Den sani di Malikisi sikiifi 11:1-33
11 Di den be de koosube fu Yelusalem, den doo na a Oleifi Mongo na a pisi fu Betfage anga Betaniya. Neen Yesesi taigi tu fu den bakaman fi en taki:
2 ‘U go aini a foto di we si ape. Faisi wo doo aini a foto, wo si wan yonkuu buliki teitei. Nawan sama á sidon neen tapu ete. U losi en tyai kon gi mi.
3 Efu wan sama akisi u taki: “Saide we losi a buliki?” Da u piki en taki: “Masaa abi en fanowdu. Aw sende en kon baka di aw kaba.”’
4 Di den go, den si a yonkuu buliki de teitei na a doo fu wan osu a wan sikinpasi, neen den losi en.
5 Ma wantu fu den sama di be taampu ape akisi den taki: ‘Saide we losi a buliki?’
6 Den piki den pilisisi enke fa Yesesi be taigi den, neen den sama fika den fu den gwe.
7 Den tyai a yonkuu buliki go gi Yesesi. Baka di den baala den dyakiti na a buliki mindii baka, Yesesi go sidon neen tapu.
8 Omen sama be baala den dyakiti na a pasi, ma taawan koti taka puu a den bon di be de a sikinpasi poti a doti.
9 Den sama di be e waka neen fesi, anga den wan di be e waka neen baka be e bali taki: ‘Gadu gaantangi kibii en baa. A sama di e kon aini Yehofa nen mu fende belesi.
10 Belesi a Kownukondee fu David di mu kon ete. We begi i gaantangi, a sama di de a den moo hei peesi a hemel, yeepi en baa.’
11 Bakadati a go a Yelusalem, neen a go aini a tempel*. Baka di a luku ala den sani di be de ape, a go a Betaniya anga den twalufu apostel bika a be lati kaba.
12 A tamaa fi en, di den e komoto a Betaniya angii be e kii en.
13 A si wan figabon a faawe di be lai uwii, neen meke a go luku efu a bon be abi nyanyan. Ma di a doo, a si taki a soso uwii be de neen, bika a yuu á be doo ete fu a be meke nyanyan.
14 Neen a taigi a bon taki: ‘Noiti moo wan sama o nyan wan sii fii.’ Den bakaman fi en be yee san a taki.
15 Di den doo Yelusalem a go aini a tempel, neen a bigin yaki ala den sama di be e seli efuso bai sani aini a tempel. A daai den tafaa fu den sama di be e booko moni tapu. A daai den bangi fu den sama di be e seli doifi tapu tu.
16 A be e tapu ala den sama fu den á sow sani pasa aini a tempel.
17 A be e leli den sama. A be e taigi den taki: ‘Gadu buku taki: “Sama o kai mi osu wan peesi pe ala sama o kon fu begi.” Ma u meke a toon wan peesi pe fufuuman e tan.’
18 Di den fesiman fu den pilisite anga den leliman fu a Weiti yee san a taki, den bigin suku wan fasi fu kii en. Ma den be e feele, bika ala den sama be e foondoo fu a fasi fa a be e gi leli.
19 Di neti tapu, den komoto aini a foto.
20 A fuuku mmanten di den be e pasa a figabon, den si taki a bon dee te neen ala den lutu fi en seefi dee.
21 Peitilisi membee san Yesesi be taigi a bon, neen meke a taigi en taki: ‘Leliman, luku a figabon dii be fuuku, ala dee.’
22 Yesesi taigi den taki: ‘U mu biibi taki Gadu poi du ala sani.
23 Biibi mi, efu wan sama taigi a mongo ya taki: “Opo komoto ya go aini a ze,” neen a sama de e biibi tuutuu aini en ati taki a sani di a taki o pasa, da aw pasa leti enke fa a taki.
24 Neen meke mi taigi u taki efu we biibi taki wo fende iniiwan sani di we akisi Gadu, wo fende en tuutuu.
25 Te we begi, u mu gi den sama di du wan sani anga u paadon, da u Dda di de a hemel o gi u paadon tu fu den sondu fu u.’
26 *——
27 Den go a Yelusalem baka. Di a be e waka aini a tempel, den fesiman fu den pilisite, den leliman fu a Weiti, anga den gaanwan fu a foluku kon neen.
28 Den akisi en taki: ‘Sama sende i fu du den sani ya? Sama gi yu a makiti fu du den?’
29 Yesesi taigi den taki: ‘Mio akisi u wan sani. Efu u piki mi da mio taigi u sama gi mi a makiti fu du den sani ya.
30 Pe Yohanisi be fende a makiti fu dopu sama? A Gadu efuso libisama? U piki mi osi.’
31 Den bendi a se fu luku fa den be o piki en. Den taki: ‘Efu u taki a Gadu, aw akisi u taki: “Da saide wa be e biibi den sani di a be e leli?”
32 Ma wa poi taki: “A libisama.”’ Den be e feele a foluku, bika ala den be e biibi taki Yohanisi a be wan polofeiti tuu.
33 Neen meke den piki en taki: ‘Wa sabi.’ Neen Yesesi taigi den taki: ‘Da miseefi naw taigi u sama gi mi a makiti fu du den sani ya.’
A maiki
^ Luku a wowtu ‘tempel’ na a pisi ‘San den wowtu ya wani taki.’
^ Son Beibel abi a vers ya, ma aa de aini omen fu den pelensipali Giiki bukulolo.
