya á poi, ma Gadu poi du ala sani.’
28 Peitilisi taigi en taki: ‘Da fa fu wi, bika u gwe fika ala san u be abi neen u kon waka ai baka.’
29 Neen Yesesi taki: ‘Biibi mi, iniiwan sama di gwe fika en osu, en baala, en sisa, en mma, en dda, en pikin, anga en goon fu di en a mi bakaman, efuso fu a bun nyunsu ede,
30 o fende 100 toon moo san a be abi aini a ten ya. Aw fende osu, baala, sisa, mma, pikin, anga goon. Sani o miti en tu, ma aini a ten di e kon aw fende teego libi.
31 A omen fu den fosiwan o toon lasitiwan, da omen fu den lasitiwan o toon fosiwan.’
32 Di den be de a pasi e gwa Yelusalem, Yesesi be e waka a den fesi. Den bakaman fi en be e foondoo di den si den sani di a be e du. Ma den taa sama di be e waka a den baka, bigin feele. Yesesi kai den twalufu apostel fi en gwa wanse baka, neen a bigin taigi den saw miti en. A taki:
33 ‘Wi aliki, u de a pasi e gwa Yelusalem. Den o tyai a Manpikin fu libisama go gi den fesiman fu den pilisite, anga den leliman fu a Weiti. Den o leisi sitaafu gi en taki a mu dede, da den o tyai en gwa den taa kondee sama.
34 Den sama ya o soso en, den o tufe neen, den o wipi en da den kii en. Ma baka dii dei, aw kon a libi baka.’
35 Den manpikin fu Sebedeyus, Yakowbesi anga Yohanisi waka gwa Yesesi neen den akisi en taki: ‘Leliman, du san wo akisi i baa.’
36 Yesesi akisi den taki: ‘Saw wani mi du gi u?’
37 Den piki en taki: ‘Meke wan fu u sidon ai letise da a taawan sidon ai kukutuse te yo tii aini a Kownukondee fii baa.’
38 Yesesi piki den taki: ‘Wa sabi san we akisi. Wo poi diingi san mio diingi? Wo poi dopu a dopu di mio dopu?’
39 Den piki en taki: ‘Eeye wo poi.’ Neen Yesesi taigi den taki: ‘A tuu taki wo diingi a sani di mio diingi, wo dopu a dopu di mio dopu tu.
40 Ma a ná mi e taki sama o sidon a mi leti-ana anga mi kukutu-ana. Gadu seeka den peesi ya gi sama a wani kaba.’
41 Di den tin taawan yee san pasa, den ati boon a Yakowbesi anga Yohanisi.
42 Ma Yesesi kai den kon, neen a taigi den taki: ‘U sabi taki den tiiman fu a goontapu ya e basi den sama di den e tii. Den heiheiman e poti den sama di den e tii a den ondoo.
43 Ma wa mu de so. A sama di wani de a moo gaanwan, mu e dini taawan.
44 A sama di wani de a fosiwan aw mindii, mu e dini ala den taawan.
45 Bika a Manpikin fu libisama seefi á kon fu sama dini en, ma a kon fu dini sama. A kon fu gi en libi enke wan paiman fu fii omen sama.’
46 Bakadati den doo Yerikow. Ma di en anga den bakaman fi en anga wan gaan kulu sama be e komoto ape, den si Bartimeyus (a manpikin fu Timeyus). A man ya a be wan beendiman di be e sidon a sikinpasi e begi moni.
47 Di a yee taki a Yesesi fu Nasaleti e pasa ape, a bigin bali taki: ‘Yesesi, Manpikin fu David*, soi tyali-ati gi mi baa.’
48 Omen fu den sama di be de ape bali en taki a mu tapu en mofu, ma a bigin bali moo taanga taki: ‘Yesesi, Manpikin fu David, soi tyali-ati gi mi baa!’
49 Yesesi taampu, neen a taki: ‘U kai en gi mi.’ Den kai a beendiman, neen den taigi en taki: ‘Ná feele, opo, Yesesi e kai i.’
50 A man puu en dyakiti fiingi gwa wanse, a dyombo opo, neen a waka gwa Yesesi.
51 Neen Yesesi akisi en taki: ‘Sai wani mi du gii?’ A beendiman piki en taki: ‘Leliman, meke mi si baka baa.’
52 Yesesi taigi en taki: ‘I sa gwa osu, a biibi fii meke i betee.’ Faisi a taki so, a man bigin si baka, neen a bigin waka a Yesesi baka.
A maiki
^ Efuso ‘tyali kisi en’.
^ Luku den wowtu ‘Manpikin fu David’ na a pisi ‘San den wowtu ya wani taki.’
