Den sani di Malikisi sikiifi 12:1-44
-
A ageisitoli fu den ogii-ati kiiman di a guduman be yuu a goon gi (1-12)
-
Gadu anga Gaankownu (13-17)
-
Den be e akisi Yesesi sani fu a opobaka (18-27)
-
Den tu moo gaan Weiti (28-34)
-
Kelestesi a wan bakapikin fu David? (35-37a)
-
Yesesi e taigi den bakaman fi en taki den mu luku bun anga den leliman fu a Weiti (37b-40)
-
A pooti uman di man be dede kaba poti tu sensi (41-44)
12 Bakadati a bigin gi den ageisitoli. A taigi den taki: ‘Wan man paandi wan doloifigoon, a meke wan sikotu lontu en, neen a seeka wan peesi fu masi a doloifi. A meke wan hei osu tu fu den wakitiman luku a goon. Bakadati a yuu a goon gi sama di e paandi, neen a gwa taa kondee.
2 Di a yuu doo fu piki doloifi, a sende wan saafu gwa den sama di a be yuu a goon gi, fu go teke afu fu den doloifi gi en.
3 Ma den wai a saafu kon, neen den fon mi en te a fon. Bakadati den sende en gwe anga soso ana.
4 A sende wan taa saafu gwa den, ma den naki a wan ya anga siton neen ede, neen den du sani anga en fu gi en sen.
5 A sende wan taa saafu go, ma den kii a wan ya. Bakadati a sende omen taa saafu gwa den, ma den fon son wan fu den, neen den kii den taawan.
6 Neen a man di be abi a goon, sende ete wan sama gwa den. Dati na a boi fi en di a be lobi, bika a be denki taki: “Den o lesipeki en bika a mi boi.”
7 Ma den sama di a be yuu a goon gi bigin taki: “Neen o fende a doloifigoon. Kow kii en, da wo fende a goon.”
8 Neen meke den kisi en, neen den kii en. Bakadati den hali en go poti a doose fu a doloifigoon.
9 San a sama di abi a doloifigoon o du? Aw kon kii ala den sama di a be yuu a goon gi, da a yuu a goon gi taa sama.
10 Noiti u leisi a pisi fu Gadu buku di e taki: “A siton di den sama di e meke osu á be wani, neen kon toon a moo pelensipali siton.
11 Wa leisi taki a Yehofa seefi meke a pasa so noh? A sani ya a wan wonduu gi u.”’
12 Di a taki den sani ya, den be wani kisi en, bika den be sabi taki, a den a be e taki di a gi a ageisitoli. Ma den be e feele a foluku, neen meke den gwe komoto ape.
13 Bakadati den sende wantu Faliseiman, anga wantu fu den bakaman fu Herodes gwa Yesesi. Den be go neen fu kisi en fu a taki wan sani di á bun.
14 Di den doo Yesesi den taigi en taki: ‘Leliman, u sabi taki ye taki a tuu, ya lobi a wan sama moo a taawan, bika a ná anga fesi ye wooko. Ye leli sama sani fu Gadu enke fa a de. I si enke a fiti fu pai Gaankownu* a lantimoni?’
15 Ma a be sabi taki a ogii den be abi a pakisei, neen meke a taigi den taki: ‘Saide we tesi mi du? U tyai wan solufu moni* kon gi mi osi.’
16 Di den tyai a moni kon gi en a akisi den taki: ‘Sama we si na a moni? Sama nen de neen tapu?’ Den piki en taki: ‘Na a Gaankownu.’
17 Neen Yesesi taigi den taki: ‘Da gi Gaankownu san a fu Gaankownu, ma gi Gadu san a fu Gadu.’ Den sama be foondoo fu a fasi fa a piki den.
18 Bakadati, den Saduseiman* di e taki dedesama naw kon a libi baka, kon a Yesesi neen den akisi en taki:
19 ‘Leliman, Mosesi be sikiifi taki efu wan man dede fika en uman sondee fu den meke pikin, da en baala mu toow anga a uman da a meke pikin gi a baala fi en di dede.
20 Seibin baala be de. A fosiwan toow anga wan uman, ma aa meke nawan pikin fosi a dede.
21 Du fu tu baala toow anga a uman, ma enseefi á meke nawan pikin fosi a dede. Aseefi sani pasa anga a du fu dii baala.
22 Ala den seibin baala dede sondee fu den meke wan pikin. Te fu kaba a uman seefi kon dede.
23 Sowtu wan fu den o fende a uman di den o kon a libi baka, bika ala den seibin baala be toow anga en.’
24 Yesesi taigi den taki: ‘U nai fusutan a toli. U nai fusutan san sikiifi aini Gadu Buku, efuso fa a kaakiti fi en e wooko.
25 Bika di den o kon a libi baka, man anga uman naw toow moo, ma den o de enke engel a hemel.
26 Wa leisi a toli fu a makabusi aini a buku fu Mosesi noh? Di Gadu be e taki anga Mosesi a be e taki fu wantu sama di o kon a libi baka di a taki: “Mi na a Gadu fu Abalaham, a Gadu fu Isaki anga a Gadu fu Yakopu.”
27 En a ná a Gadu fu den dedesama, ma a Gadu fu den sama di de a libi. Wa fusutan a toli seefiseefi.’
28 Wan fu den leliman fu a Weiti di be de ape be e aliki den. Fu di a be sabi taki a sani di Yesesi piki den be bun meke a akisi Yesesi taki: ‘On di fu den weiti na a moo pelensipali wan?’
29 Yesesi piki en taki: ‘A fosiwan a disi: “U aliki Islayeli, Yehofa aw Gadu, a wan Yehofa namo de.
30 I mu lobi Yehofa i Gadu anga i hii ati, i hii libi, ala i fusutan, anga ala i kaakiti.”
31 Du fu tu a disi: “I mu lobi taa sama enke fai lobi iseefi.” Weiti á de di pelensipali moo den wan ya.’
32 Den leliman fu a Weiti taigi en taki: ‘Leliman i taki moin, na a tuu i taki de. “A wan fu a Gadu ya namo de, taa gadu á de enke en.”
33 A lobi di u mu lobi Gadu anga u hii ati, u hii fusutan anga ala u kaakiti, anga a lobi di u mu lobi taa sama enke faw lobi useefi, pelensipali moo iniiwan ofaandi* di wan sama sa tyai.’
34 Di Yesesi si taki a man piki bun, a taigi en taki: ‘Ya de faawe fu a Kownukondee fu Gadu.’ Bakadati nawan sama be peefuu fu akisi en wan sani moo.
35 Di Yesesi de aini a tempel e leli den sama te wan pisi, a taki: ‘Saide den leliman fu a Weiti e taki Kelestesi a David manpikin?
36 A santa yeye be meke David sikiifi taki: “Yehofa taigi mi Masaa taki: ‘Sidon a mi leti-ana te enke mi poti den feyanti fii ai futu ondoo.’”
37 Efu David seefi kai en Masaa, da fa a sa de en manpikin*?’
A gaan kulu sama di be de ape be e aliki en anga ala piisii.
38 Di a be e leli den sama a taigi den taki: ‘U mu luku bun anga den leliman fu a Weiti. Den lobi waka lontu anga gaan langa koosi. Den lobi te sama e gi den odi a wowoyo.
39 Den lobi sidon a fesi aini den snoga, den e wani sidon a den moo bun peesi te den gwa wan fesa.
40 Den e koli den uman di man dede teke ala den gudu fu den, den e begi gaan langa begi fu sama mu si den. A sitaafu di den sama ya o fende o ibi.’
41 A go sidon a pe a be sa si den moni-kedee fu luku fa den sama e kon poti moni aini den kedee. A omen guduman be poti tyaipi moni aini den kedee.
42 Ma wan pooti uman di man dede kaba kon poti tu sensi* aini a kedee.
43 A kai den bakaman fi en kon neen a taigi den taki: ‘Biibi mi, fu ala den sama di poti moni aini den kedee, a pooti uman ya poti moo ipi.
44 Bika ala den poti pikinso fu a somen moni di den be abi, ma a uman ya poti ala a moni di a be abi fu solugu enseefi winsi fa a pooti.’
A maiki
^ Luku a wowtu ‘Gaankownu’ na a pisi ‘San den wowtu ya wani taki.’
^ Aini Giikitongo den be taki: ‘denari.’ Luku a wowtu ‘denari’ na a pisi ‘San den wowtu ya wani taki.’
^ Luku a wowtu ‘Saduseiman’ na a pisi ‘San den wowtu ya wani taki.’
^ Boon-ofaandi anga meti-ofaandi.
^ Efuso ‘bakapikin’.
^ Aini Giikitongo den be taki: ‘2 lepta.’ Dati a be a moo lagi moni fu den Dyu na a ten de. Luku a wowtu ‘lepta’ na a pisi ‘San den wowtu ya wani taki.’
